Kum 1990 vel a American baseball leh football kimawl siam minthang Jack Bo@ Vincent Edward “Bo” Jack in a pa tellou a ana khankhiakna a haksa a sak a genna ah, "We never had enough food. But at least I could beat on other kids and steal their lunch money and buy myself something to eat. But I couldn't steal a father. I couldn't steal a father's hug when I needed one. I couldn't steal a father's whipping when I needed one," chiin Pa hoihtak neih a lunggulh thu ana gen hi.
Thupatna: I Bible ah Pathian pen Nu bang a genna (motherly qualities) om mah leh Pa ahihna genna tamzaw tham a, mi tengteng Pa ahihna leng ana kigen mah hi. Hiai apan in, Pa chih title pen Pathian tawh I kikop uh vachih hial di hikei mahleh kigamla hetlou asuak hi. Pathian le Pa chi’n I sam a, tua bang in nang leh kei (Pa te) le Pa chi a sap in I om uhi. Hiai in ahon theihsak khat tuh - Pa hihna dinmun ngaihneep leh ngaihdau vual ahi kei, khalam a Pa muhtheih a a naisaktu tuh salam a pa hihna ana hi. Hiai I chih chiang in, salam a pate Pathian ahi uh chi hi zenzen lou in, leitung damsung a pate pen khalam a Pa mel laktu poimawh khat ahi thei uh I chih nopna ahi zaw. Father’s Day hong nai tawh kiton a Pate tawh kisai biik a gelh ahi.
Pa: Pathian’ Lemgeel (God’s Plan)
Hiai thugelh a “pa” chih I zat chiang in “husband” leh “father” I genna hi tuak ahi. Genesis I sim chiang in Pathian in innkuan masapen Adam leh Evi ana bawl a, tua innkuan ki-etkolna ding thukhun (principles) ana pia in, pasal pen a makaitu hiding in ana sep hi. Hiai I gen chiang in kikepna-a a mawhpuakna uh (roles) genna ahi a, Pathian mai a a hihna uhiam a sang zaw-niamzaw genna a hi kei hi. Adam siam masak ahi a, Eden huan kem ding in mawhpuakna piak ahi a, thilsiam dangte (Evi tel in) min teng teng Adam phuah ahi-Pathian thupiak bang in. Hiai mah tuh sawltak Paul in leng ana gen hi (I Tim 2:13). Huaiziak in, innkuan sung a pasal/ pa pen makaihna pen mihing phuahtawm himawk lou in Pathian lemgeel leh thaunilh ana hi ahi.
Pa: Sila Makaitu (Father: A servant Leader)
John MacArthur in Being a Dad Who Leads chih laibu ah, “Pathian deihna leh lemgelna bang in pasal tuh innsung ah a lutang (head) ahi a, innkuan sung kikepna ah a makaitu ahi” ana chi. Himahleh, hiai makaitu hihna pen sila makaihna ahi (servanthood leadership). CEO banga thuneihna tawh makaihna hilou in kingaihniamna leh kipumpiakna tawh makaihna ahi. Pa makaihna pen a innkuan sung mite (zi leh tate) ading a damna, bitna, leh lungmuanna tuntu ahih ding ahi. Ama’ nopsakna ding, minhoihna ding, phatna ding hi masa lou in a innkuante nopsakna ding, khantouhna ding a tup leh a ngim ahih masak zawk ding ahi. Makaitu hihna tan lel phawk a, sila hihna pen I phawklouh chiang in angmasial makaitu kisuak a, Pathian deihna kipalsat zel hi. Paul in, “Jesu Khrist in saptuamte a it a, a kipumpiak bang in na zite uh it un” chi’n ana gen (Eph 5:25). Hiai mah tuh khalam a makaitu hihna (spiritual leadership) I chih ana hi.
Pa: Innkuan adi’a Pathian Kamsang (Father as a Prophet)
Tomkim tak a gen in, Bible a Kamsang hiam Jawlnei I chihte’ nasep ahihleh Pathian apan thupawt (hilhlawkna hiam vauhilhna hithei) te mipite kiang a ahi bangbang a gen/zaksak ahi. Hiai nna sem ding in tuh niteng a Pathian tawh kizopna/ kithuzakna neih a poimawh hi. Innkuan sung kikepna a Pate mawhpuakna leng kamsang nasep tawh kibang a gen ahi. Tuchiang in, innsung kikepna nawngkai sak leh lamhaih sak thei ding thu tuamtuam muhna (source) tuamtuam apan a tam mahmah hi. Tua lak ah, Pathian thutak sinsak a, tua mah a kibulphuh leh tua thutak pansan a kilam tou ding a malakna tuh Pate mawhpuakna ahi. I zi leh tate ading a Pathian muk leh kam I hih ding poimawh ahi.
Pa: Innkuan adi’a Siampi (Father as a Priest)
I Bible hon sinsakna bang in Siampi (Priest) nasep tuh mipite sik-le-tang a Pathian mai a thupha tawi a kithoihna lat ahi. Innkuan a pa pen Siampi bang a I gen chiang in a dinmun hilou in a nasep ahi I gennop. Siampi in mipite sik-le-tang a Pathian mai a thupha tawi a kithoihna alat bang in, Pa in a innkuante sik-le-tang a Pathian mai a thupha tawi a, Pathian maipha a zon ding tuh a mawhpuakna khat ahi. Bryan Chappell in, “Innkuan mite kiang a Pathian thutak tun a, amaute ading leh amaute sik-le-tang a Pathian mai a mawhmaina ngen a Pathian maipha zonna tuh Pa mawhpuak ahi” chi’n Each for the Other laibu ah gen hi (be the voice of God to your family and the voice of your family to God).
Pa: Sinsaktu (Father as a Teacher)
Nidang deuh khawng in ei Zomite lak ah innsung kikepna leh innsung a tate kepna tawh kisai deuhte Nute mawhpuakna deuh a koihna ana om hi. Adiak in khalam a kikepna tawh kisai bang in Nute nasep ding deuh a koih I bang uhi. Ahi a, I Bible in bel sinsak ding in Pate ana sawl zaw hi. Paul in, tate thangpaisak/ lungkesak lou a Toupa dan tawh kituak a sinsak ding in Pate ana sawl hi (Eph 6:3). Moses in le hunteng a tate sinsak ding in Israel nu-le-pate ana sawl hi (Deut 6:7-9). A hunlai a sinsak in a damsung a gah manpha suang ahi chih Bible in hon hilh hi (Prov 22:6). Nu leh pa pangkhawm a sinsak ding ahih lai in, pate’n inteekna (initiative) a laak ding uh ahi. Tate sinsakna tawh kisai in I innsung a I koih I van neih tampite tawh kidem hita I hi chih I phawk ding uh ahi. TV leh phone leh Internet I chihte sinsaktu ngen ahi uhi. Dr Ginnei Thang Ngaihte in, “nu-le-pate’n I tate sinsakna I ngaihkhawk mahmah keileh a sinsak nuam tam mahmah ahi chih I phawk ding ahi” ana chi a, dik mahmah hi.
Innsung a kisinsak ding a poimawh mahmah khenkhatte: problem (mid-life crisis) solving, family budget (sum-le-pai zatdan), boundaries in life and relationships, gam-le-nam it I chih bang genna, leadership issue, biblical view of marriage, te innsung mahmah a I kisinsak pat hun mahmahta hi.
Pa: Belamchingpa (Father as a Shepherd)
Misiamte’n innkuan kikepna a pa pen mawhpuakna a gen chiang un “belamchingpa” nasep tawh tehkaak zel uhi. Hiai bang mawhpuakna in tuh – manawhna lam kichiantak nei a kimakaihna (leading/guidance), salam leh khalam a pichinna ding a akisamte suktuah/ piakna (providing/ provision), leh salam leh khalam a a lauhuai (eg sinsakna diklou, etc) te a pan innkuan mite kepbitna (protection)a uap hi. Bible in etton ding Belamchingpa Hoih Jesu Khris ahon pia hi.
Pathian’ hon koihna ngaihsaklouh a lauhuai
Deuteronomy 34 ah Moses sih thu a kigen a, tua tawh kiton in Moses thakhengtu ding kha a dim (spirit filled) Joshua akigen lang ngal hi. Joshua 24:29ff ah Joshua sih thu a kigen nawn hi. Tua ah, “Joshua leh a upate, Pathian nasep lamdang mit a mute damsung teng Israel te’n Toupa Pathian nna a sem uh” chi’n a gen (t 31). Hiai thu mah Vaihawmte 2:6-10 ah akigen nawn (Joshua sih thu). Himahleh, hiai Vaihawmte laibu ah a kigen beh khat a om a, “Joshua leh a upate sih nung in, Pathian leh A nasep lamdangte theipha lou khangthak ahong om uh” (free translation) chi’n a gen mawk hi (Judges 2:10). Vaihawmte 2:7 leh 10 kikal ah a vangsiat huai mahmah thil a tung chihna ahi. Joshua damsung teng Israel te’n Toupa nna a sem ua, amah a sih chiang in khangthakte’n Toupa Pathian a phawk kei ua, amau adi’a A nsep lamdangte le a phawk tuankei uhi. Toupa Pathian phawklou khangthak a hong om uh achi.
Ahihleh, Joshua makaih sung a Israel te’n a melmate uh zou a, a lalgam uh naktak a keeklet ahihlai in, huai lalgam kibulphuhna ding a thutak kisinsakna lam ana lawhsam mahmah uh ahih tuak. Moses sih in a thakhengtu ding Joshua a om a, himahleh, Joshua sih in a thakhengtu ding kuamah gen in a om kei. Huchi’n vaihawmtu tuamtuam a banban in a om om tou a, Israelte vuallelh kipatna khat asuak. Joshua pen army general thupitak, galhat tak himahleh, Moses tungtawn a Pathian’ thupiak, “na tate uh na sinsak ding uh ahi…na tut lai bang un… na din chiang un, lampi a na pailai bang un” chihte ana zuilou uh ahingei ding. Ahon phawksak mahmah tuh - I tate I sinsak keileh Ikiim-Ikiang ah a sinsak thei ding leh a sin sak nuam vanzat tuamtuam tampi mahmah a om uhi. I phal diam?
Thukhitna: Noa in tuichimpi apan a innkuante leh gamsate bitna ding a long a bawl dek in, Pathian thupiak manna leh muanna a a bawl ahi. Midang kuamah in gingta lou a, lunglutpih lou uh, chiamnuihna a zang uh ahi. Himahleh, a ma’n Pathian thu gingta in a zui. Pathian in abul apan a tawpdong tan a bawl dingdan teng a hilh a, a zawh a a long sung a om di teng a lut zawh un le Pathian mahmah in a kong a khak lai hi. Tuni a I innsung I etkolna/ kepna ding dan a poimawh teng Pathian in Bible ah A hon pekhin vekta.
Luka 16:19 apan I sim leh mihausapa leh Lazarus tangthu a kigelh. A nih un a si tuak ua, Lazar pen Paradise ah a pai a, mihausapa pen meidiil ah a pai a chi. Mihausapa’n Abraham kiang ah apa’ innkawte va vauhilh ding a Lazar sawl ding in a ngen a, himahleh, Abraham in, Moses leh Jawlneite a nei ua, tuate thu a ngaih kei uh leh misi lak a pan mi thounawn in vagen le uh le ngaihkeh tuanlou ding uh ahi chi’n a dawng hi. I gennop pen tuh - I innkuan sung a tate sinsakna tuh midang kuamah tung a kinga hilou in, Pa tung a kinga ahi masa ahi. Sande Skul sinaktute hiam I pastorte hiam hi masalou in, ei nu-le-pa (abiik a pate) tung a kinga ahi chih phawk ni. Midang kuamah seen theilou ding hi hang. I innsung a Moses leh Jawlnei/ kamsang leh Siampi dinmun luahtu eite I hi uhi.
I Peter 5:3-4 na ah, “Noute khut a Pathian’ hon kepsakte tung a kiliansak lou in, belam honte etteh ding in kibawl un. Tua hileh Belamchingpa lianpen hong kilat chiang in, a tul theilou thupina lukhu, pahtakman in na sang ding uhi,” chi’n ana gen hi. Pathian in hon kepsak belamnoute hoihtak in I kem ding uh ahi. A hon kemsakpa Belamchingpa lianpen hong kilang/ hong pai kiik ding a, I sepdan tawh kisai thukhenna hon nei ding hi. Ei ut dandan hiam ei adi’a a lemtang dandan himai lou in, Ama hon sinsakna bang in, Ama deihna tawh kituak in I innkuan sung makaih in panla thak ni. Tua hileh, vualzawlna tampi tawh lungkham den lou ding I hi. TOUPA’N thugelh simtute vualzawl in, A deihdan lampi ah honpi hen!
