Amasa in tuni Naupangte’ Nipini hon musak Pathian min i phat a, navek un Naupangte’ Nipini CHIBAI ka hon buk hi. Naupangte’ Ni poimohtak ah Lai Siangthou in tate toh kisai bang hon sinsak hiam saulou in i ensuk ding.
I. Tate Goumanpha Ahi Uh
Lai Siangthou in “Ngai in, tate tuh TOUPA apan i goutan ahi ua: gil a gah a kipahman a honpiak ahi” (Sam 127:3) chi hi. I Lai Siangthou in tate’Pathian apat goutan i ngah uh ahih dan hon hilh hi. Gou i chihte thil manpha ahi, manpha hetlou khat gou kichi theilou hi.
Leitung a i khosak lai in khovel in gou a chih tampi om hi. Eite’n leng goumanpha i neih tampi om ding hi. Huchihlai in, gou i chihte ngaihtuahthak ding in i kingen hi. Leitung hausaknate tampi kaikhawm mahle hang, i tate khahsuah le’ng leitung goute nikhat in mang ding hi. Thugentu in hichi in gen hi, “Huan, ninuai a ka sepgim ka sepgimna tengteng ka hua a: ka nung a hongom ding mi kiang a ka nutsiat ngei ding ahi chihthei in. Kua'n a hia mi pil hia ahihkeileh mihai a hong hih ding thei? Ka sepgimna tengteng a ka sepgimna tung ah thu a nei ding a, ninuai a pilna ka etsakna ah. Hiai leng bangmahlou ahi” (Eklisiasti 2:18-19).
I goute uh koih a i koih ua? Mun bit ah i koih uhi. Leitung goute munbit a i koihlai in i tate koi ah i koih a chih kiveltuak mahmah hi. Sum-le-paite munbit thei pen ah i koih mah bang un, tuni in hiai i tate/ i goute munbit [huai bel Jesu khebul ah] ah kem ding in i kingen hi.
II. Makaih Ngai Ahi Uh
Lai Siangthou mah in, “Hatlai tate mi hat khut a thaltangte bang ahi uhi. A thalbawm thal a dim neite kipaktak in a om zel uhi; kulhkong a a doute uh a biak un leng a zahlak kei ding uhi” (Sam 127:4-5) chi hi. Lai Siangthou in tate thaltang toh tehkak hi. Hiai thaltang kidouna a galte kapna dia zat ahi. Thaltang ziak in vuahzohna thupi ngahzel uhi. Aleh lam ah, hiai thaltang in nang hinna mahmah leng la thei hi. Huaiziak in, a zangtu ah kinga hi. Naupangte thal tang bang ahi ua, ei nu-leh-pa te a zangtu/achiltu/asiamtu/amakaihtu-te i hi. I zatkhelh leh i gam leh i nam siatna ahi ding a, i zat hoih leh i gam leh i nam a ding a vualzohna thupitak hon tun tu hi dingte ahi uhi.
Thaltangte a zatna ding bangtak a zat ahih theihna ding un hoihtak a zun leh tat hiam poimoh uhi. Sing khatpeuh ahih kei leh chiangkang khatpeuh thal ah thuahzok in kap mok le’ng target khalou ding hi. Huaiziak in, hoihtak a zun a a tang (straight) thei tawp ding a kep ngai hi. Tuni in tate leng huai bang ahi chih phawkthak chiat ni.
III. Pathian Amasapen Ding Ahi (VV. 1 - 2)
Sam 127:1-2 ah hiai bang in gen hi: “TOUPA’N inn a lam kei leh, a lamte’n a semgim thawn phetuhi: TOUPA’N khopi a venhoih kei leh, a vengmi a hakthawn lel ahi. "Tuni in, bangteng gen mah le hang thilteng kipat leh akingakna zaw Toupa hi gige ahi. Innkuanhoih bawl sawm in, gamnuam leh gamhoih bawl sawm in eimah hatna in kisabem ten mahle hang leng TOUPA a telkei in zaw lohsam veve ding ihi. Thau toh pang in khamtheih dal sawm in nasatak in kisamah le hang le TOUPA atel ken zaw bangmahlou ahi. Huaiziak in PATHIAN amasapen ahih gige ding ahi.
Mihingte’n siatna apan a bit theihna ding un Babel insang lam ding in akisa ua, himahleh a lohsam uhi. Huchihlai in, Solomon in Tempul a lam ding in Pahtian in a lam pih a, Pathian munsiangthou a suak hi. Huai experience apat Kumpi Solomon in hiai Sam 127 a gelh ahi ngei ding hi. Pathian in inn a lam kei leh zaw a thawnlel ahi.
Tuni in innkuan lam/bawl ding a i kisaklai in, Pathian a telna hia? I LaiSiangthou in Pathian theihpih in lam un a chikei a; alunglut leh leng a chi kei a; a hon panpih kei leh leng a chi samkei hi. Sappau ah Unless achi hi. Pathian mahmah in nna a sep a Amah mah in i tate, i gam leh i nam a hon ven sakkei leh lohsam ding ihi.
Tuni Naupangte’ Ni zangtu tengteng i Toupa’n hon vualzawl chiat hen.
