Missionary Day a hong tun chiang in bang ngaihtuahna na nei seka le. Koilam na ngaihtuahna ah a hong lang sek a. Chih bel i gam sung ua tangthupha hong pua luttu Sapte lam maw. May ni 7 ban i ngaihtuahna uah a om ngei hia. Nang mimaltak bang, mission nna semtu poimoh tak khat na hihlam na kiphok kha sek hia.
Saptuam bing chiat in tuni chiang chiang, i septouhna uh mission field khong i ngaihtuah khaban uhia. Ahihkeileh July 9, 1983 ni a Unaupa Kamzathang khakiak simthu i zak un i ngaihtuahna uh bangtan hon sukha lai deh aw.
EBC Saptuam bang in kum hiaitan i sepnung in Saptuam pichingta chi in Karbi Anglong mission field i inntuan khia theita ua, Karbi Anglong a mission nna i septung uhleh Saptuam i inntuan tan un missionary bang zah bang in vasem uh ei de aw. Lohching mahmah Saptuam pichingtak dinkhiata i chihlai un semtute hoihna, kipiakzohna gen di khatle theilou maimah i dua aw i gen ngei het kei ua.
A mun a om Unau Karbite bang in leng missionary hiaizah i sawl lutte uh hoih leh thupi a sak uh gen di khatle nei khollou zomah uh hiale. I missionaryte uh vathupi khol hetlou lah Saptuam pichingtak, amau khe a ding thei ding khop, va dinkhia uh chih om thei di a diam.
Ei Saptuam in i sawl khiak missionaryte thupi ngaih khollou in ei sawl hikhollou tata bang thupi ngaih in gengen, gen chimthei lou i hi zaw uhia le. A sih nung chiang ua a hoihna uh leh ginomnate uh gen dia limsit i hi ua hialeh. Damlai mahmah in kipahtawi leng misi pahtawi sang in a phatuam zaw diam. A sihnung chiang un zaw azot uh thupina gama na pai masa leh a omsa van miten na pahtawina na unteh.
EBC Saptuam in Nepal Mission field bang leng inn tuan nawn dekdekta hileh kilawm. Missionary bangzah in vasem khata uh. Atanchin uh leh a vathuakna uh lungsim khoih pipi zaw om di eive maw. Innlam a hong pai chiang ua a report uh i ngaih khiakte uh mangngilhta i hi uh hia. Sapgam lamte a lah gendi i hauten sek ua maw.
A field a vasihchilh missionaryte ngaithupi deuh i hi uh hiale. Vasihchilh sese lou a Saptuam pichingtak vadin khiate thupi sa khol lou maw. Galdou na a vakuan a vasi khate thupi i sakleh galdouna a zohna tanga damtaka hong kikte thupi zaw semlou du hia maw.
Ei zaw inn tung nailou i hi. Inn i tun chiang in Toupan hon na pahtawi samta ding hi chih toh chauh i missionaryte uh kinem sak den ding i hi di uam. Amaute a ding in leitung a damlai ua pahtawina piak kilawm lou lua a hi khol dia hia. Sahkhua dang biaten lah pahtawi malaka na sawisa, na vaulau gige zomah ua. Leitunga amaute pahtawi a khamuan ding eiloi lou ngal kuamah dang neilou uh eive.
Mission field a vasihchilh kha unaupa Kamzathang bang hong hing kik guih hileh Saptuamte kiangah bang gennop a nei de aw. EBC ten mission worker din lah non la kei ua, missionary day na zatteng un ka tanchin thupi taktak in na gen zel ua khong hong chi maimah diam maw.
Mission field bang hun khoptak nei chiat thou hihanga, Saptuam tuamtuam ten Unaupa Kamzathang ban ah, missionary dangte tanchin bang taklang theizel le theihna kibehlap lah hi ding in khalam leng hon chou thei tampi om dia lamen hi veng aw.
Hiai thute khong tuni missionary day ahih toh kitawn in ka ngaihtuahna ah a hong om nilouh hi. Kuamah mohsakna lam hilou in i missionaryte uh kuateng, mi bangzah in thupina gam ah hon na paisanta ua chihleh kuateng khong in semlai, Unaupa Kamzathang banga mission field a vasihchilh leng om hi veh uh aw maw, chih khong ka ngaihtuahna ah a hong om nilouh man a kon gelh pupuih nilouh ahi.
A vakuan khiate leh inn mun a pan a thumna leh thilpiaka na pangtute lungsim mun khat a semkhawm thei a, gah tampitak suang khia a, kipahtawi tuah thei ding in Pathian in a khasiangthou zang in eite tungtawn in hong semzel hen chih ka thumna na hi.
