BCD Graduation Day 2021 message
Amasa in i it mahmah naupang tamtak te’n sihna hanmual a hon liamsan nung un, Saptuam leh Khovel in piching kum dia ana seh kum 18 bang kaitou thei ding a dam na hon pia a, hon makaih tu i biak pa Pathian min ka phat hi.
Tu in, kum 18 ching ta na hihman in, na ut leh ut louh thu hinawnlou in, Solkar, Saptuam leh khotang ah piching khat a sim na hita a, naupang bang a om thei na hi nawn kei hi.
Gari hektheih na’ng a permit neithei na hita a, election chiang a mahni deihteelna zang a na deihpen vote pe thei ding in phalsak na hita a, Saptuam in leng koppih neithei ding in zalenna hon peta hi.
Delhi a naupangte leh innlam (Lamka lam) a naupangte bel a khankhiakna uh a tuam dungzui in a kibatlouhna uh leng tam mahmah ding hi. Innlam a naupang kum 12 apat kum 17 kikalte bang a taangpi in ki nungak sak/ki tangval sak sim mahmah ta uhi. Huchihlai in, Delhi a naupangte bel kum 18 tan bang in leng a taangpi in nungak-tangval bang in om khollou ua, nu-le-pate mah in leng naupang kep a i keplai tam mahmah ding hi.
Huchihlai in, pichin nung a leng naupang bang a omom lai pen, a hoihlouh na lam leng tamtak om thei hi. Kum 18 phak nung nasan a mahni a kitoudelh ding tup a nei mahmah lou, i poimoh teng nu-le-pate’ kiang a nget det pen zahtakhuai ahihlam phoklou a omom khak theih ahi.
I saptuam in leng kum teng in naupang bangzah hiam piching a lalut in, Graduation service i zangsek hi. Kum 15 paisa sung lel a tuabang naupang graduate khete bang suizui hile, amau leh amau a kitoudelh thei a, sepna hoihtak nei bangzah a om ta ding ua?
India capital ngat a khosa, school leh college hoih taktak a khangkhia, vaipau-sappau lah mahni pianpih pau sanga nalzo, i poimoh vanzat (laibu, coaching etc) lah deihthusam a muh theih na, nu-le-pate’n lah a poimoh bangbang uh supply ziahziah thei khop a vualzawlna leh hamphatna tang! Huchihlai in, tup-le-ngim bang le neikhol lou, hampha hihlam nasan leng kiphok mahmah lou a hinkhua zang i hihkhak ding bel lauhuai hi.
Pathian deih dan toh kituak tup-le-ngim nei a (1 Johan 5:14), i hamphatna pen a phatuam theipen a zang khia a, Pathian adia mi manpha hithei ding in na maban paizel na’ng uah deihsak thu ka hon khak hi.
