Tukha a EBCC Saptuam’ thupi paipih, ‘Nupa a Kipumkhatna’ ahi. Pathian in Eden huan kem leh veng di’n mihing masa, Adam, a bawl zoh in mohpuakna pia hi. Adam, amah kia a a om ding hoih salou in Pathian in a kithuahpih di’n ama’ nakguh mahmah apan Evi bawlsak hi. Amau gel kia kinoutuah maimai ding leh awl-om den dia a bawl hilou.
Eimah kia a i om ding Pathian deihdan hilou hi. Pung a leitung luahdim dia Pathian’ vualzawlte hi hang. Khempuk in Evi a om chih i thei hi. A pasal leng khemzoh in om a; khovel ah hamsia tun uhi! Nupa kichimat a i om a, khemna i tuah chia’n leng malpan lou a, i pankhawm poimoh hi.
Khemna a na nan zohlouh ziak un Eden huan bit nawnlou in, amau mah leng Eden huansung a teng thei nawnlou dia hawlkhiak in om uhi. Nau a paai un leng a ta uh khialsa in piang a; pasal suan a piang himhim khelhna in hon zelsuak dimdem hi.
Nupa kichi pasal leh numei apan bawlkhiak hi a, i Laisiangthou ah nupa kipumkhatna pen Khrist leh a mou (mihingte) kizopna toh tehkhin hi. Innsuan a ‘nupa’ hite; innsung nu leh pate, i mohpuakna a letdan mai maw! Adam leh Evi in a mohpuakna uh zoulou in hamsia suak uhi. I innsung chiat uah tekpi-tekpu, tate leh pianpih sanggamte a di’n hamsia tuntu nupa i hihkhak ding pilvan ngai hi.
Nupa a Toupa pahtawikhawm hinkhua zang a, Pathian adia tate i latkhiak pen a zohna hilou in mohpuakna taktak la dia Pathian mai a i thuchiamna hi pan hi. Pathian’ gawmsa nupa pen eima’ noptalna a kizangbei mai di’n Toupa’n hon deih ding in gintakhuai lou hi. Nupa a pangkhawm a thil thupi semkhe dingte hi hang.
Thil thupi i chih chia’n neih-le-lam ah a voutuam banghiam tungkhia a, lamkhe ding chihna hi pahlou hi. Pathian’ vualzawlna - i tate lamdik a pi, sinsak leh makaih ding a mohpuakna leh hamphatna i tante zangkhial lou dia i pilvan kisam hi. Nupa a i mohpuakna i tate tung kia ah hilou in hon suangtu i nu-le-pa hat nawnloute tung ah leng hi mahmah lai hi.
Mohpuakna liantak nei i hihlai in Pathian’ hon koihna tan tunglou i hikha hiam? Mite’ etton tham dia i nupa hinkhua i om zohlouh mai hilou a; ei nupa kal mahmah leng kilem loupi a om i hihkhak ding kivel ni. Innkuan bawlkhe dia i kipat chiillai a Pathian mai a nupa kal a i thuchiamte enkik in pan thak i la thei diam? I tate lampialkha a omlehleng lamdik a pi di’n pan i lathak thei diam?
Ei nupa a hisa hileh, i tate toh pangkhawm in, innsung pak-huan kilawmtak bawlkhia a, gimnamtui Toupa ma tungtousak di’n kisa thak ni. Toupa’n hon vualzawl chiat hen.
[Sim beh ding: Gen. 2:18-24; Mal. 2:14-16; Pau. 5:18-19; Matt. 19:5-6; Nas. 5:1-11; 1 Kor. 7:2-5; 1 Kor. 11:3; Eph. 5: 22-33; Kol. 3:18-19; 1 Pet. 3:1-7.]
