“…ka gil a kial in nek diing n’on pia a, ka dangtak in dawn diing n’on pia, vuaktang a ka om in puan silh diing n’on pia a, mikhual ka hihlai in n’onna zintun, damlou a ka om in n’on enkol a, suangkulh a ka om in n’on veh chi”
- Matt.25:36
Tukal paita a Bangaluru a thiltung i na zakkhak ka lamen hi. Kei adia ka tanau nai ‘gang’ chi a ka sap, nidang a ka kholui ua teenkhawmpih, tua a tate beel a Bangaluru a om lel pu Khualkhanpau Gualnam, kum 88 a upa, ni 3 vel inn apan pawtkhia a “mang” chi a a zon nung in February 15, 2023 zingkal in Kms. 30 vel a gamla ah damtak in mukhia uhi.
A tanchin hon genna uah amah taksa damtheitak himahleh khozakna tasam mahmah hi. Chim lo sam hi diing ahihman in gamla lou khawng va pawt zel in hong tungkik pahpah chi uhi. Huai ni in a innkuante thoh ma in a na pawtkhia a angeina bang sa in awlmoh khollou uhi. Eimi kinaihpih deuh khat om ua huai ah hoh zel a an bang leng va ne den sek chi uhi.
Huai ni zingkal baihtak a pawtkhia nitak khomial tan a hong tunlouhtak in a tate’n huai eimite a dot uleh, “Tuni na pa hong hohlou hiveh aw,” a chihtak un patau in police leh Bangaluru a eimi WhatsApp group tuamtuam ah kapkhia uhi. YPA Bangaluru in leng theihtawpsuah in pan a laak nung un a ni 3 ni zingkal baihtak in Hmar-te innkuan khat in a na mukha ua, mimang om chih WhatsApp group apan a na theikha uh ahihman in hiai hi ngei diing chi in innkuante contact ua, huchi in va pikik uhi.
A gendan un amah mang ahihlam leng kithei khollou, khopi sung a vaakdan in kingai chi ua vaite a na mukhate’n awlmoh in an khawng a na pe zel uh chi hi. Huan vaite mah in a inn bang uah a na giaksak in an a na pia uh chi hi. Huchia ni 3 bang tuh gilkial-dangtak lou a va survived-dan ahi, lamdang mahmah. Vaite’ mihinpihte itdan hiai ah kilang mahmah, ei lak khawng ah namtuam hichi dan omleh bang i loh de aw, hon chisak mahmah.
Ahihleh tuni a i gen nop tuh hiai a meltheih louh ginatak a leng ki-communicate-pih theihlouh vaite’n hichi bang a itna toh a na keem a an bang a na piak ban a a inn tanpha ua a na giahsak uh lamdang mahmah ka sa hi. I Laisiangthou taang teel a Jesu’n ka gil a kial a an n’on piak ua… mikhual ka hihlai a n’on zintun uh a chih hiaite khawng a hi mai diam chih in om hi.
Hotdam a hi diing uh leng zaw chi khang, lei vualzawlna beek zaw ngahloh maithei uh maw… Jesu’ min a hih bang hi le uh nak manphat na tel inchia!! Ginglou mite’n a nasep hoihte uh, leitung lou mundang a kigenna diing omlou hi. Khristian-te’n thilhoih i hih chiang un, Jesu min a thilhoih sem i hihman un thupi petmah hi. Leitung ah i thilhoih hihte phawkphak leh phaklouh a thupipen hi zolou in, vangam tan a kigen diing leh kipahman Pathian mai a i sanna diing hizaw ahihman in thupi petmah hi.
A tunglam a pu Khualkhanpau Gualnam’ tanchin tomchik i gente bang in mihinpihte itna leh lainatna nei dia hon sinsak ei Jesu nungzui kichite aa di’n zillai hoihtak hon pia in ka thei hi. Jesu tung a hoihna leh siamna i taklat theihna tuh midangte poimoh leh taksap hun a panpih ahi. Toupa’n simtute hon vualzawl chiat hen aw!
