Amah ah tuh i tatkhiakna uh i mu un i khelhnate ngaihdamna tak (Kol.1:14).
Pathian kepna ziakin kum 2021, a kha thumna i tungnawnta ua, hon pitu Toupa thupina pia in A min thupi phat in kipahthu i gen masa uhi. Tukum i saptuam thupi Ngaihdamna, khateng adi’a a khennenna, tu March ading tuh “Ngaihdamna poimohna” chih ahi. Ngaihdamna poimoh dan bel gen seng ding leng a bang kei, a ziak tuh mi kuapeuh ngaihdamna lou a kituahna leh kilemna om thei lou ahihman in. Ngaihdam ngai mikhial, ngaidamtu Pathian, ngaihdamna vanzat leh ngaihdam theih khelhna chihte sau loulou in hiai anuai a bangin kikumkhawm leng chih tuh i tup leh i deih dan ahi:
NGAIHDAM NGAI MIKHIAL: Hiai dinmun tuh khovel a tomchik damsung adi’a telhuai lou, uthuai lou, maingalhuai hetlou, dinmun, dinmun sia leh hehpihhuai ahi. Ut a tel ding hileh kuamah a tel om di’n gintakhuai lou hi. Himahleh hiai tuh mi tengteng dinmun leh hihna ahi maimah hi. Hiai tuh mi hon piakluih hiam, thagum hat a honpiak leng hilou in, awl a mahni deihtelna zang a lutkhak ahi. A lut ol/ baihsam mahleh a pawtkhiak nawn pen baihlam hetlou hi. Ut tak leh kithalop tak a lutna himahleh mikhial ngaihdam ngai dinmun tuh dinmun se-pen, dinmun niampen, suakta lou leh zalen lou dinmun ahi. Israel Kumpi thupi leh minthang mahmah Kumpi David, Uria’ zi Bethseba toh a hong khelh chiang in a sawm leh tup ngei leng hilou ding thil hoihlou leh a huaise zaw khelhna hon sem kha tou lailai hi.
KHELHNA CHI NIHTE: Khelhna chi nihte - Ngaihdam theih khelhna leh Ngaihdam theihlouh khelhna.
(a) NGAIHDAM THEIH KHELHNA: Mt.12:31 – “Huaiziakin ka hon hilh ahi, mi a khelhna chiteng uah leh Pathian a gensiatna chiteng uh ngaihdam ahi ding ua; Kha hilhial a gensiatna ngaihdamsak ahi kei ding” (Mk. 3:28-29; Lk. 12:10). Khelhna leh mohna gen ding chi le’ng gen theih tampi i nei chiat ding uhi. Himahleh tuni in chi nih kia suah in gen le’ng: Ngaihdam theih khelhna zong khelhna neu leh a simmoh huai khelhna hituan lou ding hi. Ngaihdam theih khelhna nei himahlehang a ngaidam theipa kiang I tun a, ngaihdamna vanzat pen i zat kei leh ngaihdam theih khelhna toh gawtmun kilut ding hi. Khelhna khat peuhpeuh Pathian toh hon kikhensak lou om lou hi, ahang bel Pathian pen khelhna a nei kiuhkeuh lou, Amah a khelhna them khat leng belhlou ahihman hi. A neu lua a hiai zaw simtham hikei i chihte na-ngawn Pathian mitmuhna ah na neu hetlou thei a, ei muhdan a lian I sak mahmahte toh a case na kibang, a gawtna zong dau tuan lou in tangtawn gawtna mahmah hi veve ding hi.
(b) NGAIHDAM THEIH LOUH KHELHNA: En I na phuahtawm hilou in Laisiangthou ah i Toupa Jesu mahmah in hichi’n hon na hilh, “Chih taktakin ka honhilh ahi, mihing tate khelhna teng teng leh Pathian a gensiatna teng teng uh na-ngawn leng ngaihdam ahi ding. Himahleh, Khasiangthou hilhial gensia in zaw ngaihdamna a tang ngeikei, tangtawn mohpaihna ah a lut zaw hi” (Mk.3:28-29).
NGAIDAMTU PATHIAN: Khovel vaihawmte lak ah zong khailup mai dingte suaktasak thei mi tamlou om, himahleh hiaite a toh kibang het lou a ngaidamtu tuh Pathian bangkim hihthei leh bangkim thei pa tuh ahi. Amah ngaihdamte bel tangtawn a siamtang ding, Pathian ta chih hiding, a gou leng luah ding a hamphatna tanpha piak ding hilai hi. Hiai Ngaidamtu Pathian ngaihdamna na tangta hia ?
NGAIHDAMNA VANZAT: Vakhute, Vapalte, Belamnou leh Bawng tuailaite hilou, van a Pathian tapa tang khat neihsun Jesu Khrist ahi. Leitung mikhempeuhte khelhna ziak a Pathian toh kikhen, a thangpaihna, tangtawn gawtna thuak dingte ngaihdam a i om theihna ding un ngaidam theitu Pathian mah in setden ding in kalvari tang a Kros tung ah a tapa honpia hi. Ama’n ahih ding teng a zouta, nang leh ke’n i pom hunhun leh i san hunhun a i khelhna tengteng uh ngaihdam a om ngalmai ding I hi uh.
Ngaihdam louh hinkhua tuh a tawlhuai a, a zumhuai a, a zahlakhuai a, a mualphouhuai mahmah man in mikhial nang leh kei ading in hon ngaidam theitu Pathian kiang zot a, Amah belh tuh i damna ding ahi. Ama’n a ngaihdamte zaw a khelhna uh a sut/kheuh pihpih nawn kei a, khial ngei loute toh kibang in a bawlzaw hi. Tuaban ah A’ ta hihna honpia a, A gouluahtu ding inleng hon chi lai hi. Hiai hamphatna tuh michih a sang ut khempeuh khentuam om lou a tan theih thil thawnpiak thupitak ahi. Tu in huai hamphatna tang ding in michih hiai simtu tengteng Toupa’n hon vualzawl chiat hen!
