“Kong kochik ah lut un, manthatna apaina lampi tuh aja a, alam leng alian ngala,
huai lama lut tuh tam leng atam mahmah uh;
Hinna apaina kong akochik a, alam leng aneua, amute leng tawmchik ahi uh” Mathai 7:13-14
Hiai ah Jesun lampi chi nih ana gena, huan huai lampi zui/tawn a paite tunna(destination) ding leng ana gen hi. Naupan laia pana byheart a theihsa (memory verse) khat ahi. Nidangin hiai Bible verse akigen chiangin lampi neuchik ngat ngiungeu mitawmchik kizuia pai leh lampi lian, hoih, sau (highway) a mi tampi pai dupdupte lim lungsim mitkha ah hong kilang jel hi. Ahihhangin hiai kana etdan pen tu pandemic hunah hong kikheka, hiai tohkisai saulou kikum khawm leng ichi hi.
Covid-19 pandemic huna hong kithang mahmah thumal(vocabulary) thak khat tuh ‘new norms/normal’ chih ahi. Hiai new norms pen vocabulary thak hilel lou in, nna/thil khatpeuh hitaleh ina etdan leh zatdante athak a et poimoh ahihna hon langsak hi. Gentehna dingin, pandemic hongom ma in mipi kikhop khawmna tam mahmah hi. Huan, thilhih khatpeuh ah mipi tam leh tawm khawngin lohchinna leh lohsapna kiteh khanak abang hi. Hiai etdan pen kikhekin lohchinna ichih mipi tam leh tawm ateh ding hiloua, na na leh ngim pen na fulfill na hia chiha etding ahihdan hiai new norms in hon phawksak hi. Huaiziakin, hiai new norms zat toh kitona, i thil etdan leh pomdan leh lungsimputdan khek ding/et thak tuak tampi om ding hitah e, chih hon ngaihtuahsak hi. Khawmpi leh mipi biakkhawmna te bangleng newnorms lungsimput toh en lehang, biakna bang ahi, bang ka hihchianga Pathian bia hi ka hia, chihte athakin ngaihtuah lehang muhkhiak leh theihthak ding tampi om ding hi. Hiai etdan thak ineih keileh, newnorms ziaka bangmah kihihthei lou, ngeina dan kizuithei nailou leh sem kha theilou dana kikoiha, lohsam kisakna toh omkhak nilouh theih ding abang hi.
Hiai etdan thak mah Jesu thugen ‘Lampi Nihte’ theihchian na dingin poimoh hi. Lam neu leh kong kochik(narrow gate) ah pai mi tawmchik ahia, alehlamah lamlian leh kongpi za ah apai leh lut leng atam uhi. Ahihleh bang achia, Jesu’n lam neu leh narrow gate tawna pai dia nungjuite sinsak ahi ding? Lamneu leh kochik apaithei leh paizou dingin tupna kichiantak na neih kiphamoh hi. Huan,hiai lampi kochik tawna na paichiangin, na kalsuanna khempeuh na velcheta, hoihtaka enchiana kal na suan kiphamoh hi. Alehlamah, lamlian leh kong zaa lutding baihlama leh lam lehlam nga kawma pai lechin leng puk ding lauh huai kei hi. Huaiziakin, hiai lampi nihte apan Jesu’n hon sinsak nop tuh, na damsung hinkhua pilvang takin zang inla, na hih peuhmah enchianin chih hidingin ka ngaihtuah hi. Khopi leh mihingtamna munte ah facilities atama ichia, tuabang munte Delhi khopi leh munliante zuanin idiang suasua uhi. Jesun agen alampi size hilouin, na lungsima tupna leh chihtakna gen ahizaw. Munlian leh khopi mi tamna mun a iom laiin leng lungsima sia leh pha theihna chiimtak zanga, ei tup leh ngim mah en kilkel a pai ding ahihdan hon sinsak hi. Tup le ngim kichian neiloua, anuam lamlam ut lel a hinkhua zang mailou dingin Jesu’n hon sinsak hi. Huaziakin, gingtu hinkhua tuh tup leh ngim kichiantak nei, hiaimah etkawm tintena, pau leh ham, nasep leh thilhih khatpeuh aleng pilvang dingte ihihdan hiai lampi nihte in hon sinsak hi’a muhtheih in om hi.
Hiai etdan mah in, tukum a saptuam thupi “NGAIHDAMNA” en lehang gingtute hinkhua a ngaihdamna poimohdan muhthak theih tampi om ding hi. Adiktaka genin, gingtu hinkhua tuh ngaihdamna hinkhua ahi. Eitunga khialte ingaihdam chiangin, Pathian in ei khelhna hon ngaidam ding ahi (Mathai6:14). Hiai ngaihdamna hin khua zatna dinga hondal thei bangbang a om a? Ei kidiksakna bang, midangte mohsakna leh khelhna lungput, midangte gawt leh soisak utna, huan, mi’n hon musit kha ding chih lauhna leh adangdangten ngihdamna hinkhua zatna ding ah hon dal hi. Himah leh Jesu’n ‘kong kochik a lut tum teitei dingin’ hon sinsak hi.
Toupa’n simtute theisiam dingin hon vualjawl chiat hen aw!
