June 2 nitak @8.00PM in TV ah Tuailai Khawmpilian flashback ka en a, thupi ka sa mahmah hi. Ka lungsim hon la Tuailai 95 programme ahi. A thupi ‘Zomi For Asia 2000’ chih ana hi depdup hi. Heutute vision maimai lou ana hitah e… chih ka musuah. Missionary William Carey (1761-1834) in, “Expect great things from God; attempt great things for God” ana chih, huai zuikha mahmah hin ka mu hi.
Ahia, 2000 in bel taksuah zoukei abang hi. Himahleh, 2020 I tuntouh chia’n China, Thailand, Cambodia,Myanmar chihte ah Zomite missionary hunkhop omta… TOUPA phat in om hen!
Tuailai Missions 2020 ah thupi “Go into the World” chih hong hilai.. TOUPA’N lem a sak leh a hitheilou om het kei hi. Himahleh a sepsuahna ding lam ah bangchi panlak a hoihzaw di’a le?
Missionary tamzaw/ tampite gen “haksatna” ahi. ‘Haksatna’ kigente lak ah khat sum-le-pai a giautauna hideuh hi. A sawltu saptuam in hiai lam ah mohpuakna liantak i nei uhi. Children education, medical insurance chihte alou theilou hong suakta hi. Huai lam ah bangtan pan laksak I hihiam chihte ki-etthak tuak hi.
India ah mission agency lian IEM leh FMPB om hi. Hiaite ah sumthoh lampang pan theih tan I pang uhi. Huai pawlte ah leng a sem tampi I om uhi. A kuankhete gal matawng (frontline soldier) in I pang ua, haksa mah leh Pathian itna ziak in lungke lou in pang teitei uhi. Mission nasepna I chih gal matawng kia hilou planning, strategy and administration lam leng huamkha ahi. Huai lamte ah ei singtangmi kitallang hetlou hi. I chitlouh ziak hia or bangziak?
Saptuam vaai a theithuk mahmah khat ka dotna ah hiai bang in hon dawng hi: “Vaite, eilam (Lamka lam) hong zin chiang ua Pulpit bang kilamen pah ua, piak le hitangpi uh; ei-a-te vaigam a vazin chiang ua, Pulpit kilamen banlou ua, piak le hilou mah uh. Hiai pen eilam mite zia ‘kisuanlahna’mizia I neihziak uh ahidiam” chi hi. Bangteng hileh level kikim a zaw hon mulou deuh uh bang ahi. “Mi lampi sialsa na zuih leh loutul na tungdi’a, mi singkung kal nasa a na kal leh vasabu hawm na tuak ding”(PB) chih paunak hoihtak om hi.
Heutu in mohpuakna tampi neikop hi. Nungzui leh gal matawng kia ding a mi seek hiam sinsak dikkim lou hi. Heutu ding, makai ding a kisinsakna leng tu hun in poimoh mahmah hi. Huchibang a chitna neite hunlem bawlsak in khahzan le’ng, Go into the world taksuahna di’a kalsuanna masa hikha thei hi.
Kidouna a vualzohna tangte pen galhang neite kia hilou in, leadership lam ah planning & strategy siamte hizaw uhi. Khalam thu ah bel ei mimal hatna a mi lungsim zohvual diing omkei, Pathian Kha Siangthou kia in mite lungsim khengthei chih bel I haihkei. Kha Siangthou piina leh lamlahna I poimoh.
Khatvei Delhi biakna kikhop khat ah Director khat dotna ka bawl a, hoihtak in hon dawng hi. A tawpna ah, “Kei, kumnawn a Director hinawn lou ding, midang khat hita ding a, huai (Director thak) in a chih dandan…” chih hon behlap hi. Policy kichiantak, goal setting chihte ompi khollou, Director khat in hoihding a atheihpen kum thum hon sem, a nawn a pen in huai pen sanga hoihzaw di’a gintak hon nei, semsuah nawn. Huchia, kum thum phakzoh teng a kibul patthak nawn I hih khak leh, planning & strategy tungtang kiveelna di nei I himai di uam?
…
*Thugelh hon petu, EBCC Delhi a Tuailai Pawl leh Media Team a kizangsa ahi. Lungdam lua hang.
