Khovel vaihawm kumpi tampite lak ah thuneitu hihna khelah, ut tun tun, amau hun bei nung nangawn a, a ban ua dingte kiang a thuneihna chidam tak a pekhe nuam lou hong tam ta hi. Hiai in nambing, khotang hon pehsawn a, nam neu leh tuantualte lak ah zong heutu dinmun deihna hong uang mah mah hi. Dan tawitu leh danbawl pawlten amau utna leh lunggulhna suk tangtunna ding a dan hon bohsiat chiang un gamdinmun tuh hong ling in, det dou nawn lou, muantak lou, khua leh tui a ding a lungkhamna, dipkuatna,galgim namna, gamsung mite ading a niamkiakna lianpi hong hita. Laisiangthou a kimu ninanung a thil tung dia gen a omte:- Mi amau ki-itte, dangka deihtate, kiuangsakte, kisatheite, Pathian gensete, nu leh a thumang loute, itna pianpihnei loute, buaina bawlte, hekte, kidektheiloute, mi huhamte, hoih deih hetloute, zuautatte, kingaisangte, thunung khualloute, Pathian itsanga amau kipahna it zawte ahi ding uhi. Pathian limsakna batna a nei ding ua, himahleh a thilhihtheihna a taksang kei ding uhi; tuabangte nungngat san in (2Tim.3:2-5).
Tukum February nikhat apan Myanmar gam sepaihten vaihawmna thakhat thu a hon la in gam sung thuneihna khempeuh amau kitawi ta uhi. Mipi nautang a deih lou a kiphinte, itna lainatna leh mul kimna bei in thauvui thautang toh melma bang zen in dou uhi. Mipi chimoh mangbangte gamlak peuh a giak bang, Mizoram leh mun tuam tuam a tai bang a om in genthei mah mah uhi. Mahni gam mi leh sate ngoih ngoih itna leh lainatna nei lou a, lal utna, thuneih utna ziak a dawmlou hial a koih chih tuh itna pianpih lou, hoih deih het lou, thunung khual lou, buaina bawlte, mihuhamte tuh ahimai ua, a thuak kha mite hehpih huai lua uhi. Hiai bang thuneih utna lungsim leh hehpihna neih louhna kichite bel dawimangpa deihdan leh lungput himah mah hi. Itna leh hehpihna kichi khawng tuh Pathian a suak Pathian deihdan, Pathian lungsim toh kituak ahi. Thagumzang a thuneihna lak sawmna in tuh gam kang bang mai in mun tuam tuam, mi tuam tuam lak leh nam neu chik chik leh mi tawm chik chikte lak na ngawn a hon peh zung zung ta mai hi. Laisiangthou a i muh leh i sim zelte uh hong tang tung zel tuh ahimai a, kiginna ding leh eilam a panlakna ding omte na mangngilh het kei ni hang maw.
Hiai thuneih utna diklou leh huhamna tuh khovel ah maingal mah mah in Afghanistan gam zong India in zalenna a lopni August 15,2021 in helpawl minthang,Talibante khut ah suak leh sal bang mai in a na lut ta hi. Agam mite mundang a taikhiak ut in thanlom bang mai in kiphu veng vung mai mah uhi. A taikhe kha lou leh tai lemtang thei lou teng in tuh sialpi vuah thuak a, a thuak mai uh ngaita hi. Tuchiang in kha khat val bang hong hi nawnta a, gamsung ah nek leh dawn ding taksapna lian mah mah a, a van neihte uh zuakin a sum muh sunte ua nek ding lei in genthei tak in om uhi.. Hiai gam nih Myanmar leh Afghanistan a teng mite tuh tulaitak et in a enhuaina ding om het lou a bat laitak uh ahi.Ei a na gal et a nop tuak kei na tel e maw a na chite hamphat laitak ahi.I mohpuakna tuh amaute a ding a Pathian kiang a thumna ngetna chiteng a i panpih hun ding ahi.Melmapa Setan tuh Pathian in hun a piak sung am in a kisan mah mah mai a, lang khat lang khat ah buaina gen ding a hong tam mah mah ta hi.Hiai buaina leh kisiatna in igam sung i chi leh nam sung, beh leh phung, u leh nau kal, ji leh pasal zong hon dawm tuan lou in, I sik khop ding chiat uh buai a hon tun hi mai hi. Sum leh pai zang in a hon zol thei, duh leh deihte zang in a hon zol thei, muhnop zaknop, khoih nop, lawnnop deih huai pipi zang in niteng hun teng in melmapa Setan in vanzat hoih pipi zang a hon zol thei gige hi kiveng ni.
