Let no one depise your youth, but be an example to the believers in word,in conduct, in love, in spirit, in faith, in purity
1Tim 4:12
Hiai thu tuh Tuailai Timothi kianga sawltak Paul hasotna thugen ahi. Paul in Timothi tuh “ginna a ka ta” a chi in a ki neisak mahmah hi. Muanhuai sa ahi-ngei ding a Tuailai naupanglai mahmah himahleh Ephesa khua a Pathian Saptuamte kemtu ding in a koih hi (1Tim. 1:3). Hiai ah sep ding mohpuakna nih a guan: Sinsakna diklou nialkalh ding leh Ephesa saptuam Khanna enkai/ enzui a vengbit ding. Tuailai, kumlam a upa nailou na hihna mite kisimmoh sak ke’n, huainak sang in thugen lam ah, omdan ah, itna ah, kha ah, ginna ah leh sianthouna ah mite etton ding in kibawl zaw in chi hi. Hiai Paul hanthawnna thugen manpha takte a nuai a bang in saulou in khatkhat in enkhawm suk le’ng:-
- THUGEN AH: Pichinna ding a poimoh mahmah tuh thugen, kampau, thumal zat leh gen dan hi mahmah ding hi. Naupang pau a pau, “numei hai thugen” chih bang Job 2:10 ah I mu. Paunak ah “Mihai leng a daih dide leh a pil bang a seh ahi” chih khawngte’n hon muhsak tuh thugen dan leh paukhiak apan piching leh piching lou, mihai leh mipil kilang mahmah ahi chih hon theisak hi. I thugen, i kampau tungtawn a min hon zahtak thei, hon simmoh thei ahihlai in tuni a i gennop pen tuh gingtu michihte ading a ettontak hih ding chih ahi. A hun leh amun toh kituak a gen tuak gen theih geih tuh mipil kilatna ahihmah bang in bawlhoihna leh tundingna vanzat manphatak tuh “THUGEN” ahi.
- OMDAN GAMTAT AH: Tuailai hun in chiinnop kihau, gospel deuh a om ut hun bang om thei,a khen chiang a khovel a mithupi leh minthangte a bang a om ut hun, huai dan a gamtat ut hun bang om thei. Sawltak Paul in Timothi a thuhilhna bel na ut bangbang in om in chi lou in “Na Tuailaina kuamah in hon simmoh louhna ding in gingtute adi’a etton theih ding leh zuihtak di’n om in” chi zaw hi. Laisiam leh pil mahmah hinapi omdan gamtat zuihtak ding om lou, thugen siam napi hinpih mahmah lou, lasak siam napi a omdan hoih kei chih in siamna vuak kim lou, ching lou ahihdan honlak hi.
- ITNA AH: Muhdahna, huatna, hazatna, iplahna, thikthusiatna, huaihamna, angmasialna leh a dang itna toh kilehbulh tampi omlaite i hinkhua ah hongdawk mun zawte ahi uh. Huaite mah lah mi toh hon kilemlousaktu, hon kimelmasaktu leh a selam a hon piluttu ahivek uhi. Gingtute kiang a Toupa Jesu thupiak, “Na melmate uh it unla, a honsawite thumsak un” (Mt. 5: 44). Itna mit toh mi en le’ng huatna toh et sang in i tawldam zaw, i chi dam zaw in i lungsim zong nuamzaw thamtham ding hi. Itna leh deihsakna taktak toh mi tung a nasem leng tawl kisakna, sum kisakna, sem lua kisakna omlou ding leh ei mahmah leng thanuam semsem ding hihang. I it mahmahte ading in it kinei lou hi.
- KHA AH: Khamite kianga om nuam, tawldamhuai, puakgiktakte zong hong don thei uh bang himahleh a kibawltawm, a kikhami-sakte kianga om bel nuam lou, sawt ki-om peih lou kichi hi. Khamitna in mite adi’a nek theih ding gah manpha suang a, zuih theih ding lampi dik leh omdan gamtat hoih kawkmuh thei hi. Huaiziakin, gingtute hinkhua a kilang ding tuh Pathian kha tenna mi ahihna ahi.
- GINNA AH: Ginna tuh thil lamette om ngei a theihna leh thil muh louhte theih chetna ahi (Heb. 11: 1). Khristian tengteng leitung a i taam sung in i muh nailouh thil hong tung ding Laisiangthou a kigente ginna toh a mu leh a sangte i hi uhi. Huai mah tuh I kingakna uh leng ahihlai in gindan dik leh diklou omte theikhen ding leh adik len a, a diklou paikhe ngam ding in leng kisa le’ng chih I deih uhi.
- SIANTHOUNA AH: Miteng teng toh kituahna leh sianthouna delh un, huai siangthouna lou in kuamah in Toupa a mu kei ding hi (Heb. 12:14). Na Pathian uh hiding a Aigupta gam akipan a nou hon pikhia Toupa lah ka hi ngal a, Kei Ka siangthou ngal a; huaziakin nou leng na siangthou ding uh ahi (Lev. 11: 45). Noute na siangthou ding uh ahi, kei ka siangthou ngal a chih gelh ahi (1 Pet 1: 16). Pathian in hon thupiak Amah muhna ding tuh Amah a siangthou bang a kihih siangthou ding chih ahi.
Tuni in Khristian Tuailai Pawl India vaihawmna munpi Delhi khopi a siamsin leh nekzong a omte na TUAILAINA UH KUAMAH KISIMMOH SAK KEI UN, gingloute tanpha ading a leng thugen ah, omdan ah, itna ah kha ah, ginna ah leh Sianthouna ah ettontham ching hong hizaw ding in na vek un i biak Pathian hing bangkim hih thei in na taksap lam chiat uh honpia in honvualzawl kim chiat hen!
