Hun leh ni, kum leh kha kikhek zelte’n a kan khak louh, hun leh kum, ni leh kha-te tung a thunei Tangtawn Toupa min in Saptuamte kumlui mangpha khak in kumthak chibai ka hon buk hi.
KUMLUI MANGPHA: - Kumlui 2021 sung a i gamtatnate, i sep i bawlte, i gen i sakte, i zin i vakna khempeuhte ngaih huai, lunglen huai leh khiaklah huai ngen a hong bang ta hi. Himahleh khat bek i lettang theih om nawnlou in hon mualliam san vekta uhi. A hoihte hi in a hoih loute hita leh a liam mang khin vekta ua bawl thak theih om nawnkei uhi. Laphuaktu khat in - Tang a nunlui loubang tulsa, A latna tang om diam? Don zel lehang ngou mei kal ah, Ngilhni omlou ding hi. Nunlui liamsa alatna tang om bang himai zen leh zaw a ennuam a tam mah ding! Kal khat bang, kha khat bang ka taam ta na a, ka pai nuam nai kei chi leng hun khop i om ding uhi. Thangvan hong mau sinlai hon phawng, Nunlui ka ngai semsem; Vanglai palzou lawmvual kim leh pialgal kaisa ngai ing. Phamsa ngai in naubang ka kap, hong nem ding omlou hi; A va bang a noplai nite, Muhni om nawn ding hiam? Lungkham banna ding nei lou, kinepna himhim nei loute ading in tuh mangbat huai tak hiding mah ahi. Himahleh a ban omlai tuh hiai ahi:- Ngai mahleng zong nunlui mualliam, Lelliang leltak hing e; Galdon ning thangvan vangkhaw nuam, Nuam in ken thuak bei ning. Hong nem in mang Immanuel, Kahlai ka bang ding hi; Nunlui ngaihzaw lentang ngoumei bang, A then ni om ding hi. Halleluijah Amen. Lunglen khongaihna chiang kia ah a bei kei a, ei gingtu ading a khamuan huai mahmah tuh hehnem siam hon taisan ngeilou a hon ompih gige Mang Immanuel neite hihang. “Nunlui ngaihzaw lentang ngoumei bang a then ni om ding hi” chi a kinem in Thangvan khawnuam galdot chiat zaw ni.
KIMANGNGILH BAWL NI:- Kumlui sung a i tuah dahna kahnate, sihna natnate, buaina leh haksatna tuamtuam, mimal, inkuan, Saptuam leh khotang, lawm leh vualte apan simmohna i tuahte lel zen a puapua lou in kimangngilh bawl in suahtak san sawm leng i tawldam zaw thamtham ding hi. Israelte zong gamchiam Kanaan zuan a apaina lampi uah, haksatna leh buaina tampi tuak kawm gige uhi. Eite zong Toupa’ hon chiam van Kanaan zuan a niteng a pai i hihman in honpitu Pathian mitsuan gige ni.
KUMTHAK CHIBAI:- Kumlui beita adang om nawn lou chih hilou ahihman in kipak mahmah hang. A lui pen toh a ni phazah, a kha omzah leh dakkal omzah zong kibang a thak nei i hi uh. Hiai a bul a ding a kipan nawn thei a i om nawn hampha iki sa mahmah hi. Kumlui a hunzat dante, nasep thilbawl dante apan omdan gamtatna tan a hoih zaw, a manpha zaw, leh a lohchin huaizaw, agahsuah zaw ding in pan lakna kum hong hileh chih i ki-deihsak chiat uhi. La khatmah en nawn lehang –
HUNTUI BANG KIAM IN MUAL KHUM ZEL:- Tuni a kumthak chi a kipak tak a i lop in zong ni 365 bei chiang in hon mual liam san nawn zel ding hi. Leithil tangtawn daih om lou; Tangtawn thilte kia lam en in; Pathian khut muan huai len in. Hun kiam hatdan leh leitung thilte daihsawt louh dan thei gige kawm a tang tawn daih ding Pathian khut muanhuai len ding a hasotna i mu uhi. Ni teng a I buaipih leh hun tamzaw i piak thilte sawt lou nung a beipah dingte hi maithei uhi. Kum thak ah etdan thak leh lungput thak toh Tangtawn thilte kia mit suan leh ngaihtuah in Pathian khut muanhai lenni.
KHOVEL HAUHSAKNATE ENG KEN:- Khovel mitna tuh Jesu Khrist toh hon kikhensak tu ahihman in pilvan tuak mahmah hi. Leitung thil, gou leh gam, neih leh lam mihingte khosakna ding in poimoh lou ahi chingam ding kuamah ki om lou hi. Huai ziakin michih in deih pen leh delh pen a I neihte uh ahi. Himahleh “Kintak in sia in bei hi” Sawt daih lou, khat veivei hon lungkhamsak leh hon mang bang sak tu zong hi lai hi. Huaiziakin “Van gou hauhsaknate zong ni, A mang thei ngeilou gou ahi.”
NA DAMSUNG ZIN’ NA ZOH CHIANG IN:- Hiai leitung a I damsung tuh khualzinna toh teh khen ahi. Hiai I damsung a sawt ding leh a tom ding kuamah a gen thei ki-omlou hi. Damsung ni hong bei chiang a tangtawn hun hong kipan ding pen bei nawnlou ding chih himok hi. Huai tangtawn hun a ding tua I damsung a kisakkholh poimoh penpen hi. Damsung ni hong bei chiang a kikhelta ding hi. “Na damsung zin’ na zoh chiang in Pathian a’ na muan huai leh; Tua van innpi kilawm leh vak, Na kha’n nuamsa’n a luah ding.
Kumthak ah Toupa hoihna tang in, Khalam vualzawlna, salam vualzawlna, Van vualzawlna leh lei vualzawlna bukim A Saptuam mi kuapeuhte tung ah i poimoh bang chiat un hon vuk ta hen.
