Pathian thu tunna innkuan ahi uh: Noah damlai in khovel ah mihing a mau innkuan kia ahi kei uh chih I thei. Khovel ah innkuan tampi om himahleh Pathian thu tunna innkuan ahih uh ngaihsanhuai ka sa mahmah in ka eng mahmah hi. Unau, nou innkuan in Pathian aw na za ngei uhia, za ngeisam napi a athu manglou na hi uhia leh? Noahte innkuan in chu Pathian thu a awi ve uah.
Long bawl ding in thu mu uhi: Tuichim a pat bitna ding in Noahte innkuan in long bawl ding in thu piak za uhi. Huai long bawl ding kha, ni khat ni nih sunga zoh mai ding leng hilou, banah amau innkuan a ding chauh hilou ganhing tampi tattheih nang bawl ding ahi. Eilawi bel Quarantine mun ding inn bawl sa om, inn bawl a buai ngailou. Noah in maw ganhing tampi omtheihna ding long a bawl a, huai kia leng hilou a nek ding uh kaihkhawm sakvek lai zaw-mah. Noah leng chu buai thou in teh. Nou innkuan in mibang zah a ding na kepzou un huhna bangzah na pia khia zou uale…
Noah in nekding a kaihkhawmte’n daih: Tuichim om hun sung ding hisap thei chiah kei mahleh amau innkuan nek ding ban ah ganhingte nek ding chituam tuam kaihkhawm sak. Thupi nasa hia. A kaih khawm an te un lockdown hun sung teng daihchet ahi ding, nek ding om nawn lou chi in complain bawl kei ve uh aw. Meithainu tanghou leh sathau beilou toh kibang na e maw. Pathian in a vualzawl a ahi chih hipah lou, vualzawlna a tan ma un hih khat nei masa ve uh aw. Na thei hia?
Thu mang uh ahi: Lohchinna leh vualzawlna I tan theihna ding un thu man poimoh mahmah hi. Thu mang thei ding in chu thu pia pa muan ngam/ gintak leng poimoh mahmah hi. Sapte pau khelzual le: Do ordinary, God will do Extra-Ordinary for you. Do natural God will do Super-Natural for you. Do possible God will do Impossible possible for you. Kemtu muahuai chi a biakinn sung a gengen napi muanhuaisa lou thak zel I hi uh hiale. Na muan zahzah in Toupa thupina na mu ding hi. Huai sang a thupi zaw in leng. Noah in a septheih teng a seem a aban bitna leh kepna Pathian kemtu muanhuai khut ah. Meithainu’n a sep theih tenga seem a, aban vualzawlna Pathian kemtu muanhuai khut ah.
Noah long khongkhak khaktu Pathian ahi: Thumang taka Noah in long abawl zoh in, nek ding a kaihkhawm tengteng long sung ah la lut vek hi. Ahihtheih tawp ahihnung in, bangtan a sawt ahi de aw, nek ding ka kaih khawmte’n a daih mahmah kei di chi in lung buai vetlou hi. Amah kemtu a muanhuai tel a ka. Amau innkuan leh ganhing tampi a lut khit chiang un Pathian in long kongkhak khaksak hi. Pathian in a khak ziak hi’nteh long sung ah tui lut chih complain omlou hi. Unau eite leng I innkuan kongkhak, I Saptuam kongkhak leh I Nampi kongkhak hon khaksaktu Pathian hisam leh bithuai na maizen inchia maw. Hiileng apan bitna, khovel khelhna apan bitna, salam leh khalam a I bit chiat theihna ding un thumangtakin Pathian kemtu Muanhuai khut a kikem sak chiat ni.
Long kongkhak hong ding in Toupa mah hongpai kik ding hi: Noah long kongkhak hong ding in Pathian mah hong pai kika, long khongkhak honsak hi. Longsung a omte khamuang leh kipaktak leh bittak in hong pawtkhia uhi. Hiai pulnatna hiileng bei chiang in Toupa’n I kongkhakte uh hon honsak nawn dinga, innkuan kongkhak hong kihong dinga, Biakinn kongkhak hong kihong nawn chiang in bangzah bit in I om ding uam maw. Ahihkeileh hiai khovel buaina hiileng, nat-le-sat, lungkham buaina thuak nawnlou ding a a misiangthoute la ding in Toupa kongkhak bul ah a dingta hi. Kong hong dinga kisa ahita ding. Unau, tangtawn kongkhak leng hong kihong pahta ding hi, A hong kihon hunhun chiang a hiai khovel chimtakhuai pawtsan thei ding in na kimanta hia. I innkuan kong, I Saptuam kong leh I Nampi kong hong ding in kongkhak bula a dingta. Tangtawn kongkhak leng hong kihong pahta ding. Kongkhak hon a hih chiang in kuateng bit in I om di uam maw.
