Kum thak ni khawng hichidan a zang maimah din kingaihtuah ngei khang e maw!
Hipi leng ziak a hun haksa hichi bang lak ah “Ka ngaihtuahte lah na ngaihtuahte ahi ngal kei” Toupa'n a chi hi. (Is 55:8)
Ahihleh huai hon chitu Pathian in bang ngaihtuah amah diam maw?
“Noulam a ka lungsim putdan lah ka kithei ngal a, na hun nanung tawp ua lametna hon pe ding in thil hoihlou hilou in hoihna ngaihtuah ka hi” (Jeremia 29:11) chi in ana genkhin hi.
December 2019 a kipan covid19 hipi leng kipan a, India ah leng hong tung in March 2020 a pan in nidang a kizang ngei lou Lockdown chih hong kipan hi. Tua ziak in nekzonna, siamsinna leh hiai hipi leng ma a khosakdan ngeina I na theih leh zuihsate tampitak in hong kikheng hi. Lamchi tuamtuam ah man na leh nawngkaina I tuak uhi.
Tua bang lak ah leng, Pathian tuh hun paisa a mansuahsate nangawn hon pe nawn theipa ahi hi, malam a ding a hoihna di a ngaihtuah lailai in.
“… khaukhupte, singnget khaute, khauhonte, leh khaupete'n a nekkhit kumte nou ka hon din nawn ding hi” (Joel:2:25) achi hi
Kuate tung a tuabang hatna pe nuam hiam chih leng genchian khinta hi. “A lam a lungsim diktat pumite tung a a hatdan hihlang ding in khovel tengteng ah TOUPA mit a vak dundun sek ahi. (2 Kro 16:9)
Bangkim hih thei, bangkim thei, koimun peuh a om, kikheng ngei lou leh tangtawn a om Pathian ahi hi.
Aman “om hen” chih thumal chauh zang in khovel leh a sung a omte a bawl a, mihing bel amah dungsun mahmah in a bawl hi. Tua ziak mah in it mahmah a, melma Setan in a khempuk nung nangawn in leng a itna ziak a delhzui in tankhia hi.
Tuate tengteng a theisiam laphuaktu khat in hichin na gelh hi
Ka hinna kon pia, Toupa, Nang ading’ sehtuam hi hen;
Ka hunte, nite kon pia, Phatna tawplou-in luang hen.
Ka khutte kon pia, Nang ding’ Nang itna’n na semsak hen;
Ka khete kon pia, Nang ding’ Kilawm leh juanjang hi hen.
Ka aw konpia, la sa ning, Ka Kumpipa kia ading;
Ka muk kon pia, dimsak in, Nang apan-a thu hoih in.
Ka sum leh paite kon pia, Paisa san khat zong it ke’ng;
Ka lungsim kon pia, zang in, A hatna Na deih bang in.
Ka deihtelna Nang kon pia, Kei a hi nawn lou ding hi’ng;
Ka lung kon pia, Nanga sa, Na mangtutphah hi ding in.
Ka itna kon pia, Toupa, Na khebul goubawm suah ing;
Ka pumpi’n kon pia, vekpi’n, Nang’a hi tawntung nuam ing.
Hiai laa in a gen kipumpiakna pen nang leng chihpih theisam ding in, Toupan kum 2022 sung khempeuh hon makaih henla, anuam-ahaksa na tung a hong tung khempeuh tualam a kalsuanna ding a Pathian vanzat hi uhen aw!
Tua toh kiton in vanglian Pathian in a zahngaihna hon tangsak in, a hoihna leh vualzawlna – salam leh khalam ah, hon vuk hen aw!
