Joseph mah in a unaute kiang ah, “Hehpih in honnaih un” a chi hi. Huchi in a vanaih ua, aman, “Na unaupa uh Joseph, Aigupta gam a lutpih dia na khot uh ka hi. Himahleh hiai a paiding a n’on khot ziak un lungkham kei unla, ki hehkhum tuankei un. Mite hinna hondam ding in Pathian in na ma ua honsawl masa ahi. Hiai kum nih sung hiai gam ah kial a keta a; kum nga in a samlai hi. Huai sung in leileh a omkei dia, buhlak leng a omkei ding. Tu nung khang om zel ding hawisak ding leh noute hotdamna thupitak a hingdam a k’on omsak theihna ding in Pathian in na ma uah a honsawl masa hi. Genesis 45:4-7
Joseph in a sanggamte tung ah phuba la ding chi leh lak na ding san hoihtak a nei hi. A sanggamte’n thah sawm ua, himahleh that hiallou in migam a suak (slave) a om ding in zuak uhi. Huai kia leng hilou in, a pa uh Jakob kiang ah Joseph sikhinta hi dan in zuau gen uhi. Himahleh Joseph kiang ah Pathian om ahih man in sal a a omna gam, Aigupta, ah mithupitak hong suak hi. Tu in thilhihtheihna leh vaihawmna a khut ah om ta ahih man in a sanggamte tung ah phuba la ut hileh lak theih na ding in hunlemtak mu hi. Phuba lak naksang in ngaidam zawta hi.
I tangtel ah Jaseph in a sanggamte a ngaihdam hun a a thugen i mu thei hi. Hiai hun a Joseph thugen thupi leh manpha mahmah ahi. Pathian in a sanggamte’ thilgilou hih tungtawn a mite a ding a damna tungtu a pangthei ahih dan theichian mahmah hi (tang 5). Hiai bang a a theihna in a lungsim natna leh a thuakna beisak ding in gintak huailou hi. Himahleh phuba lak ding sang in ngaihdam ding teel zaw hi. Hun tamzaw ah ngaihdamna i chih thupukna lakna tungtawn a piangkhia hisek hi.
Ngaihdamna i gen chiang in thilnuam hi gige khawllou sek hi. Ngaidam ding a thupukna lak kichi thilnuam hi gige lou hi. Hunpaisa a thil tuahte ziak in lungsim a mangngilh theih lou nna velvul ziak bang in midangte ngaihdam ding kichi thil haksa pi a hih hun om zel mah hi. Himahleh hiai bang hun in leng Joseph mah bang a Pathian lam en a thupukna lak ding ahih dan i Lai Siangthou in hon hilh hi.
Joseph in hiai bang a a sanggamte a ngaihdam theihna ziakte lak a khat ahih leh, apate unau (Esau leh Jokob) kingaihdamna apan a sinkhiak hingei ding in gintakhuai hi. Jokob in a u’ tan ding vualzawlna laksak hi. Hiai bang a a thilhih ziak in a u (Esau) heh mahmah a Jakob thah sawm hial hi. Thah a om khak lau in Jakob a pute kho lam ah taimang hi. Kum 20 lam bang a taimang nung in (Gen. 31:41), a zite leh a tate toh innlam zuan in hong kik uhi. Innlam zuan a apai lai un a u Esau amau vaidawn ding in hong pai ahih dan a theih in Jakob in lau mahmah hi. A u hehna thoihdam sawm in thilpiakte pe mahleh a u pa a maithuah ding lau veve hi.
A u toh a kimaituah hial chiang un, Jakob leng lau ahi ngei ding a sagihvei leisi in a kun hi (Gen. 33:3). Esau in a nau innlam zuan a hong pai amuh tak in “amah [Jakob] mu ding in a tai a, a pom a, a ngawng a kun in a tawp a, a kap uhi” (Gen. 33:4). Hiai bang a Esau in Jakob a ngaihdamna hun ah Joseph leng a lak ua tel ahih dan tang 7na ah muh theih in om hi. Genesis 33:7 ah hiai bang in kigelh hi: “Leah leng a tate toh a hongpai nai ua, a kun ua, huaikhit in Joseph leh Rakil leng a hongpai nai ua, a kun uhi.” Hiai ah Joseph leh a unaute tel vek ding un gintak huai mahleh Lai Siangthou in Joseph min lou tuam sese hi. Hiai omze neitak a gelh hiding in gintakhuai hi. Joseph lungsim ah hiai kingaihdamna thamden a hi ngei ding a, a nung kum tampi pai nung in aman leng a sanggamte ngaidam thei hi.
Hiai apan i sin theih uh ahihleh, ngaihdamna’ chii nu-leh-pate’n a tuh ding uh ahi. Innsung ah kingaihdamna tate’n a muh ding uh ahi. Ngaihdamna mu ngeilou innkuan apan khangkhia mite apan midangte ngaihdam ding chih thil hitheilou hikei mahleh lamet huailou hi. Joseph in leng hiai bang a a sanggamte a ngaihdam theih na pen a pate kingaihdamna apan a sinkhiak hingei ding in lamet huai hi.
