Lungkimna toh kithuah Pathian limsakna tuh punna thupitak ahi. Khovel ah bang mah i lutpih kei a, bangmah i pawtpih thei sam kei ding hi. Himahleh nek ding leh silh ding nei in, huaite ah i lungkim ding uhi (1 Tim. 6:6-8).
Lungkim thei mahmah lou, phunna ding kia hong tungtung, dam hun a leng phun, dam louh hun a leng phun thou. Kipahna mahmah nei ngei loute tuh khovel a mi genthei pen, mi hehpihhuai penpente ahi uh. Mi khenkhatte’n kipahthu gen ding niteng a aneih lai ua, phunna leh lungkim theih louhna a dim mite dinmun tam lou in kikum ni, hiai anuai a bang in:-
I. Vuallel Kisakna: Kuamah kou leh soisak chih leng hilou ei leh ei vuallel dan a kingaihna omte i enkhawm ding:-
1. Innkuan Ah: Innkuan sung na-ngawn ah deihsakna tang kisa lou, pampaih leh limsak a om kisak louhna. Pianna nu leh pate banah, pianpih u leh nau lak a leng vuallel kisa mitampi ki-om thei hi. Mi’n hon vuallelh sak leng hilou ei vuallel dan a kingaihna om thei hi. Nang sang in Joseph a ute lak ah vuallel zaw tham ding hi. Apa deihsakna teng a ute muhdahna suak, Pathian thilgel teng a sanggamte huatna suak lai huchi bang hun ah leng Joseph phun lou hi.
2. Lawmte Lak Ah: Siamsinpihte lak bang, seppihte lak bang, Committee member hihpihte lak bang ah vuallel leh tuambawl a om na kisak hun tampi a om sek hia? Danial leh a lawm thumte tuh a biak uh Pathian min a mi toh kibang lou ngamte ahi uh. Lawmte lak a ta lou, tuambawl a om hi a na kitheihnate veelthak inla, nang lampang sudik masa in, nang ngaihdan leh kikoih dan lel khawng hi kha mai thei ahi, Pathian kiang a thum kawm in na kiveelpha in.
II. Vangtah Tuam Dan A Kingaihna: Ei leh ei kihehpih luatna tuh melma lianpen, mahni hinna hon kilasaktu, melmapa setan zattangzang, tulai a honglang mahmah khat ahi. Huaiziak in dou in a hon taimang san ding hi. Pathian in nang leh kei a vangtah tuam ding a hon bawl hilou I hih dan tam lou in enkhawm ni.
1. Mel Leh Puam, Taksa Piandan Ah: Vun vom leh ngou thu bang, sam mam leh kilthu bang, din san leh niam thu bang, neu leh let thu bang, nang bawl theih louhte ah buai ke’n. Mi bang lou na kisakna pen ahi na special na tak. Belsekpa tung ah bellei in n’on neu bawl lua hiam, non bawl lian lua chi a aphun theih louh toh kibang I hi. Pomsiam in kipak ni. Pathian launa toh omdan hoih gamtat kilawm in om lehang mi’n hon mu hoih mai ding uh ahi.
2. Na Siam Louhte Kia Mu Ke’n: Laisiam lou, ball pek siam lou, lasiam lou, thugen siam lou leh adang tampi na siam louh omlai mahleh na siam lam om ngeingei ding hi. Huai pen ahi Toupa’n hon zat sawmna. Na siam louhte lak ah zong na ziltawm theih tampi om kha ding hi.
Mi khenkhat in ei siam lamte neu muh mawk in mi aate bang thupi muh sese, huaite a kisu lunglel, mi phalou dan a kikoih, tuabang ngaihdan tawpsan in ei ate zun in puahpha ni, hon pepa Toupa Pathian in a min thupina ding in na hihtheih thilte zang nuam chih mangngilh ke’n.
3. Neihlouh Teng Mu, Neihte Mu Thei Lou: Mi neih ei (mimal) neih louh teng mu thei mahmah in ei neih midang in a neih het lou uh bang leng om thei ahih lam himhim mu kha ngei lou. Huaiziak a mi pha lou dan a kingaihna lian lua, piangsual tampite’n, piandan bukimte abang lou deuh a neih uh omsek hi. Laisiamna leh pilna na neih louh man in kingaise ke’n, thahatna leh lemgelsiamna honpepa’n na poimohna ding om a hon siam na hi. Mipil leh siamte’n hon poimoh hun uh zong om veve ding na hi chih mangngilh ke’n, himahleh kisathei het ke’n.
Thukhitna: Na tan Pathian valzawlnate theisiam lou a, phunphun leh midangte a eng a, na om-om leh hon vualzawlpa na sulungkim kei kha ding, kiveng in. Pathian in A min thupina di’a hon vualzawlna na tante na kisaktheihpih a midangte simmohna a na zat leh hon vualzawltu honpiakna toh kituak lou thei ding ahihman in pilvang in, sawt hon kemsak kei kha ding. Pathian in honpiak siamna, pilna, hatna leh lemtheihna chihte tengteng lungkimtak kawm a Pathian limsakna toh sem leng hon hih pungsak ding hi. Khovel ading kia in kikhual kei ni, Thangvan gamnuam i tun chiang a i manglukhu ding khual in buai zaw ni. Huai tuh tangtawn a tul thei lou, nin bang lou vul lou ding kipahman ahih zawk ding ziak in. Tu hun hoih i neih lai a limsak chiat thei ding in Toupa’n simtute hon makaih hen!
