Niteng Ka Nekkhop uh Ann Honpia In

I Toupa Jesu Khrist in nungzuite' kiangah thum dingdan sinsak, huaimah ei gingtute'n leng “Toupa Thumna” chih a I theih uh ahi. Kisinsak le hisam mahleh, zak mun ziaka theih hizaw sim chiat ding in um ing. Ahi a, hun bangtanhiam apat hiai Toupa Thumna thumal/ i thumna thumalte un ngaihtuahna tampi leh thuktak honluah hi.

Kikup utna thuvual ah lutpah le'ng, Matthai 6:11 ah, “ Tuni in ka nekkhop uh ann hon pia in” leh Luka 11:3 ah, “ Niteng in ka nekkhop uh ann hon pia in", chi hi. Hiai thumna thuvual, kei mimal in ka na etdan leh zatdan in, gilvah a nek ding kiningching salam ann ngetna leh ngawllou in hon koih in, chihna in ka khe/ kaai nilouh hi. Ahihhangin, hiai a “ann” pen salam ann nek ding hizawlou in Khalam ann gen ahih dan Pathian’ houpihna kammal ka saan ahi.

1. Matthai 4:4 & Luka 4: 4 ah Jesu’n, “Mihing tanghou kia in a hing kei dinga, Pathian kama thuchin pawt in a hing zaw ding", chi’n setan khemna douzou hi. I hinna di’n salam ann i poimoh ngaih ua; ahihhangin tangtawn daih ding hinna, khalam ann ngen in Pathian i buan uhia? Pathian kama thuchin pawt A' Thu Siangthou gilvah ding khop limtakin i ne/ dawn uhia? Niteng i nekkhop ding khalam ann, thumna leh Laisiangthou sim in zong peuh le'ng, i gilvah ding khop niteng in honpe ngeingei ding hi. Jesu’n nungzuite toh nitak annkuang nanung a umkhawm lai un, tanghou leh ua-in te nek ding in pia, huai tuh tatna nna A sep ding huai mah i hinna di’a nek dinga a luikhiak etsakna a ahih ahi. Hiai Jesu' hong tatna gospel mah i niteng ann ahih a, hinna di’a i nek gige ding ahizaw. Salam ann nek ding ngen gige a, khalam ann ding ngetna chang theilou I hihlouhna di'n pilvang ni.
2. Johan 6:25 – 58 sungah mihingte'n khalam ann sanga salam ann i poimohngaih dan uh muhtheih hi. Tang 27 ah Jesu’n mipite' kiangah “Ann mangthei phet zongin phiaphia kei un, Mihing Tapa in a hon piak ding zong in phe zaw un;....” ana chi hi. Huai ann zon ding pen tuh tang 51 ah kimu, “ Keimah tuh van a kipana tanghou hing hong paisuk ka hi, kuapeuh in hiai tanghou a nek leh khantawn in a hing gige ding,......” na chi nawn hi. Huaiziakin, i thumna la ding uh niteng nekkhop uh khalam ann nget chihtaka nget kul ana hi ahi. Leitung damsung lel daih ding salam ann kia ngenngen a, tangtawn daih ding hinna tanghou honpiak ne utlou I hihkhakleh i thumna la le'ng Pathian mai a pomtak leh gimnamtui a zamtou lou kha ding hiv’aw. Tua ziakin, salam thilte kia a lungsim nga a, ann mangthei phet zonga phiaphia mipi sangngate banga salam gilvahna dingtan delha thuma Pathian zongte i hihkhak un zaw, gilkial-dangtak ni hongtung dinga, lah ana kikhelman kha ding.

Thukhitna

Niteng nekkhop ann hon piak, thu-le-la leh Pathian' houpihna kammalte za thei, saang thei ding in Amah kiang'h kitu-lut ni. Pathian in chiklaipeuh in michih lam tuamtuam ah houpih a, zak theih ding in A’ aw suah gige hi. Ahihhangin, mihingte'n Pathian aw zatheilou ding khop in Amah gamlat i na hizaw naak uh. Neulai in nute/pite'n ann-nek ding kuan in gamla pipi apan aw neihteng toh hon galsap chiaichiai zel uh. Ahi a, gamla-le-nai pen, ei a khawlak pawtte' omna zil ana hizaw naknak. Tuamah bang in, Pathian houpihna leh sapna aw zaphalou ding in bangzahta in i gamlat ua, chih kidot hun ahi. Pathian’ aw za theilou ding khop in khelhna ah i bual thuklua uh ahikha ding. Pathian houpihna mimal chih in mahni a tek zathei ding in lungsim ana awlthawlsak chiat ni.

Muh baih di’a a omlai in Toupa zong unla, a nailai in sam un. Sam 55:6

….

NOTE: Thugelh Tomkim honpetu Lt Col. Pa Songlianthuam @Thuampi, Srinagar (J&K) posting tang ahi. A ji leh tate, Mahavir Enclave ah khawsa lel uh.  Pa Thuampi in DEW/ GC adi thugelh ana pe zeuhzeuhta. Lungdam hang. A thugelh piak nanungpen sim theihna link:

https://blog.ebccdelhi.org/aw-khristmas-na-gim-daibang-thengta-hiam-2/