Thupatna: Corona hiipi sukpi nihna I pelh nung in, I lungsim a hiipi toh kisai tampi I theih leh hon kam gegu omlai tham din ka gingta a, I damsung I mangilh nawnlouh ding thil tuakkha tampi leng om tham din ka kigingta hi. Laisiangthou koimun mah a Abraham, Isaac, Jacob, Mosi, David, Ruth, Mari chihte thei gige un chih a om het kei a himahleh ‘Lot zi thei gige un’ chih ana om chitchiat a, ngaihtuah zel zel a theih dia I Toupa Jesu’n poimoh sa mah mah ahi ding hi. Hotdam i hita maithei a hotdam nailouh leng i hilai maithei, hiai thu in nang leh kei a ding in message hoihtak a nei tuak tuak hi. Pharisaiten Pathian lalgam hongtun hun ding a dot ziak un I Toupa Jesun amaute pilvang ding a a warningna in Noa hunlai bang leh Lot hunlai a thiltungte zang in hilhchetna bawl in A thugen za peuhmahte Toupa hongpai nawn ding ngak a kigingsa om a nunglam ngakik nawnlou dia vauhilh kawm in Lot zi thei gige in chih a hongen hin ding hi. Genesis 18&19. Abraham sun nisat laitaka a puan in kongkhak bul a a tutlai in Toupa angel ava kilak a a et leh mithum ahi ua, huchiin Abraham in ana zintun a ne a dawn a, goutan vualjawlna achiam zoh in Sodom lam manoh a paidin a kisa ua, Abraham in Sodom/Gomorra mite a din a nget petmah in ngetsak a himah leh midiktat a om louh ziak un gawt ding in Angelte tuh a kuankheta uhi.
Nitaklam in Angel nih in Sodom khua ava phasuk ua Lot in ana zintun a, Sodom khomiten kithuahpih ding in ava ngen ua lot in ka tanu nihte konpe zaw mai ding a chih chiang inle uttuanlou in kongkhak bohsiat tum in a boh ua himahleh angelten mite mit a tawsak ua kongkhak a muzou kei uhi. Huaizoh in angelten Lot kiang ah na makpate, na tapate na tanute leh khosung a naneih peuhmahte pikhia in a chi ua, amakpate ava sap leh ana chiamnuih bawl maimah ua huchiin phalvak in angelten na zi leh na tanu nihte pikhia in chiin Lot anoh ua, himahleh Lot a awltat mahmah ziak in azi leh a tanute a baantang a len in angelten kho polam ah a kaipawt ua, Na hinna dingin taikhiain; na nunglam nga kenla, Phaijang himhim ah leng khawl ken; hua tang sang ah suahtak sanin, huchilouinjaw na mang tel kha ding a chi uhi. Huchin nisuah zoh in Zoar ahongtung ua… himahleh Lot nunglam a kipan a zi a pasal theihlouh kal in Sodom leh Gomora lam ah a lehngat thahah leh chikhuam a suak chetmai hi.
I. LOT ZI KHALAM BUAINA
Kum sang tampi paita a kipan in mi tampiten bangziak a Lot zi in nunglam enkik hi ding hiam? chi-a buaipih in suut dan chi tuam tuam tampi ana omta hi. Lot zi khalam buaina hi a i muhtheih masak tuh
A. Ginna tasam(ginglah) Na hinna ding in taiklhia inlan, na nunglam ngaken chi a thupiak za hinapi Sodom Gomora tungtang a Pathian in a gen bang a hih ding ahi chih gingta lou in a nunglam a enkik teitei a manlouh a suak maimah.Pathian thu manlouh lauhuai mah mah ana hi chih theihthak a poimoh a Pathian thu chiamnuih bawlna a zang zanglai i hikha diam chih lauhuai hi. Mi hausapa/Lazar(LK.16:19-31) hiam Juda Iskariot Pathian thugen a dikmah hia? chih dong thei ding bang hile Hi Vangam leh Gawtmun kichi zaw a dikmah ahi hon chi ngei ngei ding un ka gingta hi. Piangthakloute a ding a gawtmun a om mah bang in piangthaksate a ding in Pathian taihilhna leng a om ve thou hi. (Heb.12:5-8) Ka ta, Toupa sawina ngaineu kenla, a taihilha na om inleng lungke tuan ken; Toupan a itte sawi naka, ta a kipahpih tuh a vo nak hi. chih. Na thuak ujaw noumau ding ahi; tate tunga hih bangin Pathianin na tunguah a hiha; pa sawi louh ta kua a om ngeia? Ta chihna teng loha, sawina pen loh loua na om unbel, ta tak hilouin, sawn na hi ua kei dia.
B. A ngatna lam/a etnalam diklou. A inkuan khojang ua nunglam enkiklou dia thupiak himahle uh Lot zi sunglam ah utna khat in Sodom lam nga ding in a thuzoh a a ngata. A mitte thil diklou lam anga a, khopi mangsa, khopi sesa lam anga thou thou lai tel hi. Christian tampite Lot zi bang a nunglam nga doi doi tei tei, tawpsan di chih chia le tawpsan zou mah mah lou, hinkholui, cheetnalui, hohna lui, hihsate mah a va kikik bangzah i omkhata phet di ua? Israel tate Mosi in Aigupta akipan a pikhiak lai in Num11:5,6 Israel suan te leng a kap nawn ua, Kua ahia sa nek ding honpe ding? Ut leh daha Aigupta gama ngasa i nek jelte I theigigea, tangmaite, mazelte, phulun sialnek chite, vaiphulunte, phulun ngoute leng; Himahleh tuin I guhngek uh a keu khinta, bangmah lamet ding mahmah a omkei, manna lel loungal, a chi uh. Tunin mi bang zah hinkholui ngai a Israel tate bang a vuui i om ua? I etnalam leh I ngatna lam I khe in zui ding ahih man in koilam nga i hia chih ki velthak a poimoh hi.(Tapa taimang Lk.15:1-24) I ngatna lam diklouh ziak in mitampite hinkho dik leh tang a kihing thei lou. I etnalam a diklouh ziak in mi tampite kipaikhial gawpta. Laisiangthou sinsak banga hinkho zangten Pathian a kipan khamuanna leh vualjawlna leng a ngah zel ua himahleh, Pathian thu a ki bulphuh lou a hinkho zangte enve ua, kua a lungmuangtak leh tawldamtak a hinkho zang?!! Koilam nga a pai I hi ua? Khovel leh eimah nopsakna di lam kia mo ahihkeileh Pathian lam?
Lot zi buaina bang a buaina nei Christian tampi a om a, vangam tun ding ut chiat hilehle a lampi tawnpeihlou, Jesu a ginna ngaloupi a mahni kigintak thoh a, piangthak ki hisak chih bang om thei ahi.. Lot zi enthak zual mahdi, Zoar phaizanglam manoh a pai pai lai Sodom lam va nga phut mawk…!? A taksa Sodom polam ah a om ahimahleh endih, a lungsim leh a ngaihtuahna Sodom a teenglai lai, om lai lai eitel voi. Hiai in Lot zi hihna tak a genkhia. Piangthak kichite ki velthak mahni, Lot zi bang bang a taksa zaw Pathian misiangthou Saptuam memberte sung a om, himahleh lungsim leh ngaihtuahnate Sodom a teenglai bangzah i om ding ua. Sodom nopsaknate, Sodom hukna leh utna te ngai leh lunggulh vung vung lai, Christian ka hi lah kichi ngal I om khak ding lauhuai hi. Piangthak diktak ten zaw khovel nopsakna leh khovel hipnate a enjoy thei nawn vual kei uhi(2Cor.5:17). Piangthak ki neih khembawl lel i hihkhak leh Pathian khem mai hilou in, eimah leh eimah kikhem i hi zaw.
A.Gawtna a tuah a ZEKIN – Pathian vaihawmnate a zekin thei mah mah a hal hal chih a omkei hi.(Prov.29:1, kuapeuh salh a om sek a ngeingaihlou teitei tuh thakhat a suksiak in a om ding a sukdam theih ahi nawn kei ding). Kumtampi khelhna toh ana ton khawm khawm na hi maithei, himahleh nikhat vaihawmna a hongtung ngei ngei ding. Lei tung ah bel hichi zaw deuhleh i chithei lai ua Medil ah bel kava huchi di chih tuan theihlouh ding hitel eivoi. Kisikthak chihle omthei tuanlou ding (LK.16:19-31)
Gen.6:3 Toupan, ka khain mi khantawnin a sual nilouh louh kei ding, amaute lah sa ahi ngal ua. a chi. I kha a ding in tawldamna khat kia a om huai tuh i Toupa JESU kiang ahi. Na kha a tawldam theita hia?
Tunin, Pathian thu i manlouhziak in chikhuam i suakpah chot kei maithei. Himahleh Jesu i neih kei leh HELL ahi i tan ding omsa. Sam 9:17 Mi gilou-saloute tuh Sheol ah a kik nawn ding uh. Nam chih Pathian manggilh hatte tengteng achi hi. Ngaihtuah dih, Pathian thu Laisiangthou leh Pathial thilhihtheihna muanzawhlouh deuhna an nei lai zen zen hia?
Thukhitna: Lot zi a ding in second chance chih a om thei tuan kei a, lametna bei ahita. Tunin, nang leh kei a ding in bel lametna a om theilai hi. Corona hiipi ziakin in it leh ngaihtampin hon mualliamsan nung un, I lungtang khauhsak sak nawn kei in Toupa thu gingta in amah a muang le Aman hon pi na dingb ahi. (Phil.3:13 Unaute aw, tangkhintain ka kingai keia: ahihhangin thil khat bel ka hih- nunglama omte manghilhin malama om pen ka delh hi chi a Paul in agen bang in, I khensate zaw nung et et nawn kei in mailam nawt a Jesu tangtak a en in pai sawmta ni, I maban di khut mechin vom chia le ki theilou hitel ahi. Amah hon pi na bang bang zui dia kisa din hanchiam thak ni. Toupan hon vualzawl hen!
