Saptuam in tukum thupi ding in ‘Ngaihdamna’ chih teel uhi. Mimal, innkuan, leh khotang a ding in tuhun a i poimoh uh NGAIHDAMNA ahihdan haih vual hilou hi. Mimal khat-le-khat kal ah ngaihdamna a poimoh a, huai bang in innkuan sung leh khotang ah leng kingaihdam-tuahna poimoh hi. Lai Siangthou in, “Mi tengteng in thil a hihkhelh ziak ua Pathian thupina a tan zohlouh nung un” (Rom. 3:23) chi a a gen bang in, midik leh hoih bukim kuamah ki-omlou hi. Huaiziak mah in, miteng in hiai ngaihdamna i poimoh vek uhi. Khalam toh kisai in gen le’ng, khelhna toh piangkhia i hihman in Pathian apan khenkhiak leh A’ thangpaihna thuak ding I hi uhi. Pathian in A’ ngaihdamna a Tapa Jesu Khrist tungtawn a hon bawlsak lou hileh tangtawn a mangthang dingte I hi uhi. Hiai bang in ka ngaihtuah sek hi: Pathian ngaihdamna tang ding in bang/ kua ka hi a? Kei a deihhuaina bang a om ahia? Pathian phat in om hen! Mikhial I hih lai na-ngawn in Khrist i sik a a sihna ah a hon itna a langsakta hi (Rom. 5:8). Huai mah bang in eite leng khat-le-khat i kingaihdam tuah chiat ding uh ahi.
Pathian in eite hon ngaihdam bang in eite’n leng midangte i ngaihdam ding ahi. Jesu in a Nungzuite thum dingdan a sinsak khit in hiai bang in thuhilh hi: “Mi a tatleknate uh na ngaihdam uleh, na Pa uh van a om in leng a hon ngaidam sam ding hi. Himahleh mite tatleknate na ngaihdam kei ngal un, na Pa un na tatleknate uh a ngaidam sam kei ding hi” (Matt. 6:14, 15). Thil nuam ahi kei! Pathian in eite hon ngaidamta ahihmanin eite’n leng midangte i ngaihdam ding uh thupiak bang hial khop in Jesu in gen hi. I tung a midangte’ khelhnate ngaihdam le hang Pathian in eite hon ngaidam ding chih ahihman in, Pathian apat ngaihdamna tang mite a ding in midangte ngaidam theilou a i om leh i kivelthak poimoh ding hi.
Midangte ngaihdam theihlouhna in Pathian leh i kal kizopna suse thei hi. Jesu’n hiai bang in gen hi: “Huaiziak in, maitam a na thilpiak na lat lai a na unau in na tung ah lung hihlouhna a nei chih na theihkhiak leh, Huai maitam ma ah na thilpiak nusia inla, pai inla, na unau kilempih in, huaizoh in na thilpiak lan in” (Matt. 5:23, 24). Lai Siangthou in chiangtak in lungsim a ngaihdam theilouh neihna pen khelhna ahih dan hiai ah hon sinsak hi. Khelhna in Pathian toh kithuahna hon sesak mah bang in ngaihdamlouhna in leng Pathian toh kithuahna sesak hi. Pathian mai a Biakna kilawmtak leh Amah a ding a pom tak biakna i piak theihna ding in eite Pathian in hon ngaidam mah bang in eite’n leng midangte i ngaihdam ding ahi. “Huaiziak in, tu in ka khelhna ngaidam inla, Toupa ka biak theihna di’n kei lam ah hong kihei nawn in, a chi hi” (1 Sam. 15:25).
Ngaihdamna kichi hon nget ziak ua ngaihdam ding hilou ahi. Pathian apan ngaihdamna i tan dan ngaihtuah thak le’ng hang Pathian kiang ah ngaihdam i nget ziak ahi masa kei hi. Himahleh Pathian in eite hon it man in A’ ngaihdamna a Tapa Jesu Khrist ah hon peta hi. Huchihlai in leng a sang nuamlou ki-om thei lai hi. Huai mah pansan in eite leng midangte i ngaihdamna ding in ngaihdam hon nget ziak uh ahih louh ding ahi. Jesu in, “Huan na unau in na tung ah thil a hihkhelh leh pai inla, amah leh nang kia theih in a khelhna hilh in; a hon ngaihkhiak leh na unau na zou ahi ding” (Matt. 18:15) chi hi. Pathian kiang a ngaihdam i nget ma tham in Pathian in A Tapa ah hon ngaidamta hi. Huai bang in mite’n ngaihdam hon nget ziak uh hiam, ahihkei leh hihkhial ahihdan thu a hon gen ziak ua ngaihdam ding hilou ahi.
Ngaihdamna kichi khalam kia hilou in taksa damtheihna a ding in hoih hi. John Hopkins Medicine-te gen dan in innkuan a kitheisiamlouhna houchik bang a i ngaihtuahte bang leng i gintak sang in buaihuaipi suak thei hi. Hiai mihingte damtheihna a ding in lauhuai tunthei, chi uhi. A sui dan un, mi ngaidam thei mite lak ah lungtang natna neih ding tawm sak a, mi ngaidam thei mite’ cholesterol level leng hoih tangpi chi uhi. Mi ngaidam thei mite’n ihmut nuamsa ua, a blood pressure leng hoih tangpi hi. Depression chihte leng mi ngaidam thei mite lak ah tawm chi uhi.
Tuni a i gen nop pen zaw, Lai Siangthou in “Kuapeuh in kua tung ah leng thubuai nei hile uchin, kithuakzou chiat in, kingaidam tuah unla, Toupa’n a hon ngaihdam tak bang in kingaidam tuah chiat un” (Kol. 3:13) a chih bang in Pathian ngaihdamna tang mite’n midangte i ngaihdam ding ahi. Ngaihdamna i poimoh vek ua huai lah khalam kia hilou in taksa damtheihna ding a thilhhoih ahi. Simtu teng, Toupa’n hon vualzawl chiat hen!
