Covid-19 hiileng ziaka hih diing leh hih louh diing gen a omte – khut, sahbon a sil zihzeh; khut a mit, nak leh kam khoih louh; mi tawh omkhawmna mun a kikaak zek a om; khuh & hahthiai cianga romol a kam hum hiam, tongkiu bek a kidal; tuilum dawn tam; damkei zekleh midang tawh kisukha lawlou a om (kikeptuam) leh adg.dg. Ganhingte gentaklouh, vansawltakte sanga sangzaw a bawl, ei lei mihingte’ theih leh zuih di’a kilawm him ahi. Lah, I na limsak khak khollouh sekte uh ahi a….
Kamsang Isai in, “Bawngtal in a neitu a thei a, sabengtung in leng a pu' an piakna a thei: Israelte'n bel a thei kei uh, ka mite'n a ngaihtuah kei uh…” ana ci (1:3). Thukhun Lui ah Pasian namteel ‘Israelte’ in Siamtupa a ngaihsak louh ziak ua ana phutkhak touh uhleh tuhun khang (generation) hong KINAIH sim. TOUPA’N, “Ka mite'n thil nih a hihkhial ngal ua, Kei, hinna tuikhuk a hon paisan ua, tuivungte a toukhia ua, tuiching, theilou ding” ana cilai hi. Thukhun Thak hun, Khawvel Hondampa JESU Khrist hongpian, sih leh thawhnawn nung in bel, A’ min (Jesu min) gingtate Pasian’ tate (Pasian teel nam) suahtheihna piak in I omta. Juda & Jentel, mimawl & mipil, azawng-ahau KHEN a omta kei.
“Amah tuh Khrist a noute hinna nak ahi; huan Pasian in Khrist tuh i pilna bang, i diktatna bang, i sianthouna bang, i tatna bang hi di'n a bawlta” (1 Kor. 1:30). Hallelujah!
Mihing in ‘gawtna’ I cih cia’n itna leh hehpihna tellou/ panglou ‘gamtatna’ honglang sek hi. A taktak in Pasian akipan ‘gawtna’ (taihilhna) bel, bawlhoih tupna, om diing banga omlou khat thununna – itna nasep hilai ei, guai. Ets. Jona hinkhua. “Ka ta, Toupa sawina ngaineu ke'n la, A taihilh a na om in leng lungke tuan ke'n. Toupa'n a itte sawi nak a, ta akipahpih tuh a vaw nak hi” (Heb 12: 5-6) cih gelh ahi. Leitung mihingte’n ‘Pa’ khat I nei, lei leh van Bawlpa, vanglian tung Pasian. He is the great Creator, the great Designer. Ama’n, Amah dungsun a Abawl lei mihingte it mahmah hi. “Ngai un, Pa hon itna thupi hinatel e…” (1 Johan 3:1a). I tunga thiltungte leh I phuttouh lelte le, Amah mel zong khat I hihleh, A thupina kilatna di hithei uh hiveh aw (Rom. 8: 28).
Pasian apan (thumanlouh khelhna hanga) khenkhiak a om mihingte, Jesu Khrist tawna ‘Pasian ta, Pasian innkuan’ suak nawn chauh hihang. Huai Jesu Khrist, Nazareth khua a tangval melhoih, tawh na kituak khata hiam, sanggam? Amah tawh kituak khata na hihleh, Amah na maingat den hiam? Amah tawh kituak kha (encountered) mi khatpeuh hinkhua kikhek, kilamdang lou om nailou ahi. Jesu Khrist hihna, kamsang Isai in, “Lamdang, Lemthei, Pathian Hat, Khantawn Pa, Lemna Lal” (9:6) na ci a, Thu sa hongsuak, Amah hong kigen cia’n, “Keimah tuh Lampi, Thutak leh Hinna Ka hi,” ci thriai mai hi. Wow!
Mihingte kia loungal hilh ngai OMLOU… A hilhtu di OMSUN Jesu Khrist (Lampi, Thutak leh Hinna), tua Jesu nungzui, gingtu masate mite’n bangci’n a thei ua? “Khawvel lumlette”! Jesu Khrist tatna hamphatpih a hinna kipumkhek, Kha Siangthou hilhpilna tanga hinkhua zang mualliam zelte hidi’n, simtute, TOUPA’N thupha hongpe tekta hen!
