Tuni in i Bible taang teel (Lk. 21:1-4) apan nidang a etdan hilou in etdan chituam deuh in en le’ng chi i hi. Jerusalem Temple ah Jesu a omlai in Pathian be diing a hong pai mite’n Temple sumkholna (Temple Treasury) ah sum a khiakte uh a na en nilouh hi. Huchihlai in meithai zawngtak kuahiam khat hong pai in dal dangka muza nih hong khia hi. Bangkim thei ahihman in, Jesu in hiai meithainu’ khiak zah a polam apan in leng musuak hi. Huai kia leng hilou in, hiai meithainu in sum a neihzah leng Jesu in thei hi. Jesu in, “Chihtaktak in k’on hilh ahi, hiai tengteng sang in tua meithai zawngtak in a khe tamzaw; hiai tengteng in a neih leet uh a khia ua; ama’n bel a kitundingna diing a a neih sunsun a khevek,” a chi hi (Lk. 21:2-4). I Paite’ Laisiangthou in kitundingna diing a chih a khosakna diing a a neih tengteng khia ahi (put in her entire livelihood). Laisiangthou in hiai meithainu tanchin a ban gen nawnlou ahihman in bangmah kitheihbeh nawnlou hi. Himahleh, gamdai a mana a Israel-te vaak (Exodus 16) leh va-ak zang a a Jawlnei vaak (1 Kumpipate 17) Pathian in a nek diing pe diing in gintakhuai hi.
Hiai taang apan thilpiak toh kisai thugen bangzahhiam i zata diing uhi. Tuni in Temple point-of-view apan in hiai taang en le’ng i chi hi. Huai i theihsiamna diing a poimoh thu bangzahhiam i en masa diing.
I. Thukhunlui ah Genthei leh Meithaite adia Panpihna Thukhunlui ah gentheite panpihna diing toh kisai ngaipoimoh mahmah hi. Pathian in Israel-te kiang ah a lou (field) ua haigah a laak chiang ua lasiang sipsip lou diing leh gentheite aa diing siit diing in thupia hi. Leviticus 19:9-10 ah hiai bang in gen hi, “Na lou ua buh na laak chiang un, lounawlzulte tan in na la vek diing uh a hikei. A sang leng na zong diing uh a hikei. Na grephuan uah a sang na zong diing uh a hikei. Na grephuan ua a gah kia leng na tomkhawm diing uh a hikei. Mizawng leh gamdangmi aa diing in na hawisak ding uh ahi. Kei TOUPA, na Pathian uh ka hi,” (Deut. 24.19–22 ah leng sim in). Sawm-a-khat piakdan toh kisai in leng kum thum a chin kum in huai kum a thilpiang tengteng ua sawm-a-khat a koihkhopte uh “Levite leng, na lak ua tantuan, goutan leng neiloute leh gamdang mite leh pa neiloute leh meithaite’n a ne diing ua, a hong khosa thei saam diing uhi. Huchi in Toupa na Pathian un na khutkoihna teng uh a vualzawl diing hi,” (Deut. 14:28-29).
II. Jesu Hunlai a Genthei leh Meithaite adia Panpihna Thukhunlui hun a thupiak abiik in lou (field) a haigah toh kisai khopi ah kizang thei nawnlou ahihman in, Thukhunthak hun in gentheite panpihna organized tak in sai in om hi. Huaite ahihleh tamhui leh quppah kichi hi. Tamhui ahihleh niteng a inn-le-lou neiloute aa diing bik a nek-le-dawn toh kisai ahi. Quppah ahihleh kaal teng Sintawpni (Sabbath ma ni) a sum leh van tuamtuam hawmna ahi. Huailou in temple ah thipiak lakkhawm in om a, huai tungtawn in Temple in gentheite pahpihna leh Temple huangsung ah neek diing neiloute aa diing neek diing bawl uhi. Israel-te aa diing in Temple in mun poimoh mahmah luah ahi. Israelte aa diing in Temple ahihna uh (identity) genna ahi a, Pathian’ omna mun leh tenna mun ahi. Israel-te aa diing a Temple pen vaihawmna munpi kia hilou in a economy ua diing a leng a centre uh ahi.
III. Meithainu’ Thilpiak Hiai a tung a a thute pansan in i taang teel (Lk. 21:1-4) etdan tuam in i en diing. A tangpi in meithainu’ point-of-view apan ki-en tangpi ahihman in, a thilpiak thupidan i gen tangpi uh ahi. Etdan diklou chi hilou in etdan tuam a etsawm hizaw i hi. Jesu in meithainu bang a nungzuite’ i neih tengteng pe vek diing in hon phuut diing in gintakhuai lou hi. Michih in a neih uh leh a phal bangbang ua thilpiak pe diing a hilh a omte i hi uhi (2 Kor. 8:12). Nungzui masate leng phutluih hilou in a phal bang un pia uhi (Nas. 2:43-47; 4:32-37).
A tung a gensa bang in Temple’ point-of-view in i en diing. Thukhunlui leh Jesu hunlai in gentheite leh meithaite panpihna diing daan tuamtuam nei uhi. Meithaite lam a pang Pathian ahi (Exodus 22:22-24). Amaute nelhsiahna ngaikhawk mahmah Pathian ahi (etsk. Isai 1:23; Jeremiah 7:5-7; Zechariah 7:9-10). Hiai bang a Pathian in gentheite leh meithaite a ngaihpoimoh mahmahlai in hiai a meithai khat in Temple puahna diing a sum a piak pen Temple aa diing a zahlakna tawpkhawk ahi. Temple in gentheite leh meithaite a hum a, tasam a koihlouh ding ahihlai a hiai a meithainu in a neih tengteng Temple puahna diing in va pegai hi.
IV. Thukhitna Hiai apan in bang sinlai i mu thei dia? I tawndawn uah mipanpihna nei nam, phattuamngaihna tawisang nam i hi uhi. Ankhing-mehkhing kihawmtuah leh meikuang paisuak diing gentheite leh meithaite panpih namte i hi uhi. Hiai bang a tawndan hoihtak nei i hihman un, ei lak ah khutdoh muh diing omlou hi. Huchihlai in hiai phattuamngaihna i tawndan ua om pen mimal leh saptuam ah etthak a poimoh diam chih in om hi. Angmasialna ziak a i minamte’ gentheihna muban nawnlou a omkha i om uhia? Pawlpi khatpeuh leh Saptuam hitaleh, thohlawm piak diing i hahgen tuk un tagah leh meitheite lam ah banzakna bangtan ah i sukha ua? Meithainu’n a neih tengteng a piak i kipahpih tuk un hiai meithainu aa diing in mimal, pawl, saptuam bangzah in i pang ua? Hiai a meithainu’n a neih teng a piak nung in neek diing neilou in si taleh, kua a moh ta dia? Simtute Pathian in hon vualzawl hen.
