Lou kuante, office kaite, gam kuante leh kholai pot khete teng teng in nitum kuan chiang in inlam zuan in pai diam diam zel uh a, tua pen vaipai kichi hi. Tua bang a lou kuante, office kaite leh nasem a kuankhete ngaklah mah mah khat tuh vaipai hun ding ahi. Huai bang ding a ngaklah huai hiam i chihleh sun nilouh a, a sepgimna uapan khawl tawldam ding, inn a nu leh pate kiang, Ji leh pasalte kiang, tate tute kiang tung ding, a mau leng a ngaih mah mahte uh leh amau ngak lah tak a na ngakte kiang tung ding ahihman un kithalop in ngaklah mah mah uhi. Mi nute mi pate vai tung diam diam lai a ei nute ei pate vai hong tun zok kei uh leh i kah tha peuh na suak man hi e i naupan lai khawng in. Vaitun chiang a nuam pen pen zaw naupang honna ngaklah mah mahte mai tang muh mah mah nuam pen. Vaitung ding nei leh in a honna ngaklah mah mah inkuanpih a neite mi enhuai leh hampha mahmahte ahi uh.
Vaipaiten inn a ding poimoh tuam tuam sing bang, gua bang, meh ding, hai a hong om chiang in nektheih chi tuam tuam: tangmai vaimim,dawnpawl, mazel chihte khawng gimtak in hon pua ua, inn a omte toh tuate nekhawm zel uhi. Vaikuanten vaitun ding kal a ngaklah uh mah bang in, inngakten zong vaikuante hong tun ding ngaklah takin na galdot sek uhi. Tulai in nidang a singtang a lou ikuan dan hinawn lou in, khopi ah Office kai tuh i vaikuan na ahita hi. Niteng a office kai a kuan, khenkhatte iji leh tate inn a nusia, theih ngeilouh lak a, potna ding leng om lou, hong pawt ding, hong lengla ding leng om tuan louhna mun a khosa ihita uhi. Na tun ding kal hon ngak lah mah mah na ji leh tate, na pasal leh na tate muh kal nang na ngaklah sam hia ? Papi tamtak vai tun hun a leng tung lou, koilam hiam a bang koi koi, atun chiang a zong kisuanglah het lou a hehsa a tung bang, a ji leh tate nangawn in a tun ding a ngaklah het louh uh bang om thei hi. Tuamah bang a pasalten inn ngak muanhuai hiding leh ginomtak a na om ding a lametna toh a nutsiat uh numei khenkhat pasalte omlouh kal a lengla hoih lou leh deih huai ngel lou khawng na nei kha zel bang om theih hi. Hiai bang thu leh hiai bang thil inkuan sung a om louhna ding in nupaten Pathian bel in amah kikemsak ni, muan huai pen bit pen, tawldam pen pen hi. Na ji ading a na ginomna thuchiam mangngilh ngei ken, na pasal a ding a Pathian leh theihpih mite mai a thuchiam na bawl, na palsat leh a pap na thuak zou kei ding hi.Na pasal in vaitun chiang a na mel kilawm leh na maitai, na aw nem muh leh zak ding a ngaklah mah mah ding khop in a tung ah siam lechin, koi mah ah hong bang man lou in nang kiang mah hon naih pah veng veng ding hi. Niteng a vaidawntu leh vaitungte kilim bawl tuah in kithupisim tuah leng khovel a mi nuamsa leh hampha pente himai ding hihang. Vaipai ding hun i theihna ding in nungzuite kiang a Toupa Jesu thunutsiat leh a sinsakte en kawm in tulai thiltungte toh bukkak leng pilvanna ding om hi.
Toupa Jesu kiang ah a nungjuite a hong pai ua, amau teng kia om lai ua nungjuiten Toupa Jesu kiang a a dot uh – “Na hong pai na ding leh khovel tawp ding chiamtehna bang ahi dia ? hon hilh in a chi uhi. Nungjuite mah bang a eite theih nop leng hiai mah tuh ahi, Toupa Jesu dawnnate en leng:-
1. Kuamah in a hon khempuk louhna ding un pilvang un,
2. Mi tampi ka min in a hong pai ding ua “Khris ka hi” a chi ding ua,tampi a khempuk ding uh.
3. Kidou thu leh kidou thuthang na za ding uh, na lungbuai louhna ding un pilvang un.
4. Nam leh nam a ki dou ding ua, gam leh gam a kidou ding uh. Mun tuam tuam ah kial a ke dia, hite a leng dia, zin a ling ding hi. Hiai teng teng nauvei kipatna ahi.
5. Huai hun chiang in gimthuakna ah a hon pilut ding ua, a hon hat ding uhi.
6. Ka min jiakin nam chih huat in na om ding uh
7. Huai hun in tamtak a puk ding ua,khat leh khat akimansak tuah ding ua, aki mudah ding uh
8. Jawlnei tak lou tamtak a hong potkhe ding a, mi tampi a khem zou ding uh.
9. Dan bei a gamtatna thupi mah mah ding ahihman in, mi tampite itna a dai ding.
10. Himahleh a tawp dong a thuak mualsuah zou peuhmah Hotdam in a om ding.
11. Huan, nam teng teng kianga theihpihna hiding in hiai lalgam tanchin hoih khovel pumpi a gensuak ahi dinga, huai khit chiangin tawpna a om ding (Mat.24:1-14)
Vaipai huna lungnuam tak leh maitai tak a tangtawn mun zuan thei ding leh i tunna ding pan zong “Sikha hoih leh muanhuai na hih hoih e, napu kipahna ah lut in” hon chih za tu hithei chiat ding in Toupan hon vualzawlta hen.
