Paunakte 23:22 & 25. Nang hon suang na pa thu ngaikhia inla, a upat chiang in na nu musit ke’n. Na nu leh na pa kipaksak inla, nang honsuang nu nuamsa sak in.
Thupatna: Nu nei nawn loute’n nu poimohdan, nu manphat dan,leh nu thupi dan tampi a phawkna ua pan tuni a i zat “NUTE’ NI” kichi hongpiang ahi. A hausa mahmah leh a pil mahmahte zong nu ka poimoh nawn kei chi kuamah om thei lou, nu mun-awng sum-le-pai, pilna leh siamna te’n hu zou tuan lou hi. Apilte’n nu manphatna leh ithuai dan thei sem in zah dan,kep dan, etkol dan zong siam zaw lai uhi. Laisiangthou sung ah thumal kigelh mun mahmahte lak a khat bel ‘NU’ (mother) kichi hi a, 334 vei mahmah kigelh hi. Akigen mun, akigelh zihzeh leh a kilou lou sek thumalte bel kimangngilh lou zaw deuh hi. Banah a poimoh kholloute bel kigen tuantuan khollou leng ahi hi.
Na Nu Hihna Leh Nang Hinna:
1. Na nu in honpaai tung ding in, nidang a, aduh mahmahte kih in, a duh ngei khollouhte peuh duh in, a lunggulh, a duh, a deih kikhek, a neu apan a khankhiakna hilou, na pate innsung ahzum kawmpi in, na nuntakna bul honna patpih hi. Kha 9 (kua) sung bang ka gim ka tawl chi-ngam lou a honpaai zoh chiangin, nakpitak a na (paining), khawul, sisan tampi seng in hon neikhia hi.
2. A nawitui toh honvak, na zun leh ek honsiak, na nitna teng hon hahsiang,hoihtaka chidam a khan hoih khan pha a na khan theihna ding damdawi-inn ah doctor leh nursete kiang hon paipih, na ihmut theih louh ding lau a, thawm na-ngawn nei ngam lou, dawi zena hon pom leh pua, nang honit lua ahihman in ama’ gim leh tawl pen khual vetlou hi. Na nu, a’ tekchiang leh hat nawnlouh hun chiangin nang kem in.
3. Nui thei panpan, honnou nou nuam, hon kipahpih lua, hon-it lua honduat lua in, huih in hon mut ding na-ngawn honphal lou hi. Niteng, kal teng, kha teng leh kum teng a na khan touh zelna leh kikhek zelnate na nu kipak law mahmah ahihman in a lawmte kiang ah gen chim theilou hi.
4. Na nu leh pa’n nang tung ah lametna tampi nei in kinepna hau mahmah uhi. “Ka ta honglian ding a…,” chi in duhthusam, deithusam tuamtuam nei in na let/ khanlet kal ding bang ngaklah mahmah uh ahi.I Lai Siangthou simna ah, “Nang hon suang na pa thu ngaikhia in” chi hi.Na om dingdan amah dong inla, na sep ding, na hohna ding, na ji ding/ na pasal ding ah na pa thu ngaikhia inla, a deihdan lou ahih khak ding kiveng mahmah in. “Simlei miza lai ah tun-le-zua tampi om lou…” –Lengtong Pauno.
5.A upat chiangin,NA NU avun hongvuai ding a,a mel hongmualta ding a,a tha hongkiam in hat nawn lou ding a,a mit hongmial ding a, a ha hong tong/tok di’a, a khawzakna hongchau lai ding hi. A hatna tengteng, a hoihna tengteng a tawpkaangtu, a zang beitu nang na hihman in, na nu hat louhna, na nu fel louhna, na nu khozaklouh leh khomuh louhna tengteng ah nang a’ khut leh a khe ding hita, amit leh a bil ding hita na hi chih kithei in aw.
Thukhitna: Na Nu Leh Na Pa Kipak Sak Inla Nang Hon Suangnu Nuamsa Sak In, nu leh pate kipahna zaw silh-le-ten hoih hiam,sum-le-pai tampi leng ahikei- nu, pa chi in sam inla, na sep ding khempeuh dong lechin, (na nu leh pa) na kipak mai ding uh ahi.Thupukna zaw “nou hoih sak dandan” honchi nawn mai ding uh ahi. I nu leh pa’n i innsung nuam asa un, suaktatakin a omna uhia ? Nutek-patek pau ngam louhna innsung ah Pathian inntek takin a teeng kei di’a, nopni pen leng lungkhamna toh akizom di’a, mehlim-buhlimte’n ankam asulim tuan kei ding ua, lupna nuam leh puan mantam tak tung leng khitui-naptui toh ihmu thei lou a, zankhua khua a lungngaihna mun ahi ding.Nang hon suang na pa thu ngaikhia inla, a upat chiangin na nu musit ken. Na nu leh na pa kipak sak inla, nang hon suang nu nuamsa sak in.TOUPA’N hon vualzawl in, simtute, hon ompih navak chiat lai hen!
