Thupatna: Khovel ah haksatna leh buaina tuaklou I omkei a, lametna bei aom banga I kingaituah hun om thei mawk hi. Eilam ah hihtheih tawp/ pantheih tawp a pang I kichih lai inleng lawhsapna in hon delhzui thouthou a bat ton omthei tham hi. I dinmun a kibang het kei dia, khenkhatte govt. sepna muh kilam en nawnlou, tate-zi-pasal tung a lametna bei keuhkeuh bang, goutan deih mahmah napi a lamen zou nawnlou, khosakna toh kisai a khuasuak zou dia kilamen nawnlou, damlouhna apan damkhia dia kilamen zou nawnlou bang I om kha thei uhi. Hiai bang hun ah, na lamen ngaplai hiam? Chi in dotna kon bawl hi.
Text: Mark 5:21-42 ah lametna bei, lamet ngaphuai nawnlou hinapi lamen teitei minih hinkhua saulou enkhawm leng ut huai kasa hi.
1. Jaira: Amah tuh kikhopna in a vaihawmte lak a khat ahi. Tang 22, 23 ah Jesu a muhtak in, a tanu si dekdek a hong dam a, a hin theihna ding in Jesu chial a, nakpitak in thum hi. Amah lametna ah tuh Jesu kintak a pai a, a tanu a sikhiak ma ngei a lap a, damsak ding chih hi ngei dingin ka gingta hi. Himahleh Kum 12 sipawt numei ziak in Jesu lamkal ah taam hi. Tang 25 ah vaihawmpa Jaira inn a pan mi hong pai te’n, a tanu sita ahih dan hilh ua, Jesu buai saksak lai ding na hi hiam? Chi in dotna bawl lai uhi. Hiai bang hun in, Jesu le lamet ngap huai lai mah ding adiam maw? chi in a lungsim ah dotna kibawl hial ding in ka gingta hi. Himahleh Jesu’n mi gen ngeingaihlou a, gingta mai ding in hilh hi. Gingta ahi ngei dia, a inn ah lutpih in, a tanu sihna pan kaihthoh in om hi.
2. Numei kum 12 sipawt: Tang 26 ah hiai minu dinmun hoihtak in kigelh hi. Daktor tampi ki ensak khinta, a neihtengteng zang beita, a dinmun phattuam naksang a, sezaw sop hi. Amah ading in Leitung ah hin thaman omnawnlou, vual eng ding kia a piang hilel bang in ki ngaihtuah demdum khak theih hi.. Hiai bang hun in, Jesu’n leng bang pi hon hihsak zou tuan kenteh, I pan theih na teng, I tai theihna tenga I tainung a leng hoihtuanlou chi a kingaihsiat theih dingin ka gingta hi. Himahleh a lungsim in Jesu puanmong khoih leng dam ding in kigingta a, lamen ngap teitei hi. A ginna thupi kasa. Jesu mah inleng thupi sa ahi dia “tanu na ginna dampih na hi, khamuangtak in pai inla, na natna a kipan damta in”chi hi.
Thukhitna: Na dinmun na etchiang in sia sa lua mahmah, bangmah lamen nngap nawnlou leng na hi thei hi. Jesu ah lametna om hi. Nang geldan leh deihdan chetchet a thil hong pai khollou hial dinga, himahleh Aman a hihding dan leh a hun thei hi.
Leitung ah I lunggulh teng leh I deih teng Jesu’n hon pia khollou maithei hi. Himahleh, ke’n bel leitung ah ka deih, ka lunggulh bang hon hih pih ta se kei zong in, ka kha a hondam zou lotel chi in Jesu ah lametna ka nei lailai hi. Unau nang leng tua bang in na lamen ngap teitei lai hiam? Na khalam dam na ding in Jesu kiang zuan dingin ka hon chial hi.
