"Nanu leh napa zahtak in, Toupa na Pathian in honpiak gama na nite asau theihna dingin"- Lev.20:12
Mihingte’n i lunggulhte laka khat tuh damsawtna ahi. Nuam I sa hia, i genthei hia… sih utbel ki-omlou ahi, chile’ng genkhial di'n kaki-umkei hi. Khatvei Lamka a EBC biakinn khata kavakikhop leh mi upa simtak khat in thugenna neia, hichi'n chi hi: "Kum 85 a upa kahita a, ka mabantuh sihdi himai hia… chih kangaihtuah chiangin kanak utkei lawtel a...!" Kum 85 tan dam nunga sihdi utnai deklou I chihchia'n kuapeuh damsawt ut ahihdan achiang hi.
Ahihleh, damsawtna di’a bang poimoh hiam chile’ng, i Laisiangthou tangtel in chiantakin gen hi. Nu leh pa zahtak kichi bangmah gen/kum ngamlou houpih ngamlou chihna hilouin, thumanna leh amau ahihna uh kepbitsak chihna lam hiin kaum hi. Nu leh Pa ahihna ziak ua atandi ua kilawm zahtakna toh kepna, khasiat saklouh chihna hidi’n kaum hi.Paunakte 23:22 ah,“Nang honsuang napa thu ngaikhia inla, a upat chiangin nanu musit ke’n" achi hi.
I society I et-et chiangin nu leh pa tekte zahtakna toh kepna kitasam deuhdeuh hia theihin om hi. Eilakah leng, koppih suun, teknung-vuainunga bangdi’a ji khawng neithakthak uh ahide aw chihkhawng ka ngaihtuah chiangin tate/moute in I kep hoihlouh ziaka amau kemtudi zongmai ahidi uam chihin om hi. Pa khat atate’n chiamnuihin, "Kanu sileh jithak nanei dia’m, pa?" chia adot uh leh, apa un thil khat lehdot in,"Ahihleh nanu sileh kei hoihtak in n’onkem utdi ua'm? a chi, chiuhi. Putek chiloua ji neithak I chihte, numei-pasal hihna lama kiphatmoh luatziak le hipilou, ittudi, kemtudi neilou a bitlou (insecure) kisak ziak himaithei hi.
Ka omna lui khua khatah, Old Age Home khatah khatvei kavavaklut hi. Catholic sister te etkol ahia,pitek-putek 100 lam kem uh hi. “Sister bang achia-a hiaite nakep uh,” kachihleh,“Hiaite maw, atamzaw, a’ tate un hongkhak uh ahi.Khenkhat, atate’n a hawlkhiak uh, khawlai khawnga kalaak uh ahi” achi hi. Khristian tamna state mah ahi. Huchibanga kakihoulai mahun pitek khat hongsi hi. “Ahihleh, asih chiang ua atate’n hongla uh maw?” kachihleh,“Tawmchik inzaw honglana ua, atamzaw thamte koumahin kavui uh,” chi hi.
Ahihleh, unaute, nu leh pa damlai, kepdi nei nahi hia? Koiah, bangchi’n nakem a? ‘Khopi khawnga omzoulou ua…’ chih paulam lemtanga nei-a ngaihsak khollou, innlam zinchi’a le, a lamet bangua vaveh khollou, lawm-le-vualte kiatoh hun vazangzel maimah I hi hia? Itna leh zahtakna angahdi banguh ngahun nathei hia? Khasetaka sihdi ngaak, leitung chimtaak ngoihngoiha koihkha I hizaw hia chih kingaihtuah ni. Abul a I taklat, thuchiam theisiam leh zuite hidi’n simtute T0UPA’N hon vualzawl hen!
