Chibai bukna leh thumapi:
EBCC Delhi thukizakna sai heutute’n hiai Gamchiam/ DEW a tuang ding NUTE NI a thugen hon ngetna tung uah hamphatna a la in ka kipak petmah hi. Kuapeuhmah a simkhate adi’a vualzawlna ahihding lametna toh ka thumna leng ahi.
Nute Ni & Dorcas’ Day damtak a hon musak i Biak Pa Pathian leh i Toupa Jesu Khrist min in Chibai k’on buk hi.
Mihing taksa sithei kizopna tengteng tunga tawplou a kizomsaktu sang penpen leitung ah om hi. Bang a hidi’a le? Na ngaihtuah buai hia? Lu khuatzen in ngaihtuahna pe lengleng thildang bangmah a omkei NU leh TATE kizopna, huai tuh a man gen di chi leng a hon itna uh simzoh hilou, tate leh innkuanpihte adi’a a kipiaknate uh gen zoh hilou hi. Leitung pumpi a NUTE theihphak a omna di’a MOTHER’S DAY gam 46 khawng ah kizang hi. Pasal kia hilou numei mah, nu hihna a na tang ta tampite’n leng theisiam lou in NU nengniam leh muhsitna society ah i om lellel hi. Himahleh tuni Nute a ding in NI THUPI petmah ahi.Huaiziak in ‘NUTE PAHTAWI NI’ chih thupi in nei leng chi in k’on tel hi.
I. Nute ni hong kipatdan:
Kum 1908 in Anna Jarvis in ama’ Nu Ann Reeves Jarvis, American Civil War omlai a sepaih liamte itna toh thasiallou a kemtu ahihna ah a pahtak dan leh a kipiak zohna thupi sa in theih gigena ding hunkhat a nabawl hi. Hiai huntuh St. Andrew Methodist Church, Grafton West Virginia ah neih in om hi. Huai kummah in International Mother’s Day Ni siangthou a pom ahi. Anna Jarvis in 1905, a nu sih kum mah in United States a Nute Ni lopding phalsak ding in ngen hi. Leitung a om Nu tengteng in leng amau innkuanpihte leh society adi’a a nasep uh thupilua ahihmanin nute pahtawina piak a ut hi. Huchi’n pan hon la toutou in US States teng phial ah 1911 in Mother’s Day zat hong kipan hi. 1910 kum in Anna Jarvis omna mun West Virginia tuh amau State a Nute Ni ziak a local holiday ding a puang masapen a hong hi uhi. Huchi’n May Pathianni nihveina pen 1914 kum in official tak in Nute Ni ding in America President (28th) Woodroo Wilson in USA ah National Holiday hiding in puankhiakna nei hi. Hichibang zel in NUTE NI USA ah hong kipan a, hiai ni mah in gamdang India, Bangladesh, Pakistan, Italy, Singapore, Belgium leh a dangdang te’n leng zang uhi. Tuni’n EBC saptuam in leng i zangta hi.
II. a) Bangziak a Pathian in NUTE ana bawl ahia?
1. Pasal panpihtu ding Gen.2:18
2. Amah tuh tehna khau muhpaisuaktheih omna theitu ahi or amah tuh phim omna kintak a hon hilhthei tu ahi.
3. Innsung hahsiang leh kemtu ahi.
4. I piankhiak tung a honkem leh panpihtu ahi.
5. Innsung lumsak, nuamsak leh dimsak ding a Pathian in nute bawl ahi
6. Pathian thupiak bang a zahna leh pahtawina piak ding a bawl ahi uh (Diut. 5:16).
b) Key Text: Ephesians 6:2-3
“Na nu leh na pa zahtak in” hiai tuh thupiak chiam nei masapen ahi. Huchiin nang a ding in ahoih di’a, lei ah leng na damsawt ding hi.
Chiamnuih phuahtawm himahleh i gen ut pen idea hon pethei ahi: Naupang khat in Sunday School kai na special item khat Bible chang genna a neih lai in mun khat mangngilh hive aw. Alungsim mang gawp,ngaihtuah khezou lou , anu ama zawn a tu in panpih ut in aginglou in a muk in ana gensiausiau chiang in leng theithei tuanlou hi. Atawpin va-awn zek in a bilbuk ah, “Kei khovel vak ka hi” chi’n a vahilh hi (Jn.8:12). Huaiphet in naupangpa lungsim vakkuau a ngaihtak in “Ka nu tuh khovel vak ahi” chi’n hong kikou khia hi. I gennop chiang mahmah in ka ngaihtuah hi. Naupang in “kei” chihna di mun a a’ nu mu ahih chiang in tua hongenkhia ahi.
Hiai thu akipan Pathian in pahtawina piaktuakte pahtawina peding leh zahtak dingte zahna peding in hondeih hi. Adiak in tuni NUTE adi’a special Ni ahih toh amaute pahtawina leh zahna piak a poimohdan thei in Pahtawina pe ni chi I hi. I hinkhua a thuneitu ding Pathian in a koihte zahna leh pahtawina i piak chiang in Pathian deihsakna leh a vualzawlna kitang zel hi.
c) Tuzingkal in Pathian in Nute a thawnpiak zahna leh pahtawina apiak bangbang enle’ng pe ut I hi.
1. Zahna/ Zahtakhuaina i chih bang ahia?
= Value-thilman, manpha; appreciate-kipahpih; esteem- ngaisang; respect-ngaithupi, regard-ngaina deihsakna toh. Manphatna muh ding tuh hoihding, gikding leh mantam ding chihna ahi.
John Bevere in‘zahna’ ana hilhchetdan ahi.
Tuhun leh tulai khovel i omna ah media thuzohna khovel ahi a; thuneitu, zahna leh pahtawina tang dingte’n atanding bang uh tanglou uhi.
Himahleh Pathian thupiak tuh, ‘zahtak dingpa zahtak un’ chih ahi (Rom 13:7).
Kua ahia leh zahtak ding?I Laisiangthou chang tel ah, ‘Na nu leh na pa zahtak in’ chi hi. Tuni Nute ni ahih toh kiton a NUTE pelian deuh I hi.
III. Bangziak a NUTE pahtawi ding? Lam chi tuamtuam tampi a om ding, himah leh tuni’npoint 4 (li) i enkhawm ding uh:
a) Nute khang paisawn sakte ahi: Leitung mihing piangkhia peuhmah NU kichi omlou hileh a pianglou dingte kihi ahi. Bangziak in eita? Pathianin a thilsiamte hoih a savek a, himahleh Adam (mihing masapen) amah kia a om hoih a sakei a, a kithuahpih ding “NUMEI” Evi mitengteng nu, a nakguh apan ngekngek a lakhia in a honbawl hi. Huchi’n Adam leh Evi te nupa akipan in khang hong kisuang toutou a tuni in nang leh kei khang tan i tungta hi. Huan Pathian in chi tampi suang a leitung luahdim ding in thu pelai hi (Gen.1:27,28; 2:18,21-23; 3:20). IKor.11:9 ah, ..‘Numei bel Pasal adi’a siam ahi chih dungzui in Pathianin Nute pasal lunglutna pen hiding in a vun uh leh a aw uh neem (soft)sak deuhse a, special takin bawl hi. Vangpia in a pasal neihna uah, huai vang in zui a suan-le-pak suahtheihna pia a Pathian vualzawlna in khang paisawnsak hi. Goutan tate, nute tungtawn in hongpiang hi (Ps.127:3). Pasalte lungkimsak, innsung luahlumtu leh lungmuang saktute ahi uh. Isak in zi aneih in lungmuangtakin a omtheita hi(Gen.24:67).
b) Nute liangkhauhte ahi uh: Pasal hat khenkhat te’n a liang ua singtang khawng a singtawn saupi leh lian, gik huntawk a puakzohna liang bang uh hilou hi. Pathian in khovel gikna pozou ding in Nute liang khauhsak hi. Huai tuh: Nauneih haksatna thuak zouding, a tate uh haksatak a a hinkhiakte un nawlkhin sek mahle uh ITNA toh dohzou tak a thuakzou teitei ding leh khamuanna peding in a baan uh neemsak hi.A neulai ua pahtak mahmah bang in a hong omden kei uh a, hong lian deuhdeuh in duh leh ngaih, nektheih-dawn theih, atui-aha toh hong kibual hun un leng aw ham a leng chi-ngam lou in awl a itna toh hilh ngeungeu zel uhi. Esk: Nau oihla…Bawi aw hong khang mengmeng aw, Pam a luidawng hongbang aw, pam a luidawng no’ng bat chiang, Nu tha khek aw, Pa tha khek aw bawi aw e!chih bang in tate ah lametna sang petmah ahi. Huchibang a nu-le-pate’ lamet na hihlai in amaute nawlkhin, nek-le-dawn, silh-le-ten a entuam in khasetak a koihkhak theih ahi(singtang khua khat ah pitek khat hong si a, adamlai gentheitak a om, a lupna a zun leh ek thamaimah, kemtu di omlou hiam I sak leh mou bang leng nei ana hi hi.
Pitek dang khat mah hong si a, ke’n leng ka vagal kha hi. A tanu khasetak in akap zel a, avante khawng sutuah in, ahihhang a veng nupite gen chu hiai ahi. “Khasetak in houh kap ven a damlai a itlou a a hong sihtak in zaw it abang khemkhem ve” a chi uhi. Tua nupi si pen a damlai in a tanute’ in khawng a a vahoh chiang in hong pawtpawt ke’n, zumhuai khawng peuh ana chihkhumzel hihtuak hi). Tua pitek si ka vagalkhak pen a damlai in midang tung hilou ama’ tanu hinkhiak tung mahmah ah khase tak in omsek mahleh a’ tanu a ngaihluat ziak in kidek zoulou in avang kim in va pha zelzel hi. Nungak leh tangvalte bang in leng nu-le-pate thring salai, thuhilhna hon piak chiang bang ua, nou hunlai leh tuhun kibang nawnlou chih peuh a kipilsak tak khawng a dawng zauzau kawm leh a thu uh manlouh toh thuah zomahlai in I omkha hiam? chih kiveelphat tuak mahmah hi. Stephen Mang in ‘Penpen Tunnu’ chih laa a phuak a, a nu mai mahmah ah itna toh a sa ngelngel chih mi’ gen ka za a, hihhoih kasa mahmah hi. Himahleh tulai mite’n bel a nitoh kituak chihman a sa, hoihsa maimai, i nute ngaihtuah phak a leng nei kholloupi a sa i tamzaw kha mai dia’m ka chi hi.
c)Nute a man uh tam: Numei hoih kua’n a mudia? Aman lah Ruby suang tunglam pek ah a omngal a (Pau.31:10). Singtangmite lak a ei Paite kampaute paidan in nu-le-pa i kiten chiang in numei man Rs. 3000/- (Teng sangthum) lel ahi. Hiai a nupa kitenna pupa dan a man kipiak gen hilou I hi. Himahleh nute nasep-innsung nektak bawl, kep leh zuun, tate a kepna uh, pasalte panpihna, tanau-laina tung a mohpuakna, inleng kikholhna leh a dangdang gendi tam lua. Tuabangteng seem zouding in Pathian in hoihna, muanhuaina leh hatna thupitak guankawm in hatlouhna khat guan hi. Huai tuh khitui ahi, himahleh tualeng innsung mite, adiak a a hinkhiak uh tate, ahon itna ziak a pawt a hithei hi. (Esk. Poem: ‘Home they brought her worrior dead…’ Hichibang ahi: Nu khat, a pasal gal a si, it mahmah napi in hehtha bang suak in a mittui leng a pawtthei kei zozen hi. Himahleh a taneu angpomlai hon phawkkhe guih a, “E!hiai nau kei lou akemdi omlou, a kem piching ding ka hi vele” chih hon phawkkhiak leh,“Aw! Bawi,” chi in a pheitung a pom in, “Nang adi’a hing ka hi” chi’n mittui kai zoihzoih in hong kapkhe thei hi). Nute’n zankim-zankhang chilou in, zun-le-ek honsiaksak uh a, chinat-lainat i thuak hun in gim-le-tawl gen omlou ihmut gina leng mulou in ittak in hon na khoilian uhi. Damlouhna i tuak a hon kem ua, silh-le-ten hon-guan ua, nektak honpia ua, siamna-pilna i neihna di’a sum-le-pai, tha-le-zung a sente uh na tuat ngei hia?
Pathian in tate paai ding a nute hamphatna pia a, sisan-naisan toh hon hingkhia a, leitung khovak muthei a, gilkial a i om chiang a nawitui a honpiak ua i bih vengveng khawng sum a lei di hileh na leizou diam?Nawizu neiloute buaidan na theikhangei hia? Sumin a nawi ding leitheih mah inteh, himahleh a kepzuina ngaihtuah dih. Khovak muhma in kha 9 sung vingvenggila honpaai uh, ngeksen apan tuchiang dong a thasen uh thaman bangzah apha di’a? Nute aang a i khamuan dan sum in a leizou dia’m? Na hong khanglianta a, sepna no’n nei a zi-le-ta nei in, khateng loh bang na honneih tak in nute khawng na zahpih maimah hia? Thring lua uh, tulai nawnlou lua chi a nuihsan henghang maimah na hihleh zaw hihkhial kha ding na hi. Nute man a tamdan kamkhat nawitep a bih vengveng mai naupang pen zankhatchauh nu tellou akep leng tawlhuai in beidothuai ahi. Nu hitate’n na ngaihtuah ngei uhia? Tuni a pasal hoihtak na neihtheih, na pasal kem a haksa bangteng ana palgalkaai na pasal’ nu bang na loh a? Pate aw na zi leh tate ziak in na Nu innsung ah aval hia? Nu aw/Pa aw, Pipi/Pupu chih a loh uhia? Nikhat in khatvei bek tek mahmah ta le uh leng nasam ngei hia? A pau louh hang ua a lungsim un hon ngai mahmah uh hikhathei ahi aw! Sawltak Paul in Ephesa saptuamte thunuailut, khitui toh haksa tampi thuak a a kep bang in Nute’n, tate ading in bangkim huam in kikem hi (Nas.20:19,31).
d) Nute’n vualzawlna tawi uhi: A houpen in gen le, zinkhiakna ding leh khosung mah ah leng hohna ding Ineih chiang in Nute’n,“Valamzang in aw,Bawi” a honchih uh bang vualzawlna thupi tak ahi. Houchik I sa khamai thei, huchibang kampau a kikhakhe lou thei I hi. India PM pu Modi in a nu kiang a hoh in a vualzawlna a ngetzel dan news tungtawn khawng in leng I thei hi. Huchibang a ginglou mite’n leng poimohngaih a nute zahna piakkawm a vualzawlna a deihdan uapan in a theihtheih hi. Evangelist minthang mahmah phamsa Billy Graham’ zi Ruth Graham, a nungak lai Wheaton College a a kailai in interview a neihna uah, “Na damsung a na utpen khat gen in” chi a a dot uh leh, ama’n, “NU chih a omding mahmah ka utpen” chi’n a dawng hi. Bangziak ade aw? chi a ka ngaihtuah leh Ruth in nute’n vualzawlna tawi uh ahihdan leh a man tamdan theichian a, tua sepkhiak ana tum tinten dan ahi chih ngaihtuahna honpia hi. Apasal lohchinna leh a innkuan lohchinna uh hiai a Nu Ruth Graham in a hihtheihtawp suah a a panna ahi chile’ng kigenkhial lawmlawm khollou ding hi (Pau.31:10-31).
Unau, hiai dotna na ngaihtuah ngei hia? En mahdih khosakna ding, nektak-zonna a sum-le-pai muhna ding plan nabawl a na lunggel bangbang in thil paiziahziah le tuh mi hausatak leh nuamtak a khosa ding na himaithei. Himahleh, nang chih leh gel louhna lam daih a thil ahong pai a, lungkhamna in ahon bawm daih hia? Aziak na sutkhangei hia? Nang honsuang,na nu teektak ana musit khahimaimah thei na hi. Akhasiatna khoihkha a vualzawlna luanglut di nang leh nang ana kidal hikha maimahthei na hi aw, kiveel mah dih (Pau.23:22,25; 20:20). Lu a kelsam poute ma ah ding in. Tek omna zahtak in. Na Pathian lau in, kei Toupa ka hi (Lev.19:32). Hiai thute mihing gen lel ahikei a, Pathian apan thupawt leh thupiak, sepkhiak ngeingei ding ahi.
Mipil leh minthandan tuam neite’n NU toh kisai a a gen uleh ei paunak ko’n gensawn zek di:
@ DL Moody in, “Ka nu hon itna itthuk ding ka bat ka dinzou ngeikei ding a chi hi”, Leiba sum-le-pai atawm-atam theikhang, himahleh mi aI vabat chiang in tamloulou in I din a, atawp in (anaak neizenlou tuh) a hong bei thei hi. Himahleh hiai a Moody in a nu itna bangbang a theihtawp suah in itthuk mahleh dinzou ngeilou ding ka hi chi’n a gen hi. Nu’ itna kangngeilou leh beingeilou ahi chih hon musak hi.
@ Sepaih hangsan Nepoleon in, “Nauluai veitu Nu khut in khovel vai a hawm” a chi hi. Nepoleon a hansandan, galhatdan leh a vaihawmna himhimte a et chiang in amahmah a hongpiang ahikei chih amu a, a neusen a kipan a khoi leh ching a kemtu a nu khut hat leh manpha a sakdan a genna ahi hi.
@ Paite Paunak ah, “Nute sihsan tagah tate sang in Pate sihsan tate a khosuak a tamzaw” a kichi hi. A ziak bel, atangpi in nupen a hong sih leh Pa ang a hawm (empty) a, zidang bang honneih chiang un innsung vaihawmna hong kikhek a, tate aa ding in haksatna omtheisek hi. Ahihhang in pa pen hongsih chiang in tate’n nu ang loungal belhna ding a theikei ua, nute’ aa ding in amau kep leh zuun ding pate sep di tengteng toh mohpuakna thuahnih hongsuak a, huaiding in nasatak a Pathian toh pang a tate hon kepchiang un hong khosuak uhi. Tampi gending omin teh himahleh hiai teng kia akipan in leng Nute’n pahtawi phu (deserve) uh ahi chih theihtheih in a om hi.
IV. Thukhitna:
Nu melhoih, pil, siam, lian leh thaching, kizentak mi’ nute sang in, ei nupen mawl leh hai bimbiam in mi kizep bang in kizem zoukei mahleh, i tunung hunding gel a haksa tampi thuak a, hiaichiang honna tunpih ahi chih phawkthak ni aw. Leitung mihingte ki-itna laklak ah Nute’n tate a hon it bangbang ua itna thukzaw omlou ding hi. Unaupa Paunou (Lengtong) in a laphuah,‘Kholhpih lawm leh ziding tading zontheih hi a, Tun leh zua leh pianpih laizom zontheih hilou’ ana chi hi. Lungleng leh nu ngai mahmah a phuah hikha ding hi. Nute ni tamveipi i na zangta, zatdan a kibang gige kei maithei. Ke’n 2012 a ka zatdan saulou k’on kum ding…Singtang khua khat a ka omna ah Nute Ni a thugending a seh in ka om hi. Thugendi ngaihtuah a ka kisakkholh lai in, kei nu’n (pianna nu) bang chituk in keiziak in haksatna bangzah ta a thuak de aw! chih ka ngaihtuahkhia a, keiziak a lungkham leh mualphouna a tuah didan leh ka hehsak hun tamveipi om ahi chih khawng ka phawk khe dundun hi. Huan, tulel a keileng Nu chih a ka omtheihna di’a honna khoi piching tu ahihdan k’on phawkkhiak tak in a kiang a kipahthu gen teitei ut in phone tungtawn in kipahthu leh a tung a sepkhelh-bawlkhelh kaneihte Pathian min a ngaihdam ngetna hun kanei hi (khotuam a om ka hihziak un). Tuni in, unaute, kei nu’n 2015 kum in honna sihsanta , a hoih, thukzawseem itna leh pahtawina hihtheih tawk a tung ah semkhe ut lai mahle’ng amah dam nawnlou ahi.
A dang khat k’on kumlai ding aw: Nute’ itna ngaihtuah khak chiang in mahni pianna nu mah lungsim ah hong suakkhe masa zel hi. Hiai tuh mihing ngeina dan leng ahi. Tuapen tung ah khalam mit hak in en/ hak sang zawdeuh ding in ko’n ngen ut hi (a diak in nute). Tutung Nute Ni a (LIVE Online) thugen ding hamphatna, heutute tungtawn a piak a om, kisakkholhna a pai lailai in Pathian houpihna leh a honphut mah hi’n ka thei a huai tuh, Ka pasal’ Nu kiang a kipahthu gen ding ahi. Ka pasalte’ innsung a inntek tak leh tate nei a amaute adi’a ‘NU’ chih ka tantheihna ka pasal pen, amah Nu’n haksatna leh lungngaihna tampi pal paisuak a ana kep pichin ziak a ke’n hamphatna leh vualzawlna tampi dong ka hi chih kiphawk in ka nu kiang ah Pathian min in kipahthu ka gen hi.Mi tampite’n hichibang a na hihthei sam mah le uh, tampi mah in hihtheilou ding uhi. A ziak bel innsung khosak kibang kimlou a, nupa kal, pasal’ sanggamte toh kal, nu leh pa toh kal bang leh mou leh mou kal kal-awng (gap) lian pipi ombang leng om thei a, Pathian akipan a thutung a hihkei leh vasepsuah theih mawk hilou hi. Kei ading in leng tuabang kal-awng (gap) lianpi om mahleh Pathian’ Kha piina toh hihthei in ka om a, ka kipak mahmah hi.
Ka numei hihpih, mou hihpih leh nu hitate’n ngaihtuah thakthak ni Pathian a ding in bangkim hihtheih ahi. Nu/ Pa teektate, a khanglaite lungsim bang in a omthei nawnkei uh chih a chiangsa ahi. Himahleh ngaihtuah kikkik mah dih… tua na dinmun na tuntheihna amau honkep leh etkol ziak ahi.Tuabanah tuailai zawdeuhte’n hiai ngaihtuah ni, pianna nu’ sihsan bang leng omkha ni, nuthak nei leng omkha ni, haksa sa leh lungngai, thawmhau kisa a kingaihsia a nute ngaih ngawingawi hun omkhathei hi. Nuthak (step-mother) i neihpen in i pa ang lumsak ahi chih phawkni, huai kia leng kipahthu genna tham ahi. Nuthak nei kei le’ng i pa lungzuanna ei a tate’n kineem zoulou thei ahi aw. Huan, nang leng na kum hong kibehlap zel di’a amau bang a teek leh vuai hun, hatlouh hun hongtung ding ahi chih mangngilh ngei ke’n aw. Amausang a ginalou zaw a leng omkhaktheih ahi. Huaiziakin nute it a pahtawina a phubang uh, tuni kia hilou, hunteng in pia in aw; tunung chiang in na hih bangbang nangtung ah hong kibawl kik ding ahi. Pahtawi a om na utdantak in Pahtawina pia in, tuabang a hihthei ding inToupa’n hon vualzawl hen!
