Mang Jesu ding a muanhuaite, hattak leh hangtakin pang ni,
Haksatnate’n hontuam chiang in, hiai thu kipahhuai thei gige in.
Sakkik
Na inn tung nailou na hi (2),
Na van inn tung nailou na hi !
Na van inn nuam tung nailou na hi.
(Van-inn nuam ah I lungkim ding hi..... HalleluiJah!)
Mang' nasep thaman mulou a, gim-le-tawl kia mah nasik a,
Mailam nawt ding na ngilh chiang in, hiai thu kipahhuai thei gige in.
Hong it ding kua hiam om lou a, khasiatnate’n hontuam chiang in
Nang hon it Jesu Khrist om hi, hiai thu kipahhuai theigige in.
Omlaivei gim leh thawmhau a, tawldamna himhim om lou a,
Lametna teng a bei chiang in, hiai thu kipahhuai theigige in.
---------------------------------------------------------------------------------
https://www.youtube.com/watch?v=TnHdaVXi0cs
Hiai la hong piandan: 2014 kum sepna ziak in khual ka zin mun mahmah hi. Ni khat zingkal baihtak zin ding in Vasundhara Ghaziabad (U.P.) apan IGI Airport (New Delhi) ka manoh hi. Security check zoukhin in departure gate lam manoh in ka bag khut langkhat a kaikawm in ka pai hi. Departure gate ka tunphei madeuh in manglam hileh kilawm, theih manlouh thakhat in, tunglam a Pathian thupitak a hong kilang guih bang in ka hong vak puap in ka thei a, “Na inn hong tung nailou na hi” honchi hi in ka thei hi. Bangmah ngaihtuahna hun om man lou in lamdang sakna toh, “Pa.. na thupi lua… Pa.. na thupi lua…” chi in mittui luang zungzung in ka om hi. Hiai bang thil tuak ngeilou ka hihman in lamdang leh thupi sakna in ka dim a ka khualzin sung in huai kia ka lungsim ah thamden hi.
Khattang hon nawse lou Toupa ka siang a om gige ahihdan hon phawksak a, khovel khualzinna ka zoh hun a le van ah, leikha leh tui-ek in a nek siatlouhna ah, gutate'n a phen ua a guk sam louhna uah (Matt 6:20), gou hon kholsak ahihdan hon phawksak hi. Lungtang kipahna a dim in, Toupa kiang ah hiai laate ka sakik zel hi.. “Khovel ah haksatna bangteng tuak in, kuamah hon it ding om lou in, lampi siik khawng ah si ding hongphong ding omlou nak liipliip ding hileng leng ….ka inn tung nailou ka hih ka phawkkhiak leh, Toupa aw ka lungkim veve ding hi” chi in Toupa phatna laa ahong pawt tulhtulh hi. Hiai laa, Toupa’ honpiak ahi a, Toupa’n ngaikhetute tengteng hon vualzawl leh chih ka thumna ahi. Toupa’n thupina tangta hen !
Laa thu: Mang Jesu bangkim Siamtu, thilteng tung a thunei, ei adi’a muanhuai tawntung ahi chih I thei hi. Himahleh gingtute khovel a khosa I hihlai man un, haksatna tuamtuamte’n hon tuam zelzel hi. Hiai bang hun ah khatveivei I ginna dengdel in pangpa tak in omthei hi. Himahleh, “Thu kipahhuai” phawk kiukiau a, hun teng a muanhuai gige a, lunglel lou a, hattak leh hangtak a pang teitei ding a lamette i hi uhi.
Thu kipahhuai tuh Gamchiam “VAN INN” ahi a, huai mun tung nailou, huai inn zuan a pailel lel i hi. VAN INN i tun chiang in i lungkimta ding hi. Toupa phat in om hen, HalleluJah!
Mihingte i pianken lungsim putdan tuh pahtak ut, khase baih leh minhoih deihte i hi uhi. Akhen chiang in Mang’ nna sepna ah hahpan kisa, tam semkhia kisa, tawl kisa in omtheih mawk hi. Mite pahtakna loh lou, pahtakna sang a minsiatna tam tangzaw chih bang om thei hi. Hiaite ziak a maban sawn ngap lou, mailam nawt zou lou a i om hun in leng, hiai thu kipahhuai theikhe lehang, mite pahtakna bangmah ahihlouh dan theihsiamna toh mailam kipaktak a nawt thei ding hihang.
Naungek khothei nailou tan in ittak a pom leh pomlouh theitum pah hi. I hinkhua ah ittak a kep, ittu hau chih bang i lunggulh leh i lamet pente lak a khat ahi. Huaiziak in ittu ding neilou a ittu ding bei kisakna tuh mihingte adi’a khasiathuai pente lak a khat ahi. Huai hun chiang in eite hon it a, mun bawl a kuan; eite neemtak a hon it khinkhian, “Mang Jesu” phawk le, Amah itna “AGAPE itna” abei ngeilou, a kang ngeilou, tangtawn daih itna ahihman in, hiai “thu kipahhuai” tuh eite ading in damna bukim ahi.
Mihingte adi’n taksa damtheihna neih anuam a, sepgim thatawl hun in leng tawl adam baih hi. Himahleh khualzin lampai lel I hihman un taksa hatlouhna leh damlouhnate’n honna tuam zel hi. Natna in hon henchip a, lunggim , thawmhau, tawldam lou, lametna om nawn lou leh lunglel a I om hun in leng, tangtawn a belh ding Van Jerusalem thak Kumpipa Mang Jesu nei I hihman un hiai “thu kipahhuai” in honneem in tawldamna honpia hi. Jesu Khrist a tawldamna na ngahta hiam, sanggam?
….
*Laa & Laate’ Thu hon petu, EBCC Central Delhi chairman hihna len lel, laa tamkhop gelhta ahi. Lungdam lua hang.
