“Tuite tung ah na tanghou paai in, ni tampi nung a mukhe diing na hi ngal a” (Eklijiatis 11:1)
Khatvei singtang apan Lamka lam zin diing in ka kisa hi. Meh (vegetables) chi tuamtuam zinpak bangzahhiam ka kaikhawm hi. Ka kaihkhawm mehte (vegetables) lak ah, a mel etlawm lua hilou; a sia tuh hilou a om hi. Tuate koihkhiak a puaklouh mai diing ka ngaihtuahlai in, kuahiam khat in po diing in hon sawl a, “Lamka na naih semsemleh a manphatna (value) khang semsem diing ahi hon chi hi.”
Tuni a taang teel i etleh tuite tung ah tanghou paih diing chi hi. I gilvah ngah khit nung, tanghou tampi in manphatna nei tawm mahmah hi. Tanghou a manpha mahmah a, salam hinna diing a poimoh mahmah hi. Himahleh Tanghou sawtpi koih in a limna a kiamsak ban ah sesak hi. Laisiangthou in tanghou se pah thei hinapi in manphatak a sawtpi koih theihdan hon hilh hi. Bangchi a hithei diing hiam i chihleh tanghou tuite tung ah paih le’ng ni tampi nung a mukhe diing chi hi. Ni tampi nung a leng selou a om thei chihna a himai hi.Tua i khut a om lel gou-le-gam, sum-le-paite a bei pah diing, a mang pah diing ngen ahi uhi. Himahleh ni tampi nung a mukhiak nawn i lunggulh in tuh ginna toh i paihkhiak mah poimoh diing hi. A kipahhuai mahmah tuh tua nang khut a om lel manpha lua a leng kilang khollou, na muhkhiak nawn chiang in, a manphatna gen zoh vual hilou diing hi. Meithainu’ khut a paisa khat tuh mihingte’ etdan a manphatna (value) nei lianlou hi. Himahleh Pathian aa diing a piak ahihman in Pathian muhna ah a manphatna gen zoh vual hilou hi. Meithainu’ khut a paisa khat tuh bei haklou lo tel diing himahleh ni tampi nung a manphatna toh mukhe nawn diing ahihman in hampha hi.
Singtang a omkhate’n i thei diing ua, lou (field) lam ah maipuang/maisan a tam hun in kimawlna khawng in kizang ngam hi. Inn tut ahih chiang in, a manphatna hong khang a, meh dia i huan ban ah vok an diing in kisaat zel hi. Sum suah theihna mun (etsk. Lamka, Imphal, Delhi) puaktun ahih chiang in mel etlawm, etlawm lou chih leng hi nawnlou in, Maipuang/Maisan ahihman in manpha hi. Rev. Thangngur in “Vanmang nna sepna diing in, tuimal khat leh singkhuah khat thil simmohhuai chitengte zong, thangvan gam sum a suahtheihna,” chi in la a na phuak hi.
Singkhuah khat, tuimal khat manpha lo tel dia kituat lou hi. Himahleh Toupa’ gam nasepna diing a, mi’n a zat chiang in, a thupina taktak van a mu diing uhi. Tua i sum-le-paite, hih theih sunsun i chihte, i thuumnate, leitung ah a manphatna muchian zoukei mahle’ng, van ah a manphatna leh a thupina taktak kimu diing hi. Tua na khut a om lellel van a na muhkik diing bang na nei a? Unau! Toupa’n simtu khempeuh kul-le-poimoh a sak bang in hon houpih chiat hen aw! Amen.
