Jingkal teng a i theihnop masak pente uh thuthak/ tanchin thak bang a om a? Newspaper te’n bang a gelh ua, bang thil koisan ah a om in a tung zel a… chih ahi. Mi tengteng bildoh leh zaknop thute a thei masa leh gen masa a pangte tuh mi’ sanga pilzaw leh teizaw dan leng ahimai uhi. Tuni a gen ding a kitelkhia pen tuh kum teng a Khristmas hun chi’a kisim kha sek Laisiangthou leh kigen kha sek thu hoih leh manpha, mi kuapeuh a gingta phot adi’a suahtakna tuntu leh Hotdamna thu ahi.
Tukum Khristmas zatdan bel kum dang toh kibanglou leh chi tuam mahmah ding abang, biakna program biakinn a kizang zelte, lenkhawmna leh ankuangluina i neih zelte uh nei thei lou ding i bangta uhi. Kumdang a nuam lou I sakte khawng na-ngawn ngaihhuai hong suakta uhi. Tukum in bel biakinn a biakna program online hiam Livestream a hihtheite a hampha leh program nei thei minpu khat hongsuak ding uhi. Himahleh hiai bel duhthusam hilou, ei utdan tak tuh biakinn mun a vapai chiat ding, biakna program buchingtak toh biakna hun saptuam milip kimtak a neih khawm ding chih ahi. Hiai bel leitung pumpi hiipi in honnuai tak man in manglam gam toh hong kibang maimahta hi. Nidang Khristmas ni a vuah hongzuk lel leh leng nuam lou I sak toh tehtheih vual ahih louhdan i thei uhi. Kum dang leh hun dang in biakinn, lenkhawmna mun leh kholai ah aneu-alian in i zang ua, tu kum in tuh “mahni inn chiat ah” innkuan kia toh zat ding a hong hita, phattuampih chiat sawm ni.
Tuni a i tangteel, “Mi chih ading in tanchin hoih” (Lk.2:10) na thu anuai a bang in gen le’ng:-
THUGENTU: Laisiangthou a i muh bang un tuni a I tangteel hon gentu tuh ANGEL ahi, hong kipatna tak tuh van Pathian kiang ahi a, gen ding thu petu leh a sawlkhetu tuh Pathian, bangkim thei, bangkim hihthei leh munteng a om, ompatni nei lou, beini nei lou ding Pathian hing ALPHA leh OMEGA ahi.
A THUZATUTE: Michih ading a tanchin hoih kipahhuai mahmah Angel in a gen zatu BELAMCHINGTE ahi uh. Hiai belamchingte bel khopi sung a teng a inn nuamtak, nek leh dawn limtak, lupna nuamtak, leh gari hoihtak tak a kitholhte ahi kei uhi. Kaisar Augusta in khovel tengteng minkhum ding thu a piak lai a leng min khum ding chih himhim a buai pha banlou, khovel in leng a theih phak bat louhte, mi nuainung, namniam (out of the margin of society) te ahi uhi. Hiai mi nautangte nuai-ate, khovel in a theihbat louhte uh van sangpen a om Pathian bangkim theipan a na thei a, Angel sawl in a kiang uah michih ading a tanchin hoih kipahhuai mahmah va-gen sak hi. Mihing, bangkim thei loute, thil bangkim hih theiloute, leh munteng a om thei loute sawl hileh zaw kumpipate kiang bang, mithupi leh mipil te kiang banga vagen kha ding hive’n. Pathian lemgelna thupi leh thuktak ziakin nang leh ke’n “michih ading a tanchin hoih” kipahhuaitak i na zak theih manphana maizen e, Toupa eidi’n hoih hina tel e!
VAN MIPITE PATHIAN PHATNA: Belamchingte kianga Angel thugen I tangteelna ban ensuk lai le’ng, “Tuni in nou ading in David khua ah Hondampa a piangta, amah Khrist Toupa ahi,” chi’n gensuk suk hi. Tua laitak in Angel kiang ah van mipi hon hong omkhawm guih ua, Pathian a phat uhi. Belamchngte hampha na maizen tel uh e, leitung a lapawlsiamte zong thupi I sak luat lai in, van mipi hon Pathian phatna zatu leh mutu ahi uhi! Namniam, nam tuantual, officer leng hilou, nekzonna simmohhuai tak toh innkuan vak leh enkol na hihleh leng, lunglel ken. Nang kiang ah zong Toupa’n van Angel honsawl ding thasial hetlou ding ahi. Michih ading a Tanchin hoih kipahhuai mahmah a tangtu leh a kipahpihtu apan ding kan a manpha khovel ah omlou hi. Huaimah tuh khovel hauhsaknate’n lei zou lou ding hilai hi. Innlum a leng giak ban nawn lou, innkuante toh ankuang umkhawm nawn lou, kholai a lawm-le-vual lak a leng simtel louh na hita phial zong in, munteng a om, bangkimthei Pa’n na tut, na din honmu in hon thei gige ahi chih mangngilh ke’n; A’ kiang zuan lechin na poimoh teng Ama’n nei hi.
BELAMCHINGTE THUPUKNA: Angelte’n van a apaisan tak un belamchingte’n, “Tun ah Bethlehem khua pha in pai lehang, Toupa thu honhilh hongtung i en ding uh” a kichi uhi. Huchi’n apai mengmeng ua, Mari toh, Joseph toh, gan anpiakna kuang a naungek lum ava mu uhi. A vamuh un naungek tanchin angel in ahilh a gen thangta uhi. A za peuhmah in belamchingte thugen lamdang a sa mahmah uhi. Toupa Pathian’ aw (voice) zate thugen tuh pilna thu ahi kei a, siamna a sinkhiak leng ahi sam kei a, Toupa apan ahihman in, mi a suk khakdan atuam a, mite’n zaknophuai, ngaihnophuai a sa uhi. Belamching mimawlte thugen a za peuhmah in lamdang sa uhi. Belamchingte’n Angel hilh bang ngei a bangkim a muh ua a zak ziak un, Pathian pahtawi leh phat kawm zel in a kiknawnta uhi. Ei pilna thu leh siamna thu hilou, Toupa Pathian apan thu tungte midangte hilhsawn thei di’n Toupa’n michihte a Khasiangthou thopna thak tutung Khristmas ah honpe chiat hen!
