Khrist a unau tamtakte lockdown ziaka sepna kuankhe theilou; khenkhat lah duty poimohtak ziaka kuankhiak ngai, damlou kema om; akhente lah damloua kep ngai damdawi-inn a om bang leh inna ki-enkol bang i om vingveng uhi. Huchibang kalah, it leh ngaihte paisanna nunga lungzuang taka om bang leng ki-om kha ding hi. Huan, Nipini biakna leh phatkhawmna I neih zelte bang leng zangtheilouin I om tadih uhi. Bangteng hileh, I omkhakna mun leh hih khakna dante 'tu hun adi’a Pathianin hon sehsak ahi' chithei chiat leng tawldamhuai ding hi. Mahni omna mun ding hiloupi a omkha, tuahlouh dingpi tuakkha banga kingaihtuahna in hon lunggimsak sawnsawn thei hi. Mihingte lohching leh khamuanga i om theihna dingin, koi ah na oma, bang na hiha, chih sangin,Kuatoh na oma, chih poimoh zaw hi.
Lai Siangthou ah, “…thil tengteng amau hun chiatah kilawm taka abawl ahi (Eklj.3:11)” chih I mu uh. Ahihleh, hiai ni 47 kikulkhum sungin akilawmna bangzah muhkhiak I neita ua? chih kidot tuakpi khat ahi. Nidanga na awlmoh khak louh nna tampi awlmohhuai leh poimoh ahihdan na phawkthak om kha thei ahi. Huan, sepna ziaka thildang leng ngaihtuah manlou bang I hihleh “Dai dide inla ngaiin, kei Toupa Pathian ka hi chih thei in (Sam 46:10)” chih houpihna hun bang hikha thei hi. Bangkim, sepna leh nekzonna, hinna leh damna I neihte tengteng leng telin Toupa Pathian akipan ahia, Amah ading vek ahi (Rom 11:38). Sepna leh nekzonna mansuah theih hiphet loua hinna mahmah leng thil mangthei ahihdan hiai laa in genchiang hi- “Hinna I deihpente zong, leitung thil mangthei ahi…”
Ka hun zatdan, thil etdan leh bang chibang lungput nei ka hihiam chih kivelthakna hun lemchang hikha thei ahi. Phattuampih chiat sawm ni. Unaute, hiai I kingen lai uhi:Hun haksa in honnawk laia, gal matawngapang,damtheihna lama seem unaute, tuailai/sinlai naupang maban sunzom theiloua dinkhawl maite leh haksatna tuamtuam ana tuak unaute adinga thumna sunzom zel ni hang.
