Keitu hichi sek ka na hi. Covid19 hipi leng sung a ka kiphawksuah bangzah hiam kon gen di aw
1. Pathian thu theinuam, Bible le sim zel. Mi thugen le ngaikhia. Hilele, ka zakbeh leh theihbeh nop zahzah a a zuih di lam awlmoh lou, awlmoh het lou ka na hi, chih ka kiphawkkhia
2. Kam in Pathian tung a kipahthu genna di tamlua ahi, genseng louh ahi khawng bang chisim zezen. Kipahthu genna thumna lah minute 5 le zang bei zou lou hizel.
3. Pathian tuh bangkim thei ahi chih gingta kichi. Hinapi a hiai hon pia in huai hon hihsak in chi a hilh zauzau zel. Aman bangkim thei ahi chih gingta taktak ka hih lebel, ‘ka hun paisa, tu hun leh tunung ding le theivek khinta na hih ziak in nang thuthu hihen’ chi a lungsim tawldam hithiat a om di hi awm tak. Hun tamtak a huchi lou
4. Ka hinna uh na hon hawisak a ka kipak chi in kipahthu ka gensek. Bang tan hiam nung in, hinna pen kei mimal a himawk lou, Pathian’ a, Amah hon kepsak hizaw. Huai ziak a ‘ka hinna’ chi a kineitu saktak a ngaihtuahna pen dik lou hi, ‘hinna na hon piak na hon kepsak lai a’ chihzawk ding, lungsim a leng tuabang a ngaihtuah zawk ding hita e chih ka phawksuah hi.
5. Tuabang mah in vualzawlna piak a omte, etsakna ding in taksa hiang tuamtuamte bang, nekzonna ding, silh-le-ten, nek-le-tak, tenna ding inn leh a sung a vanzatte khawng, Pathian’ hon kepsak hi a, a neitu taktak Amah hi a, kei bel a enkoltu lel ka hi. Jesun grape huan neitu khat in khohloh ding a mi kemsak a, aneitu in khual zinsan chih a gen bang ahi chih ka phawkthak hi. Tua toh kiton in kepsak a ka omte bang ka loh hiam chih dotna ka dawn hun om ding hi, chih kiphawkna in thawmhauna leh lunghimohna lianpi hon guan hi.
6. Justice, Mercy leh Grace chih thumalten ka lungsim mun luah mahmah uhi. Adiak in mercy leh grace chih bang, hehpihna hiam zahngaihna chihna, a gen uh akibang in ka na koih sim mawk a. Ana kibang lou hial hi. Pa khat in a tapa kiang ah, ‘Na thukhel leh kon zep ding chi in vauhilh hi. A tapa thukhel petmah a, tuaziak in zep ek taleh bel justice ahi. ‘Na thukhel teitei a, kon zep ding ka chih hinapi in kon hehpih ziak in kon zep dah mai ding’ chi leh bel mercy ahi. ‘Na thukhel teitei a, kon zep ding ka chih hinapi in kon hehpih ziak in kon zepdah mai ding a, phet lou in icecream kon khilai zomah di aw’ chi taleh bel, grace ahi hi. Huai ziak in grace kichi thumal in a gen zahngaihna tung a zahngaih sawn nawnna chi a ka na theihsiam pen dikzou lou a, zahngaihna tung a deihsak sawnnawnna chih ana hizaw chih ka phawkkhia hi.
7. Pathian mai a ding a, hiai khovel damsung a hon kepsak thilte bang ka loh hiam chih dotna dawng ding a sap a ka om chiang in, justice ngiat thei dinmun ah ka ding kei chih ka phawk. Ka siksan ding tuh grace ahi a, kei’ gen ngai lou a hon gensak ding tuh ka advocate Jesu Christ, kei ngetziak hilou Amah le amah a hong ki volunteer ahi a, thukhentu a leng pang zomah ding ahi chih hon hilhkhinta hi.
8. Tuachiang in hehpihna tung a deihsak sawnna ‘icecream’ tang in ka lengta ding hi. Aw nuamna in chia maw!
