Lungsimlam Natna Bangchik Chiang A Thulaak Diing Ihi Ua?

Thumapi:

Mihingte adiing in sihna pen nikhat i tuah diing mawng ahi, tua di’a Pathian in hon bawl ahi chih theihtelna nei mahlehang, i tuah chiang un theihsiam haksa mahmah a, lungziinna leh lunggimna nasatak hontuam zel hi. Sihna toh kisai zaw ngeinaseh chih om hetkei mahleh i pomsiam theih deuh bang leng ana om zel sam hi. A naupanglamdeuh sihna leh teknat a sihna in hon khoihkhak dan kibang hetlou hi. Tuahsiat ziaka sihna in hon sukkhak dan tuam a, mi kuahiam khat amah-le-amah hinna kilaak (suicide) thu i zak chiang in, sihna dangte hon sukkhak dan toh kibang hetlou khat om hi. Mihing deihtelna pang hetlou a sihna, pomsiam dan omthei khong sek mahleh, mahni deihtelna zang a mahni hinna kilaak zaw, adiak in a nawtsiat innkuante leh lawmte adiing mahmah in pomsiam haksa law di'n ka ngaihtuah hi.

Kum 7 vel paisa apan khawng hi’n ka thei a, khauhual natna (suicide) chi khawng a I gengen uh, eilak ah avangkim in zaak in hong ompan hi. I zaak chiang un awlmohna thu, alang-alang in i gen kheu-khou uhi. Hun a pailiam zel toh kiton in, gen khaak in leng om nawnlou zel hi. Hun bangtanhiam hong pai a, mahni hinna kilaak thuthak hong omnawn chia’n i gen kheukhou zel uhi. Tuni chiang in bel, huchibang thu zaak leh thehdalh a a-om chiang in leng, awlmohna toh gen ding lel leng mi kitawm mahmahta hi. Poi lua!!!Mahni hinna kilaak kichi eilak a zaak ding om hetlou ana hikei mahleh, kum tamlou paisa akipat, i khotaang leh saptuam hon khawng zou hial leh dotna tampi piangsak hial di’a kizing in tulel dan in ana omngei in ka theikei hi. Saptuam leh khotaang in a doudaalna diing toh kisai banghiam pan honlaak uh lamen in ka na om-om hi. Tutan huchidan panlaakna muh ka neihlouh ziak in poi kasa petmah hi. Ke'n, kei mimal a hihtheih sun ka neihte kana sunzom zel diing aw…

Aziak bei in kuamah mahni hinna kilaak om ngeilou hi (kei mimal tuahte tungtawna hilhchetna):

Lungsimlam natna chi in i Laisiangthou in minvuah in gen kei mahleh, Laisiangthou mun tuamtuam leh Sam150 omte lak ah, 48te'n mihing lungsim in a thuak lelh dinmun tampi a taaklang hi. Pathianthu a kingakna in haatna leh khamuanna, lametna leh suahtakna hontun ahihlam muhtheih in om hi(Sam 6, 13,18, 23, 25, 27, 31, 32, 34, 37, 38, 39, 40, 42, 43, 46, 51, 55, 57, 62, 63, 69, 71, 73, 77, 84, 86, 90, 91, 94, 95, 103, 104,107, 110, 116, 118, 121, 123, 123, 130,138,139, 141, 142, 143,146, 147).Mahni hinna kilaak hial poisalou khop a haksatna, gentheihna leh mangbatna tuak mi na omtham ahi chih mahni hinna kilaak a sisate tungtawn in i chian hi.

Pathian hon sehsakna dan in, 'trained Counsellor' bang kana hikha a, ka hihtheih leh ka batphak diing a Toupa'n hon sehsakna tantan ah Amah hatna suang in pan chihtak in ka pang sam hi. Kei ngei leng akum-a-simkipiaksiatna (depression) ana sual kahih ziak in a gentheihhuai dan ka thei a, kipiaksiatna leh lungsimlam natna neite ka lainat mahmah hi.

Hiai lunggimna, dahluatna, kingaihsiatna leh phattuamna himhim neilou a ka kitheihna pen kei lungsim suangtuahna a kipan kia hilou a, atakgam a hinkhua a ka na tuah ahoihloute ziak ana hitaangpi zaw hi. Lungsimlam suutsiammite gen dan in, 'i piankhiak apat etkol a I na omdan dungzui leh hinkhua a I tuahte kia lungsimlam buaina tuntu in ngoh theihlouh a, a behlap diing thil dang leng omthei lai' chi uhi. I nu'n bangchibang lungsim pukawmin hon na paai a? Deih/phal ngellouh in hon na paai hia, ahihkeileh hawmthoh leh pakta tak in? Inu' sunga a I om pat akipat leh honpai sung in amah genthei leh beidongtak in salam leh lungsimlam ah ana om hia? chihte natawm inleng lungsim pai diingdan tampi gelkhin hi’ chi uh. Huaiteng toh kigawm, innsung kitamkham apan mi hong khanlet zawkmah chiang un kipiaksiatna, thawmhauna leh lungsimlam natna neih baihsam mahmah. Hinna leh hinman omlou sakna tan a lungput keniam suk chihpen alamdang hilou a, a hithei mah ana hi ahi.

Kipiaksiatna nei a hun leh nite ka zatliam lai in ka hinna laak di bangzahveihiam na suangtuah kha ngei ing (sih ut ngoihngoihna hun, simtute'n le i hinkhua ah khatvei bek i tuakkha chiat di’n ka gingta hi). Huai suangtuahna ka neih chiang in, suangtuahna dang khat in a zui sek hi: 'Kithat hita le’ng, ka hinna ka laak ziak in meidiil luut taleng la…' chih in honkam den zel mawk hi. Leitung a lah gentheihna chiteng thuak a om, sihnung a tangtawn gawtmun, ahaksa zawsem a lut diing chih ka ngaihtuah chiang in ka thangpaih tha suak hi. Hinkhua zaw hichi maimai a lametna bei a om chihmawk hilou deuh di hiv’aw chih ka lungsim ah thaamden hi. Atomlam in gen le’ng, hun bangtanhiam zoh in, ka ngaihtuahna hong kibehlap hi: Pathian hing bia kihingala, hichi’a kingaihsiat vungvung, dinmun niam petmah a ka omna sanga thupizaw Pathian’ honsehsak om diing hiveh awchih (ka neihkhak ngeilouh), ngaihtuahna ka hon neita hi. Huai theihtelna in Pathian ka zonna a tawsaw petmah hi.

Piangthaksa himahle’ng, tup-le-ngim kichiantak nei a nungzuihinkhua-a hinglou kahihziak a, ka lunggulhna tan a Pathian toh kizopna neilou ana omden dan ka hi. Ahuchihziakmah a Pathian a kingak diingdan theilou a, na buai mahmah kahizaw hi. Dawnna ka deih a, Pathian kiang chauh a om ahi chih leng ka theitel hi. Huai ka dotna tampite ka zon lai in, YMCA, Mumbai-te counselling course ah Pathian' mizat Dr Samuel Mungpu Tonsing leh a zi, Dr Ruati-te nupa hon awlmohna leh panlak pihna ziak liauliau in 2017  March kha apat in ka na telkha thei hi. A tomlam a gen di'n, huai course tungtawn in Pathian a om damna leh suahtakna kana muthak hi. TOUPA hoih hinah e!

Kei mimal tangthu k'on genna ziak ahih leh, keimah ngei inleng lungsimlam natna ana thuak ek kahihziakin, a taktak mah ahi chih gen utselua ka hizaw. Kibawltawm thil hilou hial ahi chih k’on gen ut lailai hi. I theih d’ia poimoh mahmah khat ahihleh, lungsimlam a buaina nei mite atangpi’n akhalam uh leng buai hi chih ahi. Kei mimal a ka tuahte kia hilou in, tutan a ka houpihkhak mite leng huchi vek sim uhi. Huchia lungsimlam leh khalam bah a ka omlai in, mi'n hon theikei uhi. Milak a kihel ka utkei a, biakna lam hi'n khotang vai ah hitaleh, lawm polh vai tel in, kal kana suankhe peih kholkei hi. Mi lak a ka kihel sunsun chiang in chiamnuih khawng ka gen zel sam a, maitaitak leh buaina khat leng neilou dan in kana kiphoulak sek hi. Hichidan in ka lawm-le-vualte lak tanpha ah ka na om hi. Kipiaksiatna ka neih pen kei lungsim ngaihtuahna buaiziak kia ana hihetlou in, ka hinkhua a thil katuahte ziaka ka ngaihtuahna ana kibawlbawl hizaw ahi chih k’on gen thakthak ut hi. Huai hunlai in, ka tulel dinmun in hoihlam hon manoh louh zawkmah chiang in kingaihsiatna, omzia leh poimohna neilou, it leh huai a om kisaklouhna lian petmah in, lametna neilou a om kisaknate mualsuah haksa mahmah hi. Tua hunlai in minvuah in 'kipiaksiatna (depression)' nei kahi chih kana kiphawk ngel kei a, hilehleng tawl kisa mahmah in ka om sek hi.

Genbeh lai le’ng. Ka omdan ningkitel in, suahtak ana ut mahle’ng panpihna laakna diing leh va zotna diing gentaklouh in, anachang leng ka na theikei himhim hi. Gentaklouh, kihatsak in lungsimlam buaina nei kahi chih kiphawkna tan nei mahle’ng, huchi dan diing in ka na kikoih uthetkei hi. Ihmut haksa ka sa thei mahmah a, dakkal 24 sung ihmutlouh hun akallak a nei in ka omsek hi. Ahuchih chiang in doctor kiang 'prescription' kava-ngen sek hi. Ka ngaihtuahna paidan ahihleh, ka dinmun kikhek lou pen thillamdang hongtung a, hong kikhek leh, huaichiang in ka lungsimput kikhek thei pan chauh di chih ahi. Huai ana hilou ahihlam counselling course tungtawn in k’on sintou zel hi. I dinmun kikhek keileh leng, i ngaihdan hong kikhek chiang in i lungput hong kikhek a, i dinmun tanpha lungput dik ziak a khektheih a hihlam k’on theikhia hi. Ka dinmun kikhek hetlou pi in, ka puakgik puakte beikei mahleh, a puakdan k’ong siamta hi. Huchi'n, ka dinmun kei mahmah in ka khek theih omte khek diing in pan k’on la theita hi. Pathian a kinga a, Amah a muanna ngak omzia nasa tak in ka counselling course tungtawn in sinsak in ka omtou zel hi. Pathian lawnkhakna ana tangtou zel in k'ong dam hiaihiai hi. Ka dam toh kiton in kei bang a mi tampi om diing a gintakna lianpi nei in midangte vei petmah in Toupa'n hon veisak a, tutan in leng ka veitou zel lai hi. Toupa'n hon deihna leh hon zatna mun ding hong chiang mahmahta ahihman in, Toupa' Aw (God’s voice) a na ngaikhe zom zel ing.

Depression leh Anxiety i chih miteng in neikha vek hi:

Hinkhua haksa ahih chiang in, lungsimlam buaina nei mi kitam mahmah hi. Lunggimna neih zekzek pen asia hikhin vek lou hi. I mimal hinkhua ahoihzawlam a khek diing in hun tamzaw ah, hiai lunggimna i neihte, ei hon tawsawntu in pang uhi. Huaiziak mah in, niteng hinkhua ahidi bang leh angeina bang a I zat diing honhih nawngkai saklou hi. Hun hong kikhek in dinmun hong kikhekdan dungzui in buainate leng hong veng zel a, a huchiloute leng bang chichihiam in hong veng zel hi. Himahleh, avengthei hetlou, niteng hinkhua a I ngaihtuahna atamzaw hon kam, kingaihsiatna hiam, dahluatna hiam, lungkiak ngoihngoihna hiam leh lamet diing nei nawnlou a kitheihna hiam, ahihkeileh huaiteng kigawm in i ngaihtuahna tam aluah zawk a, niteng hinkhua paidan tanpha a hong nawngkai chiang in mimal buaina hon tun a, panpihtu kipoimohta chih ahong kilang chiangtamai hi.

Huchibang a haksatna tuak mi'n ataangpi in midang kiang ah genkhe ngam pah lou hi. Bangziak a I chih leh, mi'n houchik dan khawng a gensak sek uh. Agenna sunsunte'n lah thutankhum zomah ua, anuihsan toh, thil zumhuai dan a gensak diing leng mi ana om zomah uhi. 'Houlua', 'Khemkhem', 'kitheihmoh bawl in', 'Pathian muang in', 'hong pha mai diing' chih khawng za sek uhi. A lungsim put pen lah sihkhiak a paihkhiak maitheih ahihlouh ziak in, abuaina veng lou hi. Athuaktu adi’a lah, na mahmah si maw! Ningkitel hinkhua, sih ut ngoihngoih, niteng hinkhua zatna di’a tha ngahna diing leh kithalawpna diing himhim mulou ana hiven! Kuama'n ama lungsimlam natna za utlou uh ahihchiang in, zaak(ngaihkhiak) a om kisaklouna toh dimin, omzia nei kisakna tawm deuhdeuh zomah hi.

Atawp chiang in, a genna di neilou, a genkhiakna sunsunte lah phatuamlou ahihziakin kuama’n panpihthei di'n le gingta lou a, a dinmun kikhek ngei nawn di'n leng koihlou a, hinman om sa mahmah nawnlou, lamet diing neilou, panpihtu diing omlou, hichia omden a suahtakna kichi omngei nawn diing a gingtakna nei nawn hetlou in, midangte adiing a noksak, dongkholh leh puakgik guantu lel hi a kingaihsutna liantak nei in, a ngaihsut phakna tan ah amah omlou a khovel thoveng zaw ding a koih in; buuktuahtuah in, atawp in a’ hinna amah-le-amah ana kilaakta mai hi.

Angaihtuahna pai diingdan teng suangtuahsak zou kei mahle'ng, ahaksatna ngaikhia a poisakpihtu/ thuakpihtu diing leh panpihtu diing mi om ahihlam thei hileh zaw, zuankha maithei hia maw! Panpihna omna lam zotpih leh kawkmuh thei diing bek ana nei hileh zaw maw!

Huchi'n a kithah thu mi'n ahon thei ua, asih nung natawm in leng thutanna bawlsak in a omlai tel hi:

'Pathian a kinga zoulou eive'

'Haksatna enle I tuak chiat voi'

'Mi dawilok ahi'

'Mimoh, Chau law ngal'

'A innkuante khualkei nah e'

'Hai na lawmlawm e'

'Mi kiang ah hilhleh hoih di hia'

'A innkuanpihte adi'n mualphouhuai e'

Hiai atung a kampau khenkhat k’on taaklat teng kia lou atuamtuam tampi kamteh in houlimna khawng I nei sek uhi.

Mahni a hinna kilaak chih thu I zak chia’n, “Bangchibang lawmlawm haksatna tuak, thuaklah a, ahinna la hial diing a thutanna bawlthei amah diam maw?” chih khawng in i ngaihtuahna sukha mahmah thu ahi. Mangbatna leh lunggimna mahni khomkhom a ana tuakkha sam I hihna uah, bangtanhiam zaw i theisiam uhi. Hilehleng a kithah hial pen i theisiam kei a, thutanna i na bawl khumkhum zomah lai hi. I theihsiam keileh leng apoina om hetlou hi, ahi-alah, thutanna vabawlsak sese, zeldim thubawl ngai hetlou ahi chih leng chiamteh di’n hoih hi.

Lungsimlam Natna toh kisai a i lungsim put uh khek hunta hi:

I hoihlouhna uh khat ahihleh, lungsim damtheihna (mental health) toh kisai a lungsim put i neihdan uh dikhetlou om hi. Mi khenkhatte'n, lungputdan fuhlou (mental disorder - depression & anxiety chihte) hon neih khak chiang un,thupilou ‘houchik’ in I koihsak ua, poi mahmah hi. Thupi lou, nepkhana hitaleh, avangkim inmahni hinna kila thu zaak zelzel chih omlou diing hi. Maw-le?

Mi khenkhat leuleu inlah, lungsimlam damtheihna poimohdan i gengen di mah ahi ka chih chiang in honnial ut sek uhi; “Hiate i gen tam leh atheiloute kichihmuh theih ahi” chi'n honnial zel uhi. Hichibang ngaihdan hoihlou leh masuanna diing daaltu I neihte uh paih a paihkhiak hunta hi.

Nikum (2019) in ka heutupa deihsakna in, 'Annual Suicide Conference', Sisters Living Works kichi, USA based NGOte sai ah ka vatel kha hi. Huai hun in lungsimlam-suisiam (psychologist) tamtak in thugenna nei ua, huai a ahahgen pente uh lak a thil thum, ke’n le ka poimoh ngaih mahmah ei dinmun toh kituak in k’on gensawn ut hi:

1) Lungsimlam damtheihna toh kisai, khotaang gentaklouh, saptuamte tanpha inle ngaihdan hoihlou, gimneih bawl a koihdan khat om(social stigma)pen lakkhiak ahihna diing a panlaak poimoh hi. Huai ahihtheihna di'n, mite theihsakna diing a panlaak poimoh hi.

2) Lungsimlam natna i etsoihna (stigma) laakkhiakna diing a panlak dan khat ahihleh 'gengen diing', 'gentam diing' chih ahi. Zumhuai ahihlouh dan, mihing hi hang a, nat leh lunggim tuahtheih mah ahih dan, kepdam theih ahihdan leh panpihna laak/zon chihte hihluat diing ahihdan khawng workshop/seminar/awareness campaign-te tungtawn a gengen poimoh hi. I genkhiak a, i theihsiam chiang in, a doudaalna leh ahihdamna lam buaipih theih pat hi diing hi. Huchileh, suahtakna deih (poimoh), aguuk a thuakte'n leng panpihna naih ngam pan diing uhi.

3) Lungsimlam natna leng taksapum natna chikhat dana pom poimoh lua ahihlam gengen diing. Taksa damlouhna I neih chiang ua, Doctor vanaih chih pen pilhuai leh thilhoih a ngai a, a hunhun a I ki-etkol chiang ua, ase diing lai tampi kihumbit zel  ahi. Hilehleng, ahun a etkol ahihke'h taksa mundang leng nasak (lohsawn) thei hi. Huaidan mah in lungsimlam natna leng pai thou hi.

Etsakna: Mi, a khe kitan khat tuakkha le’ng, i nuihsan diam? “Honghoih mai diing” chi in i taisan dia’m?, ahihkeileh “Pathian muang in” chi in…“Ahoulua”I chih sak diam le? Huchih mawk lou e! Damdawi-inn zuan di’a i sawl kei leh leng, ei mahmah a kinthei pen in kizotpih lai diing hi. Tu'n ah, lungsimlam natna neite i tuahkhak chiang un bangchi'n mimal, khotang leh saptuam in i na ngaihsak/kem a chih ngaihtuah mahdih uh.

Lungsimlam toh kisai telsuimite' suina-a ana muhkhiak dan un, mihing’ khe kitan khat leh mi kingaise mahmah khat khuak MRI a a-etkhawmna uah, akhuak uh kisukkhak daan kibang hi chi uhi. Huai omzia ahihleh, mi khat khe kitan in na athuakdan tuk in lungsimlam damlouhna nei minu/ mipa inleng ana thuak chih a chiang hi. I gentup theisiam di’n simtute, TOUPA’N hon panpih hen!

Lungsimlam natna etsoihna/gimneihna(stigma) leh Saptuamte:

A poidiak kasak ahihleh, platform hoihtaktak zang a, Pathian Thu gentu khenkhat in kingaihsiatna khawng gennep in chiamnuih gen henghang sek uhi. Ka zadah mahmah hi. Thil i tuahkhak ngei leng hilou, hun leh lungsim seng a I sui detdet ngei leng hilou khawng nepgen chiing nawn kei le'ng hoih mahmah di'n ka gingta. Hichi khawng a Jesu Khrist’ sik-le-tang a I dinna munte khawng ah, mi tampite sihpih thilte/ natna gennep nawnkei le’ng ka chi mahmah hi. Midangte’ lungsim pomsiampih theih (empathy) bang kizil ek hun mahmahta hi.[Heb 4:15 ; Jn 11:35; Rom 12:15; 1 Cor 2:3 ; 1 Pet. 3:8].

Mi khenkhatte'n sih sual a a’ sualte khawng uh, e’n i houngaihsak chiang un kilkhat a lungsimlam natna liantak nei, damna lamen tak a ana om kuahiam adingin kisuanlahhuaipi ana hikha thei hi. Thil zumhuai dana a’ lungsim natna pen a koihna, mimoh a kisakna leh a kingaihsiatna ana liantuan ahihlam chiamteh leng hoih mahmah ding hi. Jesu Khrist in belam 99te taisan zen in belam mang khat ana zong chih khawng i gengen uh hilou maw? Hichi khawng a thu i tangkoupih ekekte hiai khawng a I zat ke'n koi a vazang tuan di e? Thugente'n leng, agen kia sikhop lou in, a zuihna lam pibawl zawdeuh lai le’ng, kihiamtuan mahmah di'n ka ngaihtuah hi. Pulpit pen Pathian thutak genna diing hi a, mi sang a hoihzaw a, kithuneisak tak a mi kouna leh mi engchihna diing hilou ahi chih chiamteh poimoh hi. Lungsimlam damtheihna (mental health) toh kisai a etsoihna om (stigma) lakkhiak apoimoh nakkal a i gennep gige ua leh, kilakhe ngeilou ding ahi chih thei ni. Etsoihna(stigma) a omleh, mi tampite saltaanna akipat a hutkhiakna diing a panlak haksa mahmah ahi chih thei ni.

Lungsimlam damtheihna apoimoh dan mi nautang leng phawksak poimoh mahmah ahih ziakin, heutu lamte'n i makaih nak ualeh ahi diingdan hong om mai ding hi.

Pathian' nasemte adiing a theihtuak khenkhat:Pathian Thu gente, Pastorte, Upate, Missionaryte, Counselorte leh mi'n lamen taka houlimpih diing a zot a omte'n i theih di’a poimoh mahmah chiamteh tinten di’a hoih thil 3 k’on kum ut hi:-

1) Mihing kibangvek lou ahi chih i theih dungzui in, amau hihna bang in pomsiam le'ng chih deihhuai hi. A khente thuak haat deuh bang ki-om a, a dol (neem) deuh bang leng ki-om a, Pathian thu a kihehnem siam deuh leng om a, piangthaksa himahleh, Pathian thu a kinga zoulou deuh bang leng omthei ahihlam chiamteh leng hoih mahmah ding hi. Khalam dinmun leng kibanglou chiat hive hang maw? Mi, adiak a lungsimlam natna neite, thukhensaktu ding kihilou inchin, Pathian kianga om damna, mualsuahtheihna, bitna leh khamuanna kawkmuhtu, thumpihtu leh lametna Pathian a om ahihlam hilhchian a, huai a kingak theih ahihdan, amau mizia dungzui a sinsaktu diing I hihlam uh chiamteh a i neih uh poimoh mahmah hi(1 Korinthte 9:19-23).

**Mite'n a thuguuk uh, a khelhna uh leh a haksatna uh a hon gen chiang un, koihiam khat a va gensawn chiin hetlouh diing ahi chih chiamteh in zui ni. Thumna a phawk diing natawm a leng, amau phalna panglou a koihiam a vapuan diing hi thahah lou hi**

2) Theih di’a poimoh mahmah nawn khat ahihleh, sa (body) a omlai I hihman in, i kha pen vasukkhak pah sawm sangin, i taksa in a phawkluat natna (pumpi leh lungsimlam) pen enkol masa leng, khalam pen khoihkhak baihsam petmah hi. Khalam vai kigenkaai thouthou hi chih ka theichian deuhdeuh hi. Jacob 2: 15-16 ah salam taksap hihbuchin apoimohdan i mu hi. I Hondampa ngei leng khovel a ahong pai lai in, khalam damna toh kiton in salam damna leng awlmoh mahmah hi chih i thei hi. Lungsimlam natna leng sapum natna ahihlam chiamtehta ni.

3) Midangte kawkmuh apoimoh dan thei ni. Pathian kumpigam a mohpuakna chi tuamtuam neite I hihziak un, theihtawp i suah diing him uh ahi. Pathian' kumpigam nasepna ah, Toupa'n siamna leh hihtheihna chi tuamtuam honpia a, khalam thilpiak i tante uh leng kibang veklou ahih toh kiton in, A hon zatna leng kibang vek lou hi. Ei hihtheihna lam chiat ana om sek ahihman in, ei hihtheihlouh lam a nna got a i om chiang in, midang kawkmuh a piaksawn poisa kei ni. Ei kia inleng hih khit sawm vek kei ni. Khrist' pumpi kahiang tuamtuam, siamna tuamtuam, sapna tuamtuam himah lehang apoimoh dan a pangkhawm a, kihuhtuah, kikawkmuh leh kipiaksawn chihte I hih diing mawng uh ahihlam mangngilh mahmah kei ni. Kituh bawl, mahni in kihui vek, kihaza, kideihsak tuam chihte toh Pathian kumpigam nasep in masawn theilou hi. Lungsim enchiantu, Pathian' lemgel leh nasep diing daaltu a panglou di'n pilvan sawm ni. I tuhgah chiat lou ding I hi chih thei ni hang! (Ex. 18:13-26); (1 Cor. 3:8;12:12-27; 2 Cor. 5:10 ; Matt. 16:27; Jer. 17:10; Prov. 24:12).

Dotna nih in thukhitna k’on bawl diing:

1. Mi khat in a’ hinna, amah-le-mah a kilaak chih thu i zaak chiang un, puaknathuai leh poisakna in i dim uhi. Huaitan lel a beisak zel diing i d’uam?
2. Jesu Khrist in lungsimlam natna nei kichite bangchi'a vaidawn in, bangchi'a kem in, bangchi'n A houlimpih de aw? Ahihkeileh, lungsimlam natna thu toh kisai bangchi maituah di'nna gingta?

“Hiai khovel vaak na hi uh” hon chih mahbang a, A’ lungtuak a vaakkhe thei chiat di'n, Toupa Jesu Khrist in simtute, A’ Min Siangthou in hon thuam chiatta hen!