Ahihhang in hamsiat thilte toh kisai in, Isarelte muanhuailoutak in a gamta uhi. Juda nam a Zera ta Zabdi, huai tapa Karmi, huai tapa Akan in thil muhdah a kipan a na lata a: huchi'n Israel suante tung ah TOUPA a hehta hi.
Joshua 7:1
Tawmchik leh neuchik i chihte mah in i hihna kilang chiansak hi. “Hiai leltak” chi'n i thulimsim kei ahi maithei. Himahleh, tua leltakte mah a i muanhuai louh ziak a, hichileltak na kihi sek hi! Ahang bel, Toupa' mit ah a neulua omkei a, a lianlua zong a omkei. Tawmchik tung a i muanhuai kei leh, tampi tung ah i muanhuai kei ding, chih thudik Toupa'n thei gige hi.
Israel mipite ading in Akan leltak in bang poimohna nei ahia? A utdandan in na omleh himai lou maw! Pathian' chihdan a utleh zuikei heh aw! Amah leh Pathian kal ahilel aka! Huai Babulon puanhoih, dangka leh dangka-engte a deih leh bang poi ahia?
Poi tham e! Toupa'n laklouh ding a chih tuh laklouh ding ahimai hi. Tawmchik ahihziak a poi thamlou ahi kei a, Toupa' thumanlouhna ahihman in a poi vek hi. Toupa' muhdah leh hamsiat thilsawk khakna ahi (Jos. 6:16; 7:1). Pathian' min thupi zahlaksakna ahi. Ai khua neuchik mai a zahlakna leh vuallelhna zumhuai ahi a, mi 36 luang kikhamna ahi!
Hiai mi 36 site na ngaihtuah ngei hia? Nam ading a mi galhat hangsan vive hiding uhi! Nam ading a supna thupitak ahi. Tua phet hilou in, a sihsan uh innkuante na ngaihtuah ngei hia? Innkuan 36 ading supna ahisawnsawn lai hi. Tagah meithai inkuan kibehlapna ahi.
Akan leltak khelhna hih a poi ahi! Akan' muanhuailouhna tuh “Isarel' muanhuailouhna” chi'n a kigen hi (Jos. 7:1). Akan' khelhna ziak in, “Israel in a khialta!” chih thu ungzinhuai Toupa'n a genkhia hi (7:10). Isarel nam pumpi'n a thuak tel mai!
Nam makai Joshua leh mipite' lak ah kahna a hong tung hi! Jerikou tung a vualzou a hanla sapa himahleh, tu in, vuallel kingaisia in a khupbohta! Amah kia hilou, nam pumpi ah lungkiatna thupitak a hong tung hi. Jerikou kho thupi thupitak zou a, vualtungtuang nam, mite lauh leh huphulh nam na hita mahle uh, Akan ziak in, thahatna neilou “tui bang lel a zul” nam a hong hita uhi (7:5).
U-le-nau leh nu-le-pate aw, nang leltak, kuamah theih batlouh bang in na kingaihtuah ahimai thei. Kei leltak khelhna leh thulimlouhna thilhih (kuamah hon muhlouh a) in ka nam leh gam ading in bang poi ahia? Na chi mai thei. A poidan Akan khelhna apan i simkhinta. Eite adia sinlai hiding a LST a Pathian in a koih ahi.
Kingaihtuah a poimoh hi. I niteng hun zatna leh seple-bawl ah, Toupa'n hon ensim gige ahi, chih mangngilh kei ni. Tawmchik tung a i muanhuaina leh muanhuailouhna in thu tampi gen ahi chih mangngilh kei ni. A poi thamlou khelhna leh muanhuailouhna chih omlou ahi. Toupa'mitmuh ah na siang hiam? Aman hon mu ahi. Hon thei ahi, chiamteh ahi. David in kichiantak in a gen, “nang ka tut leh ka din na thei naknak a, ka ngaihtuahna tuh gamlapi akipan in leng na thei… ka pai leh ka lup non en zel a, ka omdan tengteng na thei vek hi” chi hi (Sam 139:2,3).
Huaiziak in, Akan bang in, i innkuan manthatna ding, i beh leh phung, i namte' minsiatna leh zahlakna ding i semkha ding e! Khatveivei, nam siatna i gen chiang in, ''huaite mahmah” chih abaihlam hi. A diktak in, Akan bang a selguuk khelhna nei kawm a, a pawlam a siang mahmah bang a kilang mite ahi, Toupa'n a muhdah. A langtang a khelhna hihmite toh! A poimoh bel, nang leh kei, i nam pumpi zahlakna leh vuallelhna ihikha ding, chih ikivel ding ahi! Toupa' min thupi leh siangthou gensetu leh daisaktu ihikha ding e! Kivel chiat ni. I gam leh nam ading in Akan hih sawm kei ni!
Photo by Gift Habeshaw on unsplash.com
