I Hondampa leh Heutulian Toupa Jesu Khrist min in Naupangte Ni Chibai!
Kum 2020 i lut tungin bangteng hongtung ding hiam chih thei hetlou in i lut a; lametna lianpi toh vai tuamtuamte geel in Pathian gamna sepna leh a gam kekletna dingin thanuam leh thathou tak in i om uhi. Naupangte Ni bangleng manpha tak leh nuamtak a zatdinga i na geelkholh chiat uh ka gingta hi. Tuakia hilou in naupangte ading Hotdamna Chialpi leh Camp te bangleng geelkholhsa nei saptuam hunkhop i omngei ding hi. Huchibangteng ahihlai in mihing geelphak theihna pel lam ah i Toupa’n a vangletna hon musak a; khovel pumpi a dinkhawl sak hi. Ei deihtelna hilou in, natna hileng covid-19 ziakin i ngeina dan hinkhua lumlet in hong om a; nekzonna hi in siamsinna hitaleh hon sukha vek hi. Tu Naupangte Ni in leng biakinn ah hundang-kumdang a i zatdan a zangtheilou in i om loh a; mahni inn chiat ah TV leh Mobile Phone te tungtawn in i kithuahkhawm thei lel hi. Himahleh, hiai tengteng ah leng i Toupa min i phat uhi. Ama’n a it a tate adinga hoihzaw thei ahihmanin, hon pina lampi zuih i lunggulh a, hon sinsak nopte theih ngeingei i tum zaw hi.
Tuhun in leng Toupa’n naupang pawlte hon sinsak nop om a mu in, huai mah tu kum 2020 Naupangte Ni thupuak dingin kahonbawl hi:
Covid-19 pandemic ziaka Lockdown a i omnung kha thum bang chingthei ding ahita hi. Hiai lockdown in ahon sinsakte laka poimoh leh ngaihtuahna piaktham mahmah khat ahihleh i poimoh taktakte theihchetna ahi. Mihing adingin bangteng poimohpen ahia? Hiai mah tuni in naupangte leh sinsaktute’n ngaihtuah thak lehang chi in kahonchial hi. Siamsinna Skulte khak in hong om a, online class leh test te bang sai hongngai a, huchihlai in state khenkhat ah Pawl Sawm (Class X) te exam se ngailou a “pass” sak ding thu khawng zak in hong om hi. Tuni in BCD leh nu-le-pate’n leng i naupangte leh tate adinga poimoh pen bang ahia chih veelthak lai lehang I chi hi. Naupang Sandeskul’ dinsan Naupangte hotdamna ding leh Khrist batna a a khanna ding uh chih ahi. Sandeskul i kai theihlouhna kha nih a valta a, sinlaite sinsak theilou, tangvomte genkhawm theilou, kumkim exam tanpha sai theilou a i omlai in; i dinsan leh tup-le-ngimte bang a chi a? Tukum Naupangte Ni in Naupang Sandeskul toh kisaia poimoh i sak leh i buaipihte hon veelthak sak leh I chi hi. I dinsan uh “Lockdown” (khumchip) theih ahihlouh manin Toupa min i phat hi. I tup-le-ngim in mailam nawt thei lai ahihmanin Toupa min i phat hi. Huaiziakin hiai bang in ngaihtuahna bawlthak lehang chi in kahonngen hi:
1. Naupangte, sandeskul kaitheikei mahlehang Lai Siangthou i sim thei a, Pathian i houpih gige thei a, phatna la i sa thei a, i sinlaibute leng sim in i phattuampih theilai hi. Khamuanna leh lungnopna i neih theihlouhna ziak tuh Khalam thawmhauna leh dangtakna i neihziak ahi. Huaiziakin na khalam khantouhna ding mah poimoh ngaihpen in.
2. Sinsaktute, Pathian gamnaa i sepna dal a om ahi chih chiangtak in i mu hi. Hichibang hun mah ahi Toupa adi’a kalsangzaw tawi di’a i kisak hun. Hunkhat laia Pathianni/ Nipini sun dakkal tamlouchik naupangte toh i zatkhawm zel pen hithei lou phot ahihmanin, tu in bangchi’n amaute khalam an in i chawm thei di’a? Bangchi’n Tanchinhoih i zasak theilai dia? Pathian mai ah i mohpuakna ahi chi a thumkawm in kalsuan zomzel di’n kahonchial hi.
3. Nu-le-pate, nidang in i tate’n sandeskul ah Pathian Thu a zil ua, bangtanhiam ah huai i sen chiat sim uhi. Tu in bel huai hithei nawnlou phot ahihmanin; tate khalam kepna ah nu-le-pate poimohna honglang chiang semsem hi. Hichi’n ngaihtuah lehang “sihma a sepkhiat, hihzoh ngeingei di’a poimoh i sakte vualsuk le, bang a masa pen di’a?” Amasapen a na koih mah uh semkhe dingin Toupa min in kahonngen hi.
Toupa’n i omna mun chiat ah tukum Naupangte Ni kiveelthakna hun leh thathak lakna hun a zangthei chiat dingin hon vualzawl in hon makaih tawntung hen!
