Tung Sianmang, haibang hongngak lai aw,
Tungsunni aw mualdawn natan lai aw;
Vei leh tak thei lou sangzatamte,
Na tongdam neem tuibang hongluan lai aw.
Aw Kha Siangthou hong leng in hong galthuam aw,
Nagam laak ding buhbang, in min ziazua!
Setan kolbulh saltangte kikou chiaichiai!
Aw kei kuan hong honkhia ding chi’n honsam.
Setan kulhpi daibang nawk ding in,
Honghatsak aw, Toupa hong halhsak aw;
Tanglai Israelte zawh zel bang in,
Toupa kou zong hong zousak lai ve maw.
Thumding, peding, seemding pungsak aw,
Veitu tam semsem hong pungsak aw;
Dialdial leh diamdiam a seemkhawm di’n,
Laukha Siangthouaw Nang honghuai ve maw!
La hongpiankhiak dan:
1993 kum ahi a, ni khat tuh, Karbi nupi nih khualzin lampai lai ka inn kiangte inn ah hong khawl tawldam uhi. Kei hon muhtak un, “Amah kua hi hiam?” chi’n ka innluahna neitute kiang dong uhi. Amau, “Gamdang apan ahi. Ama’n Jesu thu gen zel ahi” a chi uhi. Huan, amau hon houpih nuam uh ahih man in kei leng a kiang uah ka vapai a, hiai bang in hon na dong uhi. “Nang koi gam apan hongpai?” honchi ua, ke’n, ‘Manipur a pan kahi” ka chih leh, “Manipur koi a om, a gamla hia?” hon chi ua, ke’n, “Khe a pai ding hileh ni tampi lut ding ahi” ka chih chiang in amau ki-en tuah in, “Lei leh van kimatna pek hi di eive maw!” chi in lamdang sa mahmah uhi. Ka kiang a eipau thei mialmial khat in hon-gen a, “Sir, hiai nupi nihte singtang kawm a om, a mawldiak mahmahte a hi uh” chi’n honhilh a, lungsim honla mahmah uhi. Jesu a tatna theinailou, Gospel vak in a tatvak khak nailouh, Karbi-te kia hilou, minam tamtak India gamsung leh khawvel pumpi a om laite lungsim mitkha ah hong suakkhe zungzung mai in, Joshua 10:12 a Joshua in “Ni aw, Gibean’ tung ah khawl lai in; Kha aw, Aijalon phaijang’ tungah khawl in’ chi a Toupa sam a, gamlaak ding omlaite a laak zawhna ding a ngetlai a, Toupa mai a adin didan khawng, lungsim a suangtuah kawm in, hiai bang in laa thu ding hong piangkhia hi:
Tang khatna: Tung Sianmang, haibang hongngak lai aw, Tungsunni aw mualdawn natan lai aw;
Hiai la thuvual masa in a gennop tuh, ‘Toupa’n a siamsa lei mihingte lak ah, Khrist a tatna thu za nailou omlaite’n leng a zak theihna ding un, hun bawlsak lai in. Ni tumdek kuan in mual dawn a tat/ salh lai bang in Toupa aw, nang tumsan mai ke’n,’ chi a thumsakna laa ahi.
Vei leh tak thei lou sangzatamte, Na tongdam neem tuibang hongluan lai aw.
Nam tuantual, mawl mahmah, khawsakna tawh kisai a leng phutkhak dandan a khawsa, mihing a sih leh thilteng bei himai, sihnung bangmah om nawnlou dana ngaihtuah maite.. Toupa’n A’ itna aw neem tawh, amaute zaaktheih di’n leh theihsiam theih di’n houpih lai leh, chi a thumsakna ahi.
Sakkik: India gam mun (khua) tamtak ah khawsung hausate phalna lou in Pathianthu gen phal hilou, phetlou in a khawsung valut leng phallouhna khua om hi. A khawsungmi kihong leh lunglut mahmah pawl om mahle uh, a khawsung hausa/ thuneite lauhna ziak in, ‘Setan kolbulh saltang’ bang in om uhi. Minautang, Pathianthu za nuam mahmah, doudaltu ziak a zatheiloute’ aw (kahtam), ‘Aw kei kua’n hong honkhe ding…?’ chia bilbuk a kikou chiaichiai’ dan a zaktheih hun bang omsek hi. Hiai bangte’n lungsim nasak mahmah in, Kha Siangthou thopna leh makaihna lou a hithei vuallou, tua lunggulhhuai mahmah ahihna taklatna a, ‘Aw Kha Siangthou hongleng in ...’ chi a chialna ahi.
Tang 2na: Mission field kia hilou, I veng sung mahmah ah zong I tuailai tamtakte Setan kolbulh a om, khamtheih saltangte, ‘Setan kulhpi um bichilh a omte ...’ veihuai mahmah. Tanglai Israelte tuipi san ngoingoi, lei hul a kaansak a, melmate tung a vualzou sakzel Pa, Israel sepaihte Toupa’n ei zong vualzawhna honpe thei ahihna phawk a, Amah chialna, ‘Tanglai Israelte zawh zel bang in, Toupa kou zong hong zousak lai ve maw,’ ahi.
Tang 3na: Khrist leh Agam aa ding a hihtheih lamchiat kidaamlou hial a suahkhia a, Khrist a pumkhat hihna, dialdial leh diamdiam theihna di’a Kha Siangthou ompihna leh makaihna deihhuaitak ngen a thumna ahi.
Thumal hilhchetna:
Tung Sianmang: Pathian tungnung ahihna genna
Haibang hong ngak: Haichi/Thei honggah diing ngakbang a ngak chihna
Tungsunni: Ni (Sun) genna ahi a, hiai ah bel hun kawkkha zaw hi.
Sangzatamte: Mi tampi genna
Tongdam neem: Damna tunthei Aw-suak neem genna
Tuibang hongluan: Honggen/ Hong houpih chihna
Buhbang in min ziazua: Banghiam hih ding hunlai ahihdan leh thil kikhelthei, thukin genna ahi.
Saltangte: Satan/ khelhna sikha a omte genna
Daibang nawk: Setan' kulhpi suksat sawma panlakna genna
Tanglai: Sawtlampek hun genna
Dialdial leh diamdiam: Kithutuak genna
Laukha: Kha (Kha Siangthou genna)
Huai: Pi/makaih chihna
https://youtu.be/0oExnrthE4A
