Manipur simlam singtang mite lak a Tangthupha hongtunni, Missionary Day hon pitungtu Toupa Jesu min in Saptuamte chibai.
Pathian in A’ mi Israelte, Kanan gam a tun chiang ua a tate uh ahilh zel ding ua thupiak a neih tampi om hi. Huaimah bang in Tanchin Hoih ziak a mimal, innkuan leh khotang khangtou leh masawn a i om chiang a leng i mangngilh louh di’a deihhuai thu kikum leng I chi uhi.
Nunglam Etna:-
- Sabiak: Pathian hing thei nai louI hihman un I pi-le-pute’n ana biak uh, Liandou pusa 'Sumtawng' bete I hi uhi. Dawi-le-kau i lau ua, sikha tangthu tampi a neite I hi uh.Singlubul/singlutawng leh singgophel, singpiandang, dawp leh chiktui peuh lau a ganta toh a bete I hi.
- Inn Bawldan: Akhuam singgil, atuang leh a bang gopek/maupek, atung di’a bi/inn-nah leh maupek khawng zang. A liang niam,tohlet omlou, innsung sun (day time) a leng mial khemkhum khawng, meivak det ding nei lou, taptung a thukkhuk a mei kichih lou ngal adang omlou ahi.
- Nek Zonna: Kumteng a lou mun kituan vialvial, huaia buh, taang, vaimin, bal, malta, dum,mim, meh di leh nektheih chi tuamtuam chiingte I hi. Huaite, zu leh va toh kituh, kum khat kham a nei zoulou tampi ki-om lai. Louma a piangte mah sum muhna di’a zuak, adang muhna ding om lou.Zuak nop omleh leng a lei di om lou, sum tawm lua.
- Silh-Le-Ten: Tulai dan a puan deihdeih lei chih bang om nai lou. Nupite’n patlei bawl, patbawl, khaukhek, siamgaan, huaite mah sunpuan-zanpuan di’a zang. Numeite’n naa dang tampi toh sem khawm ahihman un puan a kidaih zihziah ding gaan man lou uhi.Nungak omna khawng lou te’n zanpuan a lumkham uh neilou uhi.
- Damlouh Hun In: Damdawi mu ban nai lou, doctor leh nurse chih te leng singtang a om nai lou. Natna tengteng Siampu in thoih. Kithoihna di’a gan nou poimoh ahihman in, huai bang nei loute kithoih zou lou hilai. Huaiziakin huangvulh ganta, aneupen a Ak, Ui, Vok chihte bek neih teitei sawm uhi.
- Kikawmtuahna: Khua leh khua kisimtuah zel uh ahihman in kikawmtuahna lampi hoihtak bawl khollou uhi. A kibawl sunte leng lampi neuchik, asuk leh atou tam mahmah hi. Hoihtak a etkol ahihlouh man in lampi kuul, vot tam, gul tam,gamsa lauhuai zong tam hi.
- Siamsinna: Tulai dan a Skul kai a laizil chih bang om nai lou, ahong let chiang ua, nitenga lou kuankuan, nasep sep himai. Pathian thu-awi om nailou ahihman in Nipini a leng naa seem uhi.
Hiai bang dinmun haksa leh tawlhuai tak dinmun a om ei singtangmite, Tangthupha(Gospel) May 7,1910 in i tenna gam uh simlam Manipur, Senvon khua puaktung in hong-om hi. Huai gahsuah, tu in Khalam hotdamna i tan banah salamah leng dopkaang a om in, India khopi a nekzong, siamsin leh innkuan a mahni-inn a teeng tamkhop i om theihman un kipahhuai I sa hi.
Tuabang hamphatna, tampi i tan lai in, hiaitan a hon pitu, hon domkangtu Pathian mangngilh leh A thupiak gol "NUNGZUITE BAWL UN" chih khawng limsak lou a i om khak ding lauhuai I sa hi. Nidang sanga pilzaw, siamzaw, hauzawta i hihman un Toupa aa ding tampi seemthei, tampi pethei ding hitate kiveel in Toupa’ thupiak zuihna leh thumanna ah midangte adi’a ettontham ding in kisa ni. TOUPA’N, nang leh innkuante hatna apan hat nawn seemna muvanlai tha hongguanta hen!
