Kum 2020 pen ei khang (generation) a ding in kum haksatak ahi hi. Simtawp a om Antarctica gambuppi nasan a leng veikhak a omta Covid19 hipi, khovel pumpi ah kithehdalh hi.
Vanglian Pathian in hon veng a, covid19 hipi leng nuai ah, sihna limguam tawn a pai bang in kithei mah lehang, A’ khetbuk leh A’ chiang in hon khamuan zel a, kum 2020 beini tanpha hon zangsakta ahihman in hampha kisa in, kipahthu i gen hi.
Hiai hipi leng in a veikhate kia hilou in a veikhaloute’ hinkhua na-ngawn leng nakpitak in hei lamdang zou hi. New Normal chih pen ‘normal’ chih himahleh ‘new’ pha mahmah hi. Tuaman in kum thak 2021 pen I na zatkhaksa kum thak dangte toh tehkak in thak kholdiak hi. Hiai tan honpitu Vanglian Pathian mah toh tonkhawm lou in zangsiam lou ding I hi chih phawk in Amah hon tonpih ding i lamen lai hi.
Ngaihdamna ding in kong a hon honsak lai a ahi.
Tua ngaihdamna sang ding leh tua ngaihdamna thu pesawn ding in a hondeih a ahi.
Ahihleh tua ngaihdamna bang ahia? Chi 3 in gen le:-
Amanpha Ngaihdamna ahi: Amanphatna bang? Phulouh ngaihdamna, totally undeserved ahihziak ahi. Hiai ngaihdamna pen ginna tungtawn a muh/ san ding a luikhiak ahi a, tua ginna pen a tawm/ neupen a hiai tan/ chia chih bangmah gen ahikei hi. Phetlou in, Jesu mahmah tuh ginna siampa leh hihkippa (author and perfecter/ finisher of faith) chi a gen in om hi. Tatna ding a kisam zahzah Jesu’n a hong sep zoh kia hilou in, tua tatna nasep gintak theihna ding a bul hon patsaktu leh zohsaktu ahi lai tel hi. Nak buchin khezou mama e maw!
Amantam Ngaihdamna ahi: Aman tamdan bang chi tuat ding? Lei leh van tung a thunei Pathian in 'khelh man sihna ahi' a chih kia hilou in, 'sisan suah louh in ngaihdamna himhim a om kei' chilai hi. Tua thukhun dungzui in Israel-te kiang ah khelh thoihna ding a gensiatbei ganta sisan suah a kithoihna lan ding in ngiat hi. Hiai thukhun mihing tengteng in zui ding hitaleh ganta bangzah in sihloh ding ahia? Tuate a sum a tuatvual ahi diam? 'Khelhna hihmangna ding in khatvei a setden ding in Jesu hong langta hi' (Heb 9: 26) chih a hihman in, sutkhiak vual hikei mah leh, hiai ngaihdamna mantamdan hon lak thei hi.
Athahat Ngaihdamna ahi: Hiai ngaihdamna in mihingte pumkhek zou hi. Angaidamtu pen lungsim tawldamna pia hi. Ngaihdamna pen thubaih hilou hial hi. Philip Yancey in a laibu gelh ‘What is so Amazing about Grace’ chih laibu ah hichi’n na gelh hi: “Ngaihdamna a omna peuh a zuausanna ziak a puaknatna a om teitei a, tua puaknatna tuh baihlam tak in a veng kei hi” Huan, “Ngaihdamna in a ngaidamtu pen suangkulh tang khahkhiak bang in zalensak hi,” chih behlap lai hi.
A ngaidamtu’ suahtakna banah ngaihdam a om pen pumkhek thei hi. Pathian thu awite sawi a, doudal gige Saul hinkhua pumkhek in Tanchin Hoih puangzaktu suak in sihpih hilhial hi. Mulkimna bei a gamta Nicky Cruz hinkhua lumlettu hiai ngaihdamna mah ahi hi.
Hiai ngaihdamna manpha, mantam leh thilhih theihtak mai tuh, nang mimal hinkhua mahmah a tang a, tam sem tanbeh a, tua kia hilou a, pesawntu hi ding in vanglian Pathian in hiai kumthak 2021 sung khempeuh hon tonpih henla, Amah toh tonkhawm thei ding in hon hihsiangthou hen aw!
Tangtawn Pathian in Nehemia tung a Kumpipa’ deihsakna a tunsak bang in nang tung ah deihsakna tunglam apan hon tungsak henla; Joseph kiang a pilna a piak bang in nang kiang ah leng pilna honpia henla; melmate’ tung a vualzohna Joshua a piak bang in nang leng na melma bangpeuh tung ah vualzohna hon peta hen, 2021 sung tengteng in!
