“Huchiin sing tengtengin lingvom kiangah, kisa in, nang ka kumpipa ding un om in, a chi ua. Huan, ling in sing kiangah, Na kumpipa ding ua thau hon nilh petmah na hih uleh ka lim ah honbu le uchin ake: na hih kei ule bel linga mei hongpawt in Lebanon tanga sidar singte kang khin vek heh, a chi a.” Vaihawmmite 9:14-15 (BSI)
THUPATNA: I Maban zek ua Saptuam heutu kiteelna om pah ding hi. Hiai kitelna tuh MLA kiteelna sang in poimoh zaw hi. A ziak ahihleh Pathian leh Satan in bildoh mahmah ding un ka gingta hi. Tua kia hilou in a teeltute’n leng poimohna liantak i nei uhi. Toupa’n a sisan a’ a tatsa Saptuamte makai ding, heutu telna ahihman in pilvan ngai mahmah hi.
Saptuam Heutu tel ding’ a poimohte na ahihleh
(i) Tuni tan in, Toupa’n heutu tungtawn in a mite pi lailai hi.
(ii). Heutu hoih in kum 5/10 sunga a sepkhiak, heutu hoihlou in kum khat sung lel inleng sia sak zou hi.
(iii) Jesu mahmah in heutu poimohna gen chian mahmah a, mittaw leh mittaw ki-pi le uh khokhuk a khia khawm ding na chi hi. (Matt. 15:14).
Tua i Laisiangthou tangteel i theihsiamna ding un Vaihawmmite bung 8 leh 9 i simchiat poimoh hi. Gideon in Tapa sawm sagih a neih banah, a mei toh kal ah tapa Abimelek nei hi. Sekem mite’n Abimelek a heutu ding in bawl ua, huchi in Gideon tapa sawm sagihte that chimit sawm mahleh Jotham kia suakta hi. Jotham in Gerizim taang tung a pan Sekem mite kianga a thugen hiai ahi. Gerizim tang ahihleh vualzawlna tang ahi. “Huan, hichi ahi dinga, na valuah ding uh gama TOUPA na Pathian un a honpi lut hun chiangin, vualjawlna Gerizim tangah na koih ding ua, hamsia Ebol tangah” (Deut. 11:29, BSI). A khua Sekem mah leng Joshua in “kei leh ka inkuante’n Toupa nna ka sem ding uh” chia a thupukna poimoh tak a lakna mun leng ahi. Himahleh hiai mun ah, Jotham in Gerizim taang apan Sekem mite hamsiat hi. Vualzawlna taang apan hamsiatna thu genkhiat a om in thil diklou om chih hon hilh hi. Huai thildiklou tuh Pathian chihlouh/deihlouh makai/heutu tunkhiakna ahi.
Jotham in gentehna zang in thugen hi. A gentehna ah tuh Olive, Theipi, Grepgui leh Lingvomte zang hi. Lingvom, Abimelek genna in zang a, heutu dinga chinlou pen ahihna taklang hi. Himahleh heutu dinga tungkhia mipite tungah hamsiatna butkhiak in om hi. Jotham hamsiatna tangtung taktak hi. “Abimelekin a unau sawmsagih a thaha, a pa tunga a gamtat dan thu a’ a gitlouhna Pathian in huchibang in a thuk samta ahi. Huan, Sekem khua a mite gitlouhna tengteng Pathianin a honthuk samta hi: Huan, Jerubaal tapa Jotham hamsiat, a tung uah a hong keta hi” (Vaihawmmite 9:56-57, BSI)
Abimelek heutu hong hihdan 9:1-3 kikal ah ki muthei hi. Sekem khua ah, a nu sanggamte inn ah hoh a, a nu pa (apu) inkuante houpih hi. Huchi in Sekemte’n “Amah i unau ahi” chi in heutu ding na dinkhia uhi. A mihing zia ding tuh (tang. 4na) ah muhtheih in om hi. Sekem mite’n kithuahpih na in dangka Sawm sagih pia ua, tuate zang in Mingongtat leh migilou pipi guai a, a sanggamte ban thah hi.
Thukhitna: Sekemte’n Abimelekte heutu a, a neihsung kempeuh uh, a kim leh a kiang ua melma omte gendawk in omkei a himahleh amau sung ah buaina nasatak om hi. Heutu a hoihlouh chiang in Toupa adia gam kek sang in, saptuam sungah buaina hong om in, siatphah/hatlouhpah in om hi.
Saptuam heutu ding tel chianga pilvang na ding:
A bukim louh chiatchiat lak ah leng, Toupa’n tu hun adia heutu a deih mi om ding hi. Tua ahih man in, i telkhial louhna ding un, Toupa kiangah heutu ngen chiat ni. Toupa’ min thupi na ding in, mihing deih chih tan hilou in, Ama’h deih heutu telkhia thei ding in hon vualzawl chiat hen aw!
