LENKHAWM Laa Hualkhawm leh LENGKHOM Lamkol

Mang pian hun silpak a lun nawn ta
Selung maimit siing zong thelbang thou sak
Zatam vual gen Bethlehem tangtung ah
Ginna’n khaa in hon lenkai pih

Nunnuam in lungdam ni, Vanmang’ Ta pahtawi ni
A pianna kipahpi’n leitung zaila’n dim hen
Vanmang Ta hongpiang Manglukhu hon khusak di’n
Thangvan mi teng in leng hon kipahpih sam un

Lenkhawm laa hoihpipi I nei. Taang a mite’n a muhnop ni kipahhuai, Mulou in sangtampi’n mualkhum ta. Nikum leh tukum lel in le, mi manpha pipi tampi I sun. Kawlni suah sim a taikhua vak I thei chiat. Himaleh, Bethlehem a Tangtawn taikhua hong vak tuh thupi leh lamdang ahi. Ahi, hiai mah ahi, hiai lei a tangtawn a lem leng sak di pen. Khrismas hong nai chiang in, Khovel a kipak a, Lenkhawm laa dai diide te hong kihek khia ua. Mang pianni lenmual khumsa, Bethlehem ngaihna tulsa teng, lunglengthei te lungsung ah hong thak nawn mai sek. “Bethlehem vangkhua hon thawn hen…” chi a I hah awih zoh photleh, I vangkhua leh I lungsim a hon thawn a. Lemna kumpi I lungsim Bawng-inn sung ah hong piang thak nawn mai a. Huai mah a poimoh pen leh a manphatna ahi.

Nunnuam in laa saa ni, Hon Tanpa hong piangta
Leitung ah lem leng hen, Namchih mi zata ding
Ei di’n nuntakna A hon tun hi

Lenkhawm I tawndan uh ahi. Mihingte heart beat LUP-DUP, LUP-DUP a pai den toh I lenkhawm khuang tum paidan a kizui. Hiaiziak mah le hi’nchia, Musical genre leh style tuamtuam tam mahleh, Lenkhawm khuang luandan toh eilawi I kituak ua. Khrismas laa a gin chian, khutpek tegel kibeng din kingiim pah ua; nu-pi taw-zangh te’n tut kinken haksa sa uhi. Hiai mah in eilawi khuaksunga dopamine bilhbang thousak zou pen a; lenkhawm zaw nuam  sa chiat ve hang aw. A luang khat I subuai kha ua hiveh aw.

Lenkhawm laa ten Angel te toh laa kibang hon awikhawm sak ua. Hiaiziak mah in, lengkhawm te’ laka kingaisia bang a omlehle, akingaihsiatna uh kiamsak di’n Cortisol (hon kingaihse sak hormone) level niamsak a, lungsim kipahna tun a. ‘Khrismas ni hong tun chiang a, Bethlehem ngai a, Lungsim dawngkot hon Khua khenkhat bang, tawl hetlou a lengkhawm zanhak, lenkhawm kheklehh, Khrismas a kipan kumthak tan lenkhawm zomsuak bang le I na om tham hi. Unau Thadou pao zang ten Lengkhom Lamkol achi ua: Meitual seem, khutbeng leh khutvai in, khuang, Keyboard leh Sialki  toh thuah in, “Hung un, hung un, Pakai vahchoi u te” chi’n lamkual dupdup ua, Khrismas lawm manpha uh ka sa. Lamkol tradition in western culture sanga ei tawndan toh kinaizaw tradition pansan in lengkhawm sak a. Hihfuh uh ka sa. Thangvan mite’n le kipahpih kholdiak le uh kilawm. Hiai ahi Music genre leh style tuamtuam a emotion toh Khrismas lenkhawm a emotion a kibatlouhna. Pholhfuh ngai ahi.

Ei aa hilou chiindan thak, lungsung dawngkot hong zoulou di pi, gou dang I lunggulh sek ua. Nopsak I ut ua, enjoy I mawk sawm ua. Party, carol adu-ada I pan deksek na ua; ahithei tatak kei. Lenkhawm mah in ei a Eden pallun loubang tulsa thaksak in, Mary pomlai naungek mel a mu di’n, tutkhawl lou a Bethlehem taang zuan din zaitha hon guan zaw veh aw, maw.

Khrismas lenkhawmna ah vanzat tampi a poimoh kei. Khuangpi, Khuangta, Sialki, Khutbet leh Torch light kia in le tung si-al vaak in hon pii thei. Lenkhawm nuamsak bel laa-teel, laa luandan kilual a laa-teel kizui; Laa-veektu in laa-thu simthawh lou a, deihkaih taka hon awih chih te a poimoh. Khuangpu & Sialki kheentu ten mipi awo toh kituak a ana adjust siam uh le a poimoh bok. Khuangta tumtu in khuang chih (LUP-DUP, LUP-DUP), Khuangpi tumtu in khuangkhep (_ DUP - _DUP teng), Sialki tumtu leh khutbeng ten, mahni phur dan zil a hon tum/bet nak uleh, A ging lawmnou uh leh a thawmging, I lungsung uah a thaam nawn mai hi.

Music lunglut deuh ten Sialki a letkhak uh lehbel, vual chih a Melodic dictation (Laa thumal leh khuang kiakkhawm dan) zui in Sialki hon khen ua. Laa sak a nuamsak a, duhthusam ahi. (‘Ngaidih a thawmging uh kilawm’ chih laa a Melodic Dictation tuh 1-3-1-3; a thunon ‘Tungnungpen ah thupi hen aw’ ah 3-3-3-3 ahi)

Bangteng hileh, Khrismas lenkhawm zaw a nuam himhim di mah ahi. Hiai ni a Van angel ten Bethlehem dainawl a belamching te lengkhawm laa a special number va present uh ahihchia:

Ngaidih, a thawmging uh kilawm
Leitung gilou khemna lai ah, Lem leng hen, chi’n zai awi uh

Tungnungpen ah thupi hen aw, Lem leng hen chi’n zai awi uh

Khrismas hong bei ding a. Khenkhat in, ‘Ngaih a naa e, Bethlehem vangkhua, Sunni tum kuan lenkawl a eng singseng’ ‘Kei zong tua Si-al vaklam zuan zel in…’  achi ding ua. Khenkhat in, mi lungsim a tangtawn Lal dia pianthak nawn pen Chibai bukna mulkim-huai pe di’n I kisa kha thei. Pilvan-huai ahi.

Lamdang in thupi na e, eite’ lemna Mangpa
Ki-itna a luangsak hi, simlei zilja ah

Nopna huihkhi hong laang hiauhiau, Angelte tongluang ging in
Michih aa dia pahtawi tak Mang, Leitung ah Lem leng hen

Hiai ahi thangvan thugil