Tukum 2020 thupi “Kemtu muanhuai” khen nenna May kha ading a “Nu leh pa tekte kemtu muanhuai” chi tuni a gen ding in k’ong kisa hi. Hiai toh kisai heutute’n a ngaih poimoh uh, gen di’a hon luikhiak uh- Nu leh pa a tek chiang ua simmoh louh ding, zahtak a duat tak a kep ding, I gam ah nu leh pa tekte chimtak, khase tak leh kisuanglah tak a koih tam deuhdeuh a theih ahi.
Tek tan hon dampih nu leh pa a neite khovel a mi enhuai, ut thu a tun theih hilou hi. Khenkhatte’n a nu’ mel theilou, a pa lah mukha tuan lou chih bang, nu-le-pate’n a sihsan tak bang, nu leh pa a na kiteng lou himhim leh nu leh pa ana kikhen kha chih bang om theihna khovel a, kep ding nutek-patek a neilaite’n I na hih sasa uh himahleh hiai anuai a bangin kikum lai leng chi I hi. Kum hong tamta,lungsim, tha leh ngaihtuahna a leng hat nawn loute dimun tamlou:-
1.NGAKLAH: A ngaklah uh tampite lak a, adiak deuhte – Jing thohkal leh annekkal ngaklah diak uhi.
2.GENSA GEN TUANTUAN: Agensate uh leng gen ahihlam uh thei nawnlou in gen tuantuan kha uhi.
3.THU THEINUAM: Khozakna hoih nawnlou, mit chiim nawn lou, chiamtehtheihna a ngei bang nawn lou ahihmana, thei nuam a thu na kan a mi a dot chiang un, “pitek/putek thukan” suak sek uhi.
4.THIL MANGNGILH HAT: A theih ngal uh a gen-gen pawl uh om mahleh atam zaw ah mangngilh hat uhi.Atate, a tute nangawn uh sam khial khial banah, a min mah uh zong mangngilh theilai uh.
5. NEKTHEIH DUH UHI: “Mi hong upat chiangin naupang kik uh” a chih uh a dik mah hi ding,nektheih, muankhum peuh duh, ana selgu thei, pekha kei le’ng na nuak bang a zong om theilai uhi.
6. VAKKHIAK UT UH: Lawm ngai mahmah uh ahihmanin va pawtkhiak bang, lawmte toh vakithuah leh houlim bang ut mahmah uhi.A lunglutna uh kibatpihte ngainase lai uhi.
1. NEK-LE-DAWN AH: Amau nektheih ding a neem, a mindeuh leh a chiiklua hilou banah a deihdan uh dong in, huaidan in hihsak leng kipak diak ding uhi. A ut nak ua leh an umpih lai leng hoihseem. Ankuang a lungkim nuam penpen a, tate zong pi leh pute it ding sinsakna chi khat mah ahi.
2. SILH-LE-TEN: Amau kihah zou nawn loute silh-le-ten, asun puan, azan puante uh zong namse man lou in koih le’ng, a kemtute ading a nuam zaw thamtham ding hi. I neihliai leh athak leisak hun bang zong i neih ding ahi. Sihnunga puan thak tampi kisilh sak sang in damlai mah in hih le’ng...
3. SILSIANG HUN NEIHPIH NI:Khenkhatte kisuanglah, sawm ngam lou, amau sawm ma na-ngawn in en sawm in sil zelzel le’ng hong damthei ding, hong namse lou ding ua, ei adi’a nuam ding hi.
4. BIAKINN KAIPIH: Pawtkhe zoulai bang ahiha, ama’n a ngap nakleh Biakinn bangzong kaipih zelzel leng hoih mahmah ding hi.A kha uh muang in a lung uh nuam di’a, “Nang mahmah” honchi chi ding uhi.
5. DOCTOR ENSAK ZELZEL NI: Mun lemtang a om bang i hihnak leh kum khat in khatvei bek bang Medical Check-up neihpih in amau toh kituak damdawi doctor tungtawn in pezel leng kipak mahmah ding uhi. Nu leh pa tekte kipahna mah ahi vualzawlna; innkuan sunga kep ding pitek-putek om manlou a i omkhak ding ahi thillauhuai. Pathian hamsia dong kha hihtheih ahihman in.
Toupan honpiak gam leh leitang, inn-le-lou, sepna-bawlnate a hoihtak a i lamzan a, i nite a sawt theihna dingin, a hon thupiak bangin i nu leh pa zahtak lehang, ei adingin ahoih di’a, innsung nuam,innsung manpha, vangam chiamkhol,hithei chiat dingin Toupa’n hon vualzawl chiat hen!
