Khantouhna in khovel pum huap a naktak a a kibehlaplai in, India zong nakpitak in hon nawkkha hi. Kum sawm vel paita a kipan hiai khantouhna huzap in India in zong thilthak khat i pat uh a om a, huai tuh Aadhaar card ahi. Hiai card tuh India khua-le-tui hihna nei mi tengteng in a tuam chiat a number neih diing chih a tup ahi. Hiai bang card i chi hia, number i chi hiam tuh gam changkangzaw tumlam gamte’n nei tangpi ua, huailou in ei toh kigamgi Myanmar in zong kum 10 lom tampi a na zangta uhi.
Tua bang a Aadhaar card India in i hon pat chiang in, ei gingtute lak ah dotna tampitak hon piangsak in lauhthawnna zong hon tun hi. Huaiziak in hiai aadhaar number tuh Setan number ahi, huaiziak in kuama’n laaklouh diing chi a lauthawngtak a om, a nial zong hunkhop ki-om hi. Tua bang a buai vinvenna lak ah kei mimal mahmah kiang a zong mitampi in hon dongkha ua, ke’n hichi’n ka dawng hi: “Hiai aadhaar card pen Setan’ number hilou ahi, a ziak bel Setan’ number pen rapture khit chiang a kizang diing; tua gingtute laktouh a om nailou i hi. Himahleh hiai number i neih tuam tiltelte’n bel, gingtute laktouh nung chiang a Setan’ nasepna nakpitak in panpih diing hi. Huai ban ah baihlamtak a a tangtun ziau theihna dia khovel bel huailam nawt a kisakhol toutou ahi. Aadhaar card na neih diing uh tu-le-tu adia poimoh, Inde gammi i hihna a hong kichiamtehna ahi,” ka chih beh zel hi.
Tulel a khovel dinmun et in G20 chih bang in hon pumtuamta hi. September kha in i khopi mahmah a hong luut in khawmpi ni bangzah hiam kizang hi. Hiai G20 thupi/slogan tuh “Leitung khat, Innkuan khat, Maban (future) khat” ahi. Hiai thupi apan i muh theih khat tuh kipumkhatna ahi a, biakna, kivaihawmna chihte lu khat nei a om diing lunggulhna om ahih hon musak hi. Huai tuh sawtpi pek a UN i chih thiltupte mah na hi in; tu lel dingmun in ei gam zong tua lam nawt a kikhiinkhiin kihi ahi. Gam khat, biakna khat, pau khat, chiindan khat chihte tulai phualpi sorkar’ kikou pihpih ahi. India, democracy gam lianpen, mipi vaihawmna suksiat theih ngei dia gintakhuai lou tuh, a bukim in hi naikei mahleh mi khat vaihawmna awlawl in hong suak hiaihiai maimah hi. Khovel tawp i chih tuh awlawl a naih hiaihiai i hi uhi.
Tua i gente tungtawn a i theihtheih khat tuh, maban a saptuam toh kisai a Pathian hun gelte i maituah diing rapture tuh kinaih mahmahta di’n gintakhuai hi. Huaiziak a hi, na manta hia? chi a i kidot.
I gam a buai, thil tampi i ngaihtuah mankei himahleh Pathian thuchiam niteng in tangtung gige a, rapture zong hong tungguih diing ahi. Mathai 24:44 ah, “Huaiziak in nou leng kiging gige in om un, na ginlouh dak ua Mihing Tapa a hong pai diing ziak in,” a na chi hi. Na manta hia?
