Huai hun chiang in van gam tuh nungak siangthou sawm a khawnvak uh tawi a mouneipa dawn ding a pawtte toh teh ahi ding hi. Huchi in a lak ua nga a hai ua, nga a pil uhi.
Mat. 25:1-2
NUNGAK 10TE KIBATNA:- Nungak sawm mouneipa dawn ding a kuante a kibatna tuam tuamte uh:-
NUNGAK 10TE KIBAT LOUHNATE:- 1. Sawm lak a ngate pil uh a, a dang ngate bel hai uhi. A pil leh a haite zong a mel uah kithei tum lou in, a gamtat khohei leh a lampai dan uah kithei khen tuan lou hi. A haiten a khawnvak uh tawi napi in a um ah a tui a tawi kei uhi. A pilten bel a khawnvakte uh tawi in a um ah a tui leng a tawi uhi. A haite khawnvak mit ding a kisa in a pilte kiang ah na khawnvak tui uh hon pesam un; ka khawnvak uh mit ding in a kisa a chi uhi. Himahleh a pilten, a hiate kiang ah “kou leh nou adingin a kiching kei ding, a zuakte kiang ah pai unla, lei zaw un chi in a dawng uhi. Huan lei ding a apai mang kal un mouneipa a hong tung ta a, huchiin a mansate amah toh kitenna Ankuang um ding in a lut ua, huan kong a khak ta uhi. Midangte a ding in kongkhak kihong nawn ta lou hi.
Huai nung in nungak siangthou dangte leng a hong tung ua, Toupa, Toupa hon hon in” a chi uhi. Himahleh a man chih tak tak in ka hon hilh ahi, ka hon thei ngei kei” chi in a dawng hi. Huaiziakin kiging un a ni leh a hun na theih louh ziak un. Gingtu Khristiante i niteng khosakna leh nekzonna ah, lawm leh vual iki pawl khawmna leh khosak khawmna uah gingtute a tak leh a lem i om khawm ta dih uhi. Kilamdan luatna leng a om kei,Biakin i kaikhawm nai nai ua, Phatna la leng sakham, thugen leng za khawm, tutna vual khat a tukhawm, ipai hun uh leng kibang lai ahihman in a lung hihmoh huai nai kei hi. I tenna mun leh I khosakna mun thu ah leng kilamdanna bang mah om lou in kibang vek hi.
Himahleh, huai ni leh hun thu Pa kia lou ngal kuamah in, van a Angelten leng, Tapa in leng a thei kei uh. Noah damlai bang in mihing tapa hong pai nawnna ah ahi ding. Huai ni tuichim tun ma in, Noa long a a lutni tan in, a ne un a dawn ua, ji leh pasal in a ki nei ua; Tuichim a hong tung a, a vek ua a lakmang masiah bang mah a thei kei uhi; Mihing tapa hong pai nawnna huchi mah bang ahi ding. Huaiziakin kiging un, bang ni in a hia na Toupa uh a hong pai ding na theih louh ziak un. Himahleh hiai thei un guta a hong pai hun ding inn neitu in thei leh, a veng dia, a inn a phenvang sak kei ding hi. Huaiziakin nou leng kiging gige in om un, na gin louh dak un mihing tapa a hong pai ding ziak in.
JESU HONG PAI NAWNNA:- Jesu kipahman pe dia a hong chiang, Sunlai hiam zan lai hiam in, i meivak bawlsa vek a naom in; Kiging san a hon mu diam ? Jingkhang pi khovak man zong hong pai thei, khat khat in hon sam in chin; Toupa kiang i nasep i piakkhawm chiang; Nang kiang hih hoih hon chi diam ? Hon gintak bang in i na om na hia ? I theihtawp i suah na hiam ? I lungsim in hon siamlouh kei a leh, khawlna thupi i tang ding. Toupan kiging a a muhte hampha, A thupina tang ding uh, Sun lai hiam zan lai hiam in hong pai leh, kiging san a hon mu diam ? Aw manta ung i chi thei diam unau, Laukha inn lam zuan ding in; Toupa hong pai chiang nang leh kei man san, man san, Amah ngak in hon mu diam ? U nau nang leh kei a kikhel ma in kiging sa a om sawm in, zekai luat ziak dahna om thei hi.
THUKHITNA:- Genkholhna thute niteng in hong tang tung zel zel a, chiam pellou vanglian tung Pathian hong pai nawn ngei ding hi. Nungak sawm mou dawnte lak a ahai ngate bang mai a gim huai teng thuak, a tawl teng si lel ihih louh na ding in ginna ah i omna hiam chih eimah leh eimah na kivel chian zel zel leng hoih ding hi. Kikem siangthou in, i meivak tui Khasiangthou a dim in om ni.
