“Na lungtang uh hihmangbat in om kei hen; Pathian na gingta ua kei leng hon gingta sam un”(Jn.14:1).
Mi khenkhatte mahni inn nuamtak a vanzat kiningching tak toh a khosak lai un, khenkhatte kholai lamlian gei khong a giak a, kholum nisapi thuak a singlim khawng bel om hi. Khenkhatte kumpi nasem milian leh lal ahihlai in khenkhatte bel mi sawltak, mi nuai a mikhut lik en a nek zong bang, khenkhatten a duh duh uh lei a ne leh dawn a omlai un khenkhatten mi ninbuakna laka nek theih neng omte zong a ninbawm thai thai zong om hi.Khenkkhaten silh seng louh ten seng louh silh leh ten a neih lai ua, semah mah ta mahleh a khekna ding tuan om lou jing leh nitak, nipi phalbi a zong a kibang mah silh ngai. Khopi sung a school hoih pen leh mantampen a kai leh pilna zong tampi omlai in khopi sung a teng hinapi lai na zil kha lou leh school compound na ngawn na tung ban lou chih bang zong om veve hi. Mahni neihsa gari hoih leh nuam pen zang a office kai leh bazar vak tampi om lai a public transportte tanpha leng zang ban lou ki om lai hi.Natna vei chiat chiat khenkhatte lup leng ngai lou, khenkhatte damdawi inn leng tung lou, khenkhatten dam a damdawi inn a potsan lai ua, khenkhatte damdawi inn apan inlam leng tung thei nawn lou a hanmual liam.
UTNA TUAM TUAMTE:- Pilna siamna deih leh neih ut luatnate ziakin na lungtang hihmang bat in a om sek mai thei. Tha hatna, mel hoihna leh kilawmnate neitu leh tua bang tangtu hih utnate ziakin na lungtang hihmangbat in a om sek hia ? Hauhsakna, neih leh lam inn leh lou, nek ding dawn ding leh silh leh ten poimoh sang a tamzaw neih utnate ziak in zong na lungtang hihmang bat in a om sek hia ? Minthanna chi tuam tuam miten hon neihte uh tan khaksam utna hong lian mah mahte ziakin na lungtang hihmangbat in a om ngei zel hia ? Hiai utna tuam tuamte a hoihlam a panlakna dia a zang thei mite ading in khantouhna leh malam sawnna ahi. Mipilte, misiamte, mi thahat, melhoih, mi hausa leh mi minthangte etton a nei a lamkhat bek a mi phak zohna tupna toh hong kalsuan chiang in mi hong lohching hi. Himahleh hiai utna tuam tuamte hazatna toh hong khankhawm leh kipukpih theih hi zel hi.LST ah Huan utna in nou a pai a,gilou a hong pichin in sihna a suaksak zel hi (Jak.1:15) Hichi bang tan kibang lou leh dinmun kikhoukhiat tak a khovel a i khosak khawm lai un a zawng leh hau, mi mawl leh pil, mi lian leh neu, dinmun sang leh niam ten i etkhawm ding ua hoih pen tuh Jesu Khrist leh a sinsakna zui a zom theite tuh sihnung tanpa a mi enhuai ahi ding uhi.
NA LUNGTANG UH HIHMANGBAT IN OM KEI HEN:- Hiai tuh Tapa Pathian Jesu Khrist in a hon genkhiak thuman pha leh thu kipahhuai mi teng teng banpha ding leh i tankhawm vek ding ua a hon gen ahi. Hausak utluatna ziakin dik leh dik lou leng khual lou a gamtatna. Minthan utluatna ziak a Pathian lam nangawn muban lou a gamtatna. Damlouhna apan dam utluatna ziaka dawi leh kau, melmapa setan kiang va tun theihna. Hiai teng teng ten khovel tenchilh in a luah dim vek mai a bang hi. Himahleh i Laisiangthou mah ah “Hauhsak tumte tuh khemna ahte,thang ahte, haihuai leh hihsethei duhgawlna tampi bang ah a puklutnak uhi, huaiten tuh siatna leh manthatna ah mite ahih tumnak hi(1Tim6:9). Lungtang hihmangbat theihna khovel a i hkosak lai un i Toupa Jesun khalam mitvak taka om ding leh khovel thil sawt daih lou dingte zang a lungtang kihih buai lou ding hon deih hi. Pathian gingta Khristian ten a tapa Jesu Khrist leng i gintak ding Toupa Jesu deih leh a thupiak ahi.
Tulaitak a i thuak lel uh hipi ziakin nupa kikhen, inkuan kikhen, meithai, pagong leh tagah bang hong pung mah mah hi. Pathian mizat ithuai taktakte,mi hoih pipite, mi fel tak takte Pathian in hon laksak te khong ka ngaihtuah chiang in Pathian in hun haksa zaw hon tungsak nuam a, a misiangthoute hon la la mai houh a ta dia aw chih peuh hon ngaihtuah sak hi. Hiai sang a se zaw ngaihtuahna, ahi lou ding teng gintakthu suangtuahna banah zawlnei dan a kigen tawm a gintakthu mok gen bang hong tam hiai hiai lai hi. Hichi bang hun tak khawng hidi hiveh aw maw lungtang hamhaih leh ginglel a i om ding Toupa Jesun phal louh a “NA LUNGTANG UH HIHMANGBAT IN OM KEI HEN Pathian na gingta ua kei leng hon gingta un” chi a thu a na gen. Khovel buaina ten niteng in hon tum mah leh gingtute aw iginna uah ding kip ding leh a puk ngei lou a muan huai tawn tung Pathian thu chiam ah kinga chiat ni
Mangbat theihna tampi lak a pan HIHMANGBAT a om lou ding Toupan hon veng chiat hen.
