Khovel ah mihingte hinsan (purpose of life) neilou a piang ki-omlou ding hi. Hinsan i genchiang in gendan tamtak omthei a, tuabang ahihkawm in i hinsan a i chianlouh ziak in tamtak kipaikhial thei a, i Khristian hinkhua ah lohsapna nasatak hontun zel hi. Huaiziak in i hinsan bang ahia chih tomchik in kikum lehang i chi ahi.
- Pathian in mihing a siam in Ama’ Minthupina ding, Amah phat a pahtawi ding a A siam ahi hi.
- Huaiziak in leitung a i hinkhua in a tup tuh Pathian Pahtawi ding ahi.
- Kipahna na neih chiang un, lohchinna leh nopna hun ah a chituan kei a, hinkhua a Pathian Pahtawi ding ahimai hi.
- Tamtak in kipahna leh nopna kia ah Pathian kipahtawi khasek a, himahleh lungkhamna leh haksatna i tuah hun in kiphun den hi.
- Huaiding hilou a, haksat hun leh nophun a Pathian pahtawi tuaktuak ding hizaw ahi.
- I hinsan i theihchetlouh chiang in i tung a haksatna leh lungkhamna hong tungte pen, ei siatna ding a tung kisa khanak hi.
- Tua hilou in, Pathian in hon suk haatna ding a hon tunsak ahi chih phawk gige deihhuai hi.
- Haksatna ah Pathian hehpihna kiching semsem ahi chih Lai Siangthou in hon sinsak hi.
- Natna, lohsapna, lungkhamna i chihte pen Pathian na i sepna ding a hon kisakkholh sakna, A thupina i muhna ding a hon thopna leh Amah pahtawina ding a A vanzat hizaw hi.
- Tuakia hilou in, a ma sang a Pathian toh kinaihzawk semna i neihna ding ahi hi.
- Job Bung khat leh Bung Nih ah i simleh, Job tanchin chiangtak in i mu hi.
- Job tung a haksatna pen Pathian in Aphal ahi a, himahleh Job in a kam in Pathian a gense kei hi.
- Huai naksang in haksatna a tuahma a Pathian a it sang in haksatna a tuahnung in Pathian a itna a lian semsem hi.
- Satan in a tup ahihleh Job suknat a, tua tungtawn a phunsak a, Pathian gensiat sak ding chih ahi.
- Satan inleng tuabang mah in i hinkhua a haksatna i tuahte tungtawn in Pathian pahtawilou a, thupina pelou ding leh gense ding in hondeih gige hi.
- Danial leh a lawmte meiphualpi a paih ding a a omlai un, 'Ka Pathian in hon honkhe ding ahi, hon hotkhiak keitaak lehleng milim mai ah ka kuun kei ding uh' a chi uhi.
- Haksatna i tuahte ah Pathian in hon honkhia in honkhe kei taleh, “Ka Pathian ahi” chi a Pahtawi ding ahi.
- I gennop bel, haksatna hun ah leng, Toupa kakipak… chi a thupina piak ding ahi.
- Damlouhna, lohsapna leh kim-le-kiang a vuina/ phunna ngen a i dimlai a, Pathian gensia a, phun i hihleh i hinsan hilou ahi chih phawk ding ahi.
- Tuate tungtawn a Pathian kiang a kipak chi a, amah thupina museem a, ama sang a itzaw a sihtawp dong a pahtawi dingte i hi chih mangngilh kei ni.
- Haksatna leh lungkhamna tungtawn kia a Pathian pahtawi dingleng ahikei hi.
- Siamsinna ah hiai hinsan pen vom gige le uh Pathian deihlou lam sem ngamlou ding uhi.
- Sepna leh nekzonna ah, i omna peuh ah i sep leh bawlte tungtawn a Pathian pahtawi ding ahi.
- I kampau leh omdan gamtat a Pathian pahtawi ding ahi.
- Hinkhua a i khosakna tuamtuamte' tungtawn a Pathian deihlam sem a, gen a nuntak ding ahi.
- Lohchinna leh nopna i tuahhun ah leng Pathian pahtawi a, Thupina piak ding ahi.
- Haksatna tawpkhawk i tuahhun a leng 'Toupa Hoih Hi, Hunteng In', chih theih ding ahi.
- Tuabang a haksatna leh kipahna hun ban ah, hinkhua a sep leh bawl khempeuh a Pathian Pahtawi theihna tuh Pathian ta hihna sulangtu leng ahi hi.
- Huaiziak in khovel vai ah i tup leh ngim tampi om mahleh, Pathian in hon piaksak nasan leh hon siamna san kan a thupi omlou ahihman in, tuapen i hinsan thupipen a koih ding ahi.
- I hinkhua a nuam leh haksa a Toupa Pahtawi hinkhua i zattheih kan a tangtawn daih ding kipahhuai leh thupi bangmah dang omlou ahi chih phawkthak ni.
- Kum bangzah I na phata a, kum bangzah i zangliamta a, i hinkhua enkik ni.
- Pathian hon deihna bang hinsan in i naneikha hia? Neikha nailou i hihleh panla thak ding in i kichial ahi.
- Pathian in lam-et bei, gimthuak leh vakvai di’a honsiam hilou i hi a, bangkim a Amah pahtawi a, thupina peding a hondeih hizaw hi.
