Simmohna leh nuaisiahna kichi khawng a thuak ngei lou om din ka lam en kei hi. School naupangte lak ah bang, College naupangte lak ah bang leh khotang kipawl khawmna leh saptuamte lak ah leng a bei tuan kei hi. Midang hon thei ngei loute hon simmoh leh hon nuaisiah ngei lou ding hi, School kai khawm pihte mah bang, College kai khawm pihte mah bang, sep khawmpihte lak mah a thilpiang a hi sek hi. Kampau leh a thu mai hilou, hamphatna ding tanpha piak louh leh gelgawt chih bang zong om sawn sawn lai hi. Hiai teng teng thuak kha ngei lou, tuak kha ngei loute bel mi hampha mah mah hiding. A lehlamtakin gen leng a mi soisatu leh gelgawttu a pan khak theih ahihman in kiveng mah mah ni.
Hindan hoihpen kichi laibu ah laibu gelhtu Joel Esteen in a gelh taklang leng ichi ahi. Mechanic khat Diesel truck service na mun a sem toh ka kimukha ua, a sepna mun a te’n diklou tak a a bawldan uh hon hilh hi. Nitaklam a nasep tawp chiang un party nei sek ua, huai a a hoh noplouh ziakin nuihzabuk in a seppihten a bawl sek uhi. Amah huai mun a mechanic siampen ahi a, himahleh kum sagih sung a khaloh a pung thei het kei a, bonus bang leng a pe ngeikei uhi. Aziak tuh a supervisor un amah a deihsak louh ziak ahi. Na muh dia kilawm na tankhak louh hun a om sam hia ? Huai mechanic in lungsim sung a khatna leh huatna hon neih loh in mundang ah kisuansan daih thei a, sepna hoihzaw leng zong thei hi. Himahleh huchibang a hih lou in, a sepna ngeimah ah kuhkal tak leh taimatak a sem in a phun ngei kei hi. Pathian a kinga in Pathian tuh bang kim theitu ahi chih a lungsim ah a koih zaw hi. Amah soisatu leh hamphatna a tan dingte daltu leh laksaktu a Supervisor uh kipahsak tum in dikloupi in leng nna a sem tuan kei a, Pathian kipah lam a theih bang bang a hih tuh a tum zaw hi. Huai tuh a mah tung a kinga mohpuaknate gin om tak leh kuhkal tak a sep ding chih ahi gige zaw hi.
Hiai Company neitu pan tuh hiai kia kem ahih louh man in hiai ah niteng in a hong hoh in hong pha gige kei a, nasemtute sepdan teng leng a kim sip sip in hong mu ngei kei hi. Himahleh a nna bel pai pai leh kisem sem ahihman in a lungkim ve ve hi. A nasemtu mechanic toh zong houlim khawm kha ngei lou ahihman un a tuah haksatnate a theihpih kei a, hamphatna zong a lawmte tan bang bang tang sam hiding in a koih mai hi. Hiai company neitupa’n hiai pen khawlsan a ama tang a midang kua hiam mi muanhuai khat etkolsak ding tuh a deihdan ahi, huai ding in mechanic pa tuh a sam a “Hiai sumdawnna a hoih leh hoih louh, tulel dinmun leh maban bang tan hiam zong a thei pen ding na hih man in hiai company enkol tou zel ding a nang hon deih ka hi” chi in ahilh hi. Huchi in mechanic in “Pu aw, ka ut lua chih na thei a, hileh leng hiai na sumdawnna thupitak mai lei ding in sum ka nei kei” chi in a dawng hi. Company neitupa’n, “Hilou e ka gen na thei siam kei a ahi, nang adia sum kiphamoh zen zen lou, kua hiam khat hiai company enkoltu ding poimoh ka hi.Hiai nna ngakkhiak theihna ding mi muanhuai kua om diam aw chi a ka zon gige lai in nang tuh hiai sem dia chin pen leh muan huai pen a kon theih na hi. Huaiziakin ka lungulh leh ka zon zon muta in ka kingai a ka kipak mah mah hi” chi in a vai kisam om teng teng awwl a suveng in hiai mohpuakna goltak tuh a kipekheta uhi.
Hiai mechanic pa tuh a sepna mun ua ding in mel etdan leh polam latna ah tuh a chin pen ahi kei mai thei, himahleh a sunggil lam enpa muhna ah bel amah a chin pen, deihsak tak pen, huai nna goltak len ding leh mohpuakna liantak enkol ding a muanhuai pen ahi mai mah hi. Sepna office ah hi in pawlpi lak ah hita leh na phutawk hamphatna leh deihsakna tang na kisak louh hun bang, mite nolkhin leh pampaih a om na kisak hun bang a om mai thei, huaite ziakin na lungsim neusak kenla, nanglam apan na hih theihna leh mohpuakna omte ah gin om tak in sem phot in. Seppihte lam apan lamet zah, kinep hong bat louh hun in leng phun pah kei ni, ei sang a theichian zaw Toupa Pathian in pha a sak bang bang thuak ding leh sang ding in kiman zaw leng i tawl dam ding i puak zang ding, nang leh kei khang in Toupan hon din kei zong in, kumpipa Ahassuera a ding a Mordekai gin omna leh a thil hih hoih kipahman a kipiak pah louh hang in kimangnilh pai suak lou hi. Mite ading a hazat tham ching loute kuaman haza ngei lou, dou tham ching loute kuaman dou ngei lou hi. Toupa apan sansakna leh dopsangna tang dingte khat vei vei vuallel leh gelgawtna thuak khate khawng hithei uhi. Nang zong tulaitak a na buainate mualsuah zou ngei ding in bang kim hihthei Toupan hon ompihta hen.
