Nupa kitenna ah kitenma a imuh kholh louh thiltampi kitenna in a kentel a na om hi. Huaite tellou a nupa hinkhua leh inkuan piching leh phung ching thei lou ding pumpilh theih louh tamtak om hi. Himahleh khenkhat poimoh leng hihet lou napi theih louh man a en i laklut khak leh i va tawmlut khak ziak a buaina nei chih bang leng om hi. Puan neuchik a siatna om i ngaihsak kei leh a sawt chia lianpi hong suak a bawl theih nawn louh chih bang a buaina neu chik chikte a hun hun a sukveng ahih kei leh thil poi saupi tun thei hi. Nupa kal thu pen sum leh pai, nek leh dawn, silh leh ten, inn leh lou banah pilna siamna leh chidamna chiang bek toh na hoih pen tuan lou hi. Hau mah mah napi nupa kal nuam het lou bang, pil mah mah napi nupa kal chidam het lou chihte bang leng om thei lai lai hi.
NUMEI KHAT LEH PASAL KHAT KIGAWM:- Numei khat amah vuakin bukim thei lou hi, tuamah bang in Pasal a thahat mah mah in, pil zong pil, neih leh lam ah leng kitou delh mah mah ta leh zong zi a neih ma teng ompihbei a ching lou, a bukim lou hi ve ve hi. Numei khat leh Pasal khat hong kigawm chiang in sakhat hong suak in mi buching khat hong hipan hi.Zi ziakin pasal pen mi buching khat hong suah mah bang in Pasal ziakin zi pen zong mibuching khat mah hong hi thei hi. Nupa kichi pen khat leh khat a kitung ding tuah (interdependent) dingte i hih man un kidou bawl lou ding, kipanpih tuah ding, mohna leh khelhna omte aki ngaidam tuah dingte, akimaisak tuah pah pah dingte hi zaw hang.
KHELHNA CHIAMTEH:- Khelhna a nei lou ki om lou, a khial lou zong ki om lou ahihman in numei khelhna, pasal khelhna kichiamteh sak in, huai kum in, huaisan ah, huai thu ah chi a kichiamteh sak leh kiphul zel pen damna lampi hikha lou hi. Thil chiamteh a hoihna tampi om lai in khelhna chiamteh nilouh ding pen Pathian deih leh hoisakdan hilou hi.Heh nilouh leng hoih lou Laisiangthou toh zong kituak lou hi.”Na hehna uh ni in tumpih kei hen. Diabol leng mun awn sam kei un (Eph.4:26,27). Khelhna ki ngaidam in kihehsan nilouh kei leng nupakal chidam, inkuan sung nuam ding, tate leh midangte ading a zong hoih khawm vek zaw ding hi.Khelhna neu chik chik, meh thak leh thak lou, meh chi al leh al lou chih neng neng khong a zong kimohsak a kisel nilouh theih himah leh a nawn chiang in hihkhelh louh sawm ni ei chi a daih veng veng theih zong hoih mah mah hi. Kampau a khelhna, gamtat a khelhna, omdan a khelhna chihte a om thei vek himahleh a om louhna ding a pan ilak ding zong nupaten tup a i neih ding uh ahi. Kingaihdamna hoih in manpha mahleh zi hiam pasal hiam ngaihdam ngai a i om gige leh bel ngaidamtu a ding a lungkhamna tuntu kihi thei ding hi. Laisiangthou mah in “Kithoihna sang in thuman a hoih zaw” (1Sam 15:22).
DIK KISAKNA:- Dik kisakna tuh kisak theihna ahi a, melmapa Setan in a vanzat hiam mah mahte lak a khat michihte pukna ahi. Dikkisakna ah tuh kingaihniamna leh thunuailutna in mun a nei kei a tung nun kituhna leh chinzaw, siam zaw kisakna ten a luah dim zaw hi. Hiai bang mun ah tuh Ngaihdamna a om thei kei a, kilemna, kideihsakna, kihehpihna leh ki-itna chihte leng a lengla ngei kei uhi. Amah gente kia dikdan a kingai mi kiang a om tuh mi a zong sang kei ua, a theisate a lengla nawn nuam kei uhi. Midang teng mohsa mahni kia dikdan a kingaite houlim leng min sawtpi a ngai nuam khol kei uhi. Huai sang in nang mah mah na hoih, nang na fel, nang na hat, nang na pil, chi theite min a ngai.Huaijiakin nupa kal ah leng a hoih lam kipe tuah thei in asia om hun ah leng kingaidma tuah zel leng a hampha, a nuamsa, nupa kithutuak, nupa kituak,nupa kilem, nupa kipak, himai ding ihi uh.
NGAIDAMTU A PANG:- Thuphatawi, ngaihdam nget chih khawng in a gen nop tuh “Mikhial ngaihdam ngai ka hi” chihna ahi mai hi. Hiai dinmun tuh dinmun uthuai het lou ahi, himahleh tuabang a thuphatawi ngai khop a khelhna nei hinapi a ngaihdam ngen nuam lou leh thuphatawi nuam loute tuh dan bang a vaihawmni chiang in a khase thei kei ding uhi. A poimoh mah mah khat i mangngilh louh ding ua deih huai tuh kehlhna lian leh khelhna neu khatpeuh himahleh a ngaidamtu a na pan theih leh mi hampha pen, mi enhuai pen leh mi thupi na hi ding hi. Kiliausak ek khawng, kigap ek khawng in mi a bawl hoih kei a KINGAIHDAMNA IN MI BAWL HOIH ZAW HI. Mahni zite chiat leh mahni pasalte chiat toh Pathian in Khrist a hon ngaihdam bang a kingaidam tuah thei chiat ding in Toupan hon vualzawl hen. Nupa kituak leh kihouthei i chihte a kina ngei het loute hilou in a kingaidam pah pahte hi zaw uh.
