Mial in lei a tuam lai a van vaak, simlei honsun, Jesu Khrist min manpha tawh chibai aw. Tutung a tunga thulu kipia pansan in saulou kikum le’ng ci I hi. Thugelh thutuunte TOUPA’N sathau hong nilhsakta hen!
British India, gam khat a omlai UK Vaihawmna Innpi theihpih a India leh Pakistan a phelkhap honghih ciang in (15.08.1947), M.K. Gandhi lungtang na mahmah hi. Gandhi’ vei dungzui in India leh Pakistan kikal ah kilemlouhna maisak theihlouh leh kilungsim-uina om hidan in a lang toutou. India/ Hindu leh Pakistan/ Muslim in lainatna (compassion) poimawh hi.
Tunai a video clipping viral muhkhak khat ah, India PM Pu Modi in mi pawl khatte khe silsak in Bible thu pansan in phuisam zong nei hi. A phuisam tangpi: Tanchinhoih Luka gelh a I muh bang in, mizawngte’n a poimawh uh hehpihna (pity) hilou in pomna (acceptance) ahi, Jesu’n A ci. Jesu mahmah inle mizawngte adi sepsak in a thilhih uh phat ahi. Hiai tawh kizawitawn tangthu khat om. Temple sumthawhna kiang ah Jesu ding a, mi hausa hongpai a sum tam pipi thawhte mu a, meithai khat sumsik nih (2 coins) thawh a hongpai le ana mu hi. Sumsik nih I cih mi hausate thawh tawh teh di’n bangtham hilou hi. Ahizong, Jesu’n, hiai meithainu’n thawh tampen ahi, a neih khempeuh thawh ahihman in, ci hi.
Luka 19: 41-44 sung a I muh, Nipini paita a le mun khenkhat a genkhak a om, Jesu’n Jerusalem a kahkhum lai-a A’ lungput, lainatna lungput hi-a, huan, Tanchinhoih Marka gelh a I muh Jesu’n, nek diing neilou mipi asang-a-simte A vaakna ah zong mipite lainatna lungtang tawh en hidan in Bible siamte’n gen uhi (6: 30-44 & 8: 1-10). Lainatna (compassion) kammal bel, a gen thuuk tak om; a thumal (compassion) laakkhiatna, Latin kammal, a gentup thuakkhawm (co-suffering). Collindictionary.com in, “…a feeling of pity, sympathy, and understanding for someone who is suffering” ci’n na hilhcian hi.
Veh a omlam theilou, taksap nei ‘Jerusalem’ leh taksap nei, gilkial mipi 5000/ 4000 vualte a muh in Jesu Khrist in ‘lainatna mit’ tawh en hi, ute-naute. TUNI’N ei hotdamta, Jesu nungzui Khristian kicite’n taksap nei khawvel, adiak in gamsung vaihawmna tutphah a tute thuguan leh thusuahte - Esk. Yoga Day, Janata Curfew, minit kua sung mei mihsak, leh dg.- bangci’n I na en a/ ua, cih kidong kiik ni maw.
Pu Modi leh a khawnbawl upate'n ciktan thuneihna tawi a phualpi solkar vaihawmna len di uh, cih kitheilou, huai tutphah a tusaktu le ‘ei’ kihilou.Pasian Thu lou in kuamah in vai hawm lou, thuneihna tawilou hi (Rm 13:1) cih i pomkip hi. Tua kawm in, vaihawmtute’n thusuah honbawl uh hiam, zuih di hon-gen uh om hun in,nuihzabawl hiam 'zeldim thubawl' khak di pilvang mahmah le cih I gen ut hi. Pu Modi leh a vaihawmpihte’n zong lainatna poimawh uhi.
Buaisuukpi in hon nawk cia'n, ginna/ thu-up tawh kisai toukouhna i nei ciat hi. Esk. Jona tuanna long a tuangte, leh adg. TUHUN Corona Virus hiileng apan bangci suahtak di,cih dotna gol ahi. Tua dungzui in Hindus, Muslims, Buddhists, Christians etc. te'n tou kouhna leh panlak dan i nei ciat hi.
(i) 22/03/2020 - Janata Curfew, zinglam dak 7 apan nitaklam dak 9 tan, innpua kaanlouh himhim di;
(ii) 05/04 - 9PM apan minit 9 sung mei mekmit, tua hunsung mombati/diya/mb flashlight vaaksak di.
Mihing ngeina hihtheih pellam (supernatural power) khat hong kigolh om ngai, tua di lunggulh leh lametna tawh panlakna om (leh hong omtou zel lai diing) te pen Khristian sahkhua douna hiam, ahihkeileh, Hindu sahkhua-a hiiplut sawmna om ziak … cilam a i laak pahpah leh, dik khin lou kha diing hi. India solkar vaihawmna lente bel Hindu sahkhaw zui,khawvel pilna leh Hindu sahkhua sinsak latuah/ lakop a honpi leh honpi zom zel lai di. Hihthawh phot uhi.
Suangpi tunga innlam leh sehnel tunga innlam, Jesu'n a gen a om. Eite bel Suangpi kip tunga innlamte i zenzen ve uale. Hinapi, vaihawmna len, sehnel tunga innlam hia I theihte panlakna peuh hisusuih (dissident mentality nei) i na hih khakleh, gam vaihawmtu (dinna kiplou) tepoimawh LAINATNA mit tawh en kha nai lou, lainatna tawh thumsaktu (intercessor) hih diingna zangkhe kha nailou hi zenhouh cih thil omthei ahi. Pilvang ni. Gul banga pil, Vakhu banga nunneem diing bel ahi.
“Bangmahlou ah mangbang kei un; himahleh thil bangkim ah, thumna ngetna, kipahthugenna toh na ngetnate uh tuh Pathian kiang ah theihsak in om hen” (Philippite 4:6) cih gelh ahi.
I makaipa Jesu Khrist hon sinsakna apan ciang mahmah muhtheih om tuh, Amah sinsakdan tawh kituak lou/ kikalh phut khak hun in kamsim hun (silent period) a om diing, huan, dawnbulh hun (confront) le. A tom in, Matt 5: 38-48 ah bang kamsim hun di ciangtak in hon na hilh a, huan, Matt 22 ah Thutak a kibulphuh kawm a piltak a dawnbulh geihgeih di hun. Jesu & Pharisaite (t. 15-21), Jesu & Sadukaite (t. 23-34), Jesu & Laigelhmite (t. 34-45).
Tuhun, Lai Siangthou sinsak thute theih hoih banah India vaihawmna lente’ bible “India Danbupi” theih mahmah poimawh hi, adiakin sakhaw zalenna lampang thute. Tua banah, ei omna pawlpi sanga lianzaw Indian evangelical pawlpite tawh,panlakdan kithumuh, kizopna tuibuah zelzel; vakhu banga nunneem, gul banga pil, simbu banga hah li-le, lungtang a van a Pa tawh online den cihte poimawh hita. Tuabang ahihleh patauhna di om kei, eilam a om Pa lianzaw a, Ama’n kamsim hun di leh dawnbulh di hun hon theisak di’a, huai le lainatna (compassion) tawh hilai di hive’n. Selah.
“Everyone needs compassion
A love that's never failing
Let mercy fall on me
Everyone needs forgiveness
The kindness of a Saviour
The hope of nations”
(Ben Fielding and Reuben Morgan)
