Huihkhi hong lang simlei tung ah bang huih khi hiam aw,
Na gim nam e buaina lung ngaihna;
Hizong Toupa’n kei hong ompih bangdi’n ka lau di’a?
Buaina lel in khapham leng zong Toupa’n hong pi ding.
Sakkik
Hong zoulou ding hong mu lou ding simlei huihkhi in,
Simlei gimnamte hong bei hun chiang’n;
Sian’ anglai ah lung muang den in naubang kahnate,
Melmu lou ding kei hong itpa kiang;
Simlei ngilh in buaina ngilh in sawlbang hei den ding,
Ka ngaih belh ding Toupa Na gam nuam lou dang omlou.
Na gam tulsing a hiang zau e luankhi a tuang lou,
Gahthei bang nun vabang tuang nuam ing;
Muikhua zin a lung zuan zaikhia maimit sing omlou,
Zaideih khia in zamluang tum in zaila’n hong phat ning.
Zilza Na gam pakbang etlawm bahkhi bang vel ning,
Zingzin simlei nunna ka zoh chiang’n;
Nunna siktui damdiai in luang vaibang ka tham ding,
Khensa zatam umbang kholh di’n mel kimu kik ding.
https://youtu.be/Jmjh_hA2cng_
_____
Laa Hong Piandan: Phuah hun 1994 vel a i gam muanna leh bitna hong dengdel in nam leh nam kimat, kipimang, kithah leh buaina husa hong tam mahmah lai a kiphuak laa ahi. Hiai la phuah lai a lungput - Leitung buaina ziak a si leh mang in om kha bang hile’ng zong, Toupa’n Amah kiang ah kei honpi ding, tua ah leitung buaina in hon nawkkha nawn kei di’a zoh leng ahon zou nawn kei ding.
Laa’ Thu Genchetna:
Tang 1na:
Buaina huihnung bang in hong nung, gimnam bang in hong nam, ahihhang in Toupa’n kei hon ompih a ka lau kei. Hiai buaina lel in si hial le’ng zong Toupa’n kei, Amah kiang ah hon la ding hi.
Sakkik:
Simlei na/thilte’n van a Pathian angsung ah ahon zou nawnkei, hiai lei buainate bei a van a i om ciang in; Pathian’ angsung ah lungmuang ding kahna bei ding, tuabang mun tuh van a Pathian mun lou dang a om kei.
Tang 2na:
Vangam, singhiang pha leh gahpha mahmah toh tehkhin in, tua singkung ah vasa bang in ka tuang ut, tua singkung ah khitui a om kei, sihna a om kei; Nitum kuan a lungzuan laasa in gingkilawmte tum in Toupa phat ning.
(Hiai tang 2na a Zamluang, lagelh copy masa lamte ah Zumluang ci in kigelh kha ‘Zamluang’ ding hizaw hi).
Tang 3na:
Vangam za leh nuam ka tun ciang in thupi sa lua in khibah bang in ka velvel ding, hiai leitung ka paisan ciang in, hinna tui luang bang in a luang dia, i khensa itlehngaihte mu in i om khawm ta ding.
Thumal Genchetna:
Huihkhi - Huih genna
Laang - hong om, hong tam genna
Simlei- Leitung/khovel genna
Kha pham - sihna genna
Sian’ ang- Pathian kiang genna
Zatam- Tampi genna
Umbang kholh- Omkhawm, kithuah khawm
Zilza - Lian mahmah, kidaih mahmah
Bahkhi- Khibah, ngawng a awh khibah
Zingzin- Zin/khualzin
Zaideih khia- Laa sa, laa awi
Zam luang- Zampi ging, Music ging
Tulsing - Singkung
Ahiang zau- Singhiangte zaipha hoih
Luankhi- Mittui, dah hun a mittui
Muikhua zin –Khawmialkuan
Gah thei bang nun- Gah hoih, hing dipdip
Vabang tuang- Vasa baang (wall)a tuang
