Amasa in hiai bang hun manpha hon pia I biak pa Pathian kiang leh hamphatna hon pia U Sum (Upa Chinsum) media team i/c tung ah kipahthu ka gen hi. Asiampen leh theipen chihna hilou in awlmohna ziak a gelh ahi, chih simtute’ theih masak ka deih hi. Govt, medical team leh adg adg te demna/ mohsakna leng ahi kei chih leng thei ni. I gam a economic, psychology leh khalam a siamna leh theihna neite tokphultu hileh chih deihna leng ahi.
Thupatna.
I theih chiat bang in COVID 19 natna in khovel pumpi buaisak hi (I tenna gam tel in), mi tampi leng sita hi. Hiai natna apan kivenna ding leh akitheh dalh louh nang in “Lockdown” puan hi a, daante leng Govt in suah zelzel hi. Hiai natna leh total lockdown I maituah masakna uh ahihman in Govt leh mipi lam ah chitlouhna (flaws) leng om ngei ding hi. Hibang a ni 67 val lockdown in thil tampi sukkhak nei a, anung-gu (effects) om thei tampite lak ah thum kia en ni:-
(a) Nek-le-tak zonna (Economy).
(b) Lungsim lam damtheihna (Mental/ Psychological health).
(c) Khotang buaina (Social unrest).
Hon sukkhakdan.
Lockdown apan nek-le-tak zonna teng dinkhawl a mi tampi’n sepna mansuah in nek ding neilou in om uhi. Eilak (Lamka context) bang ah niteng kilohtawm a nek zongte sukha diak hi. Tuamah bang in, khopi tuamtuam a sepna tuamtuam neite leng sukha a, mi tampi mahni state chiat ah kikta uhi. I Lamka khopi a ana omsate leh ahong kik te’n sepna amansuah vek uhi! Maban buaihuai petmah ding hi. Nasem lou a sum omlou, sum lou a nekding kilei theilou, nelou a kihing theilou. Agah ding kialpi hong hi maithei. “A hungry man is an angry man”, chih hong hithei. Hiai lockdown in nek-le-tak zonna hong sukbuai kawm in lungsimlam damtheihna leng hong sukha hi. Maban a thil hong omtheite; nek-le-tak zonna haksatna ziak a guktak, laktak, kithah, kimat leh mulkimna bei khotang a buaina ahi. (A hong om teitei ding chih bel I genthei kei). Tuabang hong om thei ahihna ah bangchi bang a panlak ding hiam chih lam focus in tamlou kikum ni.
Plan & Strategy.
a) Nek-le-tak zonna. Mimal chih in mahni hihtheih liai zonsuah a sepna aneulua, aniamlua chih neilou a sep ding ahi. Tuakawm in, mahni tempaina (talent) leh lunglutna (hobby) zonsuah teitei ding, huai mah zang a nek muh sawm ding. Govt leh NGO tuamtuam te’n leng ‘Talent Hunt’ chihdan programe tampi saithei leng mahni a kimusuah lou, mi tampi’n phattuampih ding hi. Mahni tempaina leh lunglutna tak sepkhak in mikhat nek muhna kia pelou in hauhsakna tanpha tunthei hi. Hiailam focus a thil saitam hong poimoh mahmah ding hi. Tuaban ah, I gam a mihausa (Mahajon) leh adg adg miguai (employ) thei dingte’n lungsim zausak a ‘bangchileh ka mi leh sate hiai haksatna apan ka panpih thei di’a’ chih ngaihtuah a amaute employ theih nang thil tampi patkhiak sawm ding ahi. I gam a economic subject lam siamte bangleng dot leh kouh theih ding ahi. Hiai bang a pankhawm hong pawimoh mahmah ding ahi. Tulai a Govt leh CSO tuamtuamte panlakna ziaka antang kihawmte akumtawn a om gige zouzai lou ding chih theih ding ahi. Tuaziak in mahni khe a din kisin ding, panlak ding leh mualsuah ding tup tinten ding ahi. (Hiai lockdown apat I zilkhiak khat ahihleh mihingte I poimoh uh nak tawmlua ahi. I basic need uh an, puansilh leh inn hileltak ahi, adangte pen human greed sukbuchinna lel ahi. Greed paihkhiak sawm ding ahi).
b) Lungsim lam damtheihna. I gam ah lungsim buai leh haksatna nei hong omkha ding hi. I tuah ngeilouh thil tuak I hihna ah, tuate bang lohding? Psychology leh counseling lam a siamna leh chitnaneite’n “Psychology Respond Team” khat hon bawlkhia uh henla, Govt toh pangkhawm in tuabang a buaina neite’n a contact theih pahpah ding uh omleh. Local cable channel te ah panel discussion bang leng om thei leh hoih ding hi. Local newspaper te ah mipi lamte theih ding kiven dingdan suahkhiak hileh. Tuatoh kiton in a poimoh mamah ahihleh hiai covid-19 pen lauhuai mahleh, hichi lawmlawm a lauhuai hilou, adamkik percent le 43% vel ahihdan gen a, nupi mawl leh laitheiloute pong lauhna beisak di’a panlak ding ahi. Aziak, amaute’n pong lauh in kipuul duamduam ding bang in ngaihsun uhi. “Puul hii/natna” chih nawnlouh ding ahi. Hiai pen uang lua hi. Mental problem bangle tunthei ahi. Theih di’a poimoh mahmah khat tuh, mihingte I lauh chiang in I immune system hatlou a, I lauhlouh a positive tak a I om chiang in immune system hat hi. Psychologist-te genna ah khovel a natna 90% te nadi’a I kigintak ziak a na kihi ahi chih ahi. (Preventive measures te zui kei ni chihna ahi kei).
c) Socal Unrest. Social unrest a om louh nang a Govt leh CSO, NGO tuamtuam te’n pan lak ding ahi. Atung a I gen psychological aspect in leng poimohna nei hi. Tuhun apan panlak a respond team bawl a veng chih a philanthropic orgn te’n plan neih ding ahi. Hiai buaina omthei apan kiven nang a hoih pen tuh Pathian thu ahi. Pathian, thilteng siamtu, neitu, vaaktu (sustenant) leh humbittu ahi chih I theih ua, Amah belh ding chih kisinsak ding ahi. Hiai ding in Saptuam chih a makaite, pastor-te leh evangelist te’n poimohna liantak nei uhi. Lockdown sung a online sermon kineite leng phatuam mahmah ding in gintakhuai hi.
Social Stigmatization.
Hiai thil deihhuai hetlou ahi a, kuapeuh in hihlouh ding ahi. Khopi apan hongpaite aveikhate hi’n aveiloute hileh tuambawl louh ding. Aveite leng amau ut ziak leh deih ziak hilou, accidental ahi. Amaute I etdan, houpihdan leh treat-dan in amaute lungsim suna thei/ kipaksak thei hi. Kuapeuh pilvan chiat ding ahi. Hiai toh kiton in, akhuh teng, ahahchiai teng corona vei hilou ahi uh chih theih ding ahi. Corona natna omma tham, mihingte om tung apat ki-khuh, ki-hahchiai ahi chih theih ding. Corona natna toh thil teng mekmat ding hilou.
Thukhitna.
Khovel a teng mihingte’n I tuah ngeilouh thil tuak I hihna ah pong lauh (panic) louh ding, lah kiven nang a kigente pilvang leh thumang tak a zuih ding. Tununga leng hiai sanga thupi zaw natna leh buaina hong om thei gige ahihna ah pilvan kan omlou. Thil khatpeuh ah balance tak a etdan leh deal dan kizil ding ahi. Pathian toh thil bangkim hihtheih ahi. Amah bel in muanpen in nei ni.
Bible chang sim dingte. Matt. 6:26b, 33; 7:7-8; 11:28-30; Sam 37:3-5; 46:1; 126:1, 128:1.
Simtute Pathian in hong ompih in hong kem chiat hen.
