“Zingchiang in bang hong om ding ahia chih na thei ngal kei ua. Na hinna uh bang ahia? Mei sawtlou kal a hong dawk a, mangnawn lel zel bangphet na hi ngal ua...”(Jakob4:14)
Toupa' hoihna sut ding chi leng, mit a muh theih A vualzawlnate lungsim ah hong lang masa diandian sek veh aw maw. Himahleh tuate' sanga thupi leh manpha zotham tuh a thawn liauliau a i muh, eite'n ahi ding mawng a i koih sekte ana hizaw hi. Hiai theihsiamna taktak neih leh neihlouh kikal leng kigamla pi ana hitah e!
Hiipi in khovel hon nuai a, ngeina (normal) i chihte hon pumkhek a, hon khek touzel lai ding hi. Lockdown kipat chil in kuapeuh thawmhauna nei chiat dingin ka kigingta; kei leng kana hi mahmah hi. A natna vei khak ding lauhna sang mah in leng, vei khak ziak a innkuante toh kikhen a puakkhiak vengveng a om ding; sihna tan i tuah ngial leh houh khovel a mel na-ngawn kimu nawnlou a kikhen suak ding, chihte va-ngaihtuah khak chiangin thawmhauna in dim theih hi. Tuate thutuam hileh, hiaibang a hindan ngeina teng phial dinkhawl top a kibukhum sungin, banghiam buaina leh hatsakna dang tuak le hang nak mangbathuai na'n chia, chih in kei mimal lungsim hon kam khol diak hi. Tangkhat leh panpihtu bei kisakna lian hina e!
Himahleh, tuabang thawmhauna leh lungngaihnate'n nidang sang mah in Pathian hon naihsak a, Amah naihte nanana nungngat san lou in, khovel' piak theihlouh khamuanna honpe zel hi!
Banah, tua thawmhaunate mah tuh nidang a ngeina a kana koih mai sekte' manphatna hon hilhtu hong hi uhi. Ni khat lel hinna kibehlap a, innkuante toh dam siausiau a om a, buaina leh haksatna tuaklou a tua ni khat pumlum zatbei chih a hamphathuai dan, mitdel in mitvakna a ngah bang hial in ka hon muchian hi!
Hiai ni khat piak a ka om pen kei adi’a a tawpna hikha thei a, ka it mahmah ka innkuante toh khovel ka zatkhawm ni nanung leng hikha thei, chih phawkna in amaute it semsem ding, hun a tamthei pen piak ding lunggulhna hon guan hi. Nupa/innkuan kinak-kiselna dingin hun pammaih lua; kihawmthoh leh kipahtak tuah (appreciate) na a zat sawm ding hizaw. Distraction tuamtuam tampite toh zatbei mai di'n pammaih lua; tuate koihkhia a tate toh hawmthoh tak a zatkhawm (cherish) ding hizaw. Neih (zoh) louhte lunggulhna a zat bei dingin pammaih lua; neihsate toh kipak leh lungkim a om ding hizaw. Thil dang tengteng sang a Pathian belh chihtak a belh a, a thu leh la a kikhamuan leh kihihhat hun hizaw. Aziak bel, tuni pen ka ngeina ni (normal day) tawp ni hithei hiven!
Lockdown 1.0 bei apan office regular a kai hong ngaita a, kiven theih dan teng a kiveng sam in louma zuan in kuankhe zel ing. Mihing kikep theihna khel ah Toupa'n nisim in hon kem! Tawl dimdem a inn tun chiangin, bangmah dang lunggulh ka nei nawn kei. Tuni a hun omlai teng, ka tanu, ngaklah tak a kongkhak honna hon biambiam toh zatkhawm ka ut tet-tetta. Ka zi in nek ding honna bawlsak bangbang kipak tak a nek ka lunggulh a, lup hun hong tun chiang nasan in ihmut suk mai ding bang pammaih kasa hial hi! A ni khe-lah tuntun ka hi kei, sih khamuanna neihlouh ziaka khovel aam kahi sam kei; Pathian thawnpiak ni khat a manphatna theichian hizaw ing.
Toupa tuni, ni khat, ka hinna uh n'on behlap sak a, dam leh bit a n'on zatsak ziakin kipak! Zingchiang, ni khat, n'on piak behlap nawn leh ka kipak mah ding e, Toupa!
…..
*Thugelhtu, Children’s Department, EBCC Delhi sinsaktu & Secretary hihna lenlel ahi. Lungdam lua.
